JOSUÉ 3 - Quichua Imbabura 2016

Jordán yacuta chimbashcamanda

1Josueca, tutamandata jatarishpami, Sitim shuti pambamanda llujshishpa, tucuilla Israel gentecunandi, Jordán yacuman chayarca. Chaipimi carpacunata shayachishpa tiyanajurca.

2Ña quimsa punlla jipami, Israelcunata mandajcunaca carpacunata shayachishca chaupicunata purishpa,

3gentecunata cashna nishpa mandanajurca: “Cangunata Mandaj Taita Dioshuan ari ninajushcata alichishca arcata, sacerdote levitacuna huandushpa rinajujpimi, paicunata catishpa rina canguichi.

4Shina catishpa rishpami, maita rinatapash yachanguichi. Cangunaca, chai ñandaca na rijsishca cashpami chashna catishpa rina canguichi. Ashtahuangarin, Diospaj arcaman, na yapata quimirishpami, iscun patsaj metro carutashna catishpa rina canguichi” ninajurcami.

5Josuepash, Israelcunataca cashnami nirca: “Cayapami Mandaj Diosca, pipash na rurai ushanallacunata rurashpa ricuchingapa shamunga. Shina cajpimi, Diospajlla tucushpa shuyana canguichi” nircami.

6Josueca, sacerdotecunataca cashnami nirca: “Dioshuan ari nishcata alichishca arcata huandushpa, Israelcunata ñaupashpa ringuichi” nircami. Shina nijpimi paicunaca, Diospaj arcata huandushpa, gentecunata ñaupashpa rinajurca.

7Mandaj Diosca, Josuetaca cashnami nirca: “Cunanllatami candaca, Israelcunapaj ñaupajpi jatunbi churagrini. Moiseshuan imashna pacta cashcashnallata, canhuambash pacta cashcata yachachunmi, chashna ruragrini.

8Ñucahuan ari nishcata alichishca arcata huandushpa rinajuj sacerdotecunataca: ‘Jordán yacuman chayashpaca, chai yacu manñapi shayaringuichi’ nishpa mandangui” nircami.

9Shina nijpimi Josueca, Israelcunataca: “Cangunata Mandaj Taita Dios rimashca shimita uyangapa quimirimuichi” nirca.

10Josueca, cashnatapashmi nirca: “Cangunaca caita ricushpami, causajuj Taita Dios cangunahuan pacta cajtaca yachanguichi. Paimi cananeo, heteo, heveo, ferezeo, gergeseo, amorreo, jebuseo gentecunataca, cangunapaj ñaupajmanda llujchishpa calpachinga.

11Tucui cai pachata mandaj Jatun Dioshuan ari nishcata alichishca arcata apashpami, Jordán yacu chaupita yalinga.

12Cunanga, tucui Israel ayllucunamanda, chunga ishcai runacunata agllaichi.

13Tucui cai pachata Mandaj Jatun Dioshuan, ari nishcata alichishca arcata huandushpa rinajuj sacerdotecuna, Jordán yacupi sarujpica, chai yacuca caiman chaiman shicanyangallami. Janajmanda shamujuj yacuca, shuj pushtupilla tandanajushpami jarcaringa” nijurcami.

14Shina nijpimi Israelcunaca, Jordán yacuta chimbangapa paicunapaj carpacunamanda llujshishpa rinajurca. Dioshuan ari nishcata alichishca arcata huandunajuj sacerdotecunami, paicunata ñaupashpa rinajurca.

15Diospaj arcata huandushpa rinajuj sacerdotecunapaj chaquicunaca yacu manñapillatami mutiyarca. (Granocunata tandachina punllacunapica, Jordán yacuca jundashpami jicharijuj carca).

16Janajmanda shamujuj yacuca, Saretán shuti pueblo ñaupapi tiyaj Adam shuti pueblomanda ashtaca carupimi, shuj pushtupilla tandanajushpa jarcarirca. Shinamandami, Arabá shuti, Cachi cuchaman rijuj yacuca, chaupirishpa tucurirca. Shina tucujpimi Israelcunaca, Jericó pueblo chimbapurata yalinajurca.

17Ashtahuangarin, Mandaj Dioshuan ari ninajushcata alichishca arcata huandushpa rinajuj sacerdotecunaca, Jordán yacu chaquishca chaupipimi shayarishpa saquirirca. Paicunaca, tucuilla gentecuna chimbangacamanmi chashna shayanajurca. Israelcunaca, tucuillami yacu chaquishca pushtuta yalinajurca.