EZEQUIEL 28 - Quichua Imbabura 2016

1Mandaj Diosca cashnatapashmi nihuarca:

2“Huañuna aichayuj runa, Tiro shuti pueblota mandajtaca, cashna ningui:

Mandaj Jatun Diosca, cashnami nin:

‘Canga, cambaj shungupi jariyashpami:

Ñucaca diosmi cani, chaimandami, Taita Dios tiyarinapi tiyarishpa, mama cucha chaupipi tiyajuni nijurcanguimi.

(Canga runallami cangui, napacha Taita Dios canguichu).

Canga, cambaj shungupica, Taita Diosmi cani yajurcanguimi.

3Canga, Danieltapash yali alipacha yachajushcami cangui.

Cambajca, imapash na yachai ushanalla, ima pacallapash na tiyanllu.

4Can alipacha yachajushcahuan, aligutapacha yarishpa purishcahuanmi, ninan charij tucurcangui.

Shinallata, curitapash, culquitapash ashtacatami mirachircangui.

5Jatungapa, randingapa ari nijunatapash alipacha yachashpami,

tucuita mirachishpa charijyarcangui.

Canga, chashna ninan charij tucushpami, cambaj shungupica jariyarcangui’ ningui” nishpami villahuarca.

6Shinamandami Mandaj Jatun Diosca, cashnatapash nijun:

“Canga, cambaj shungupica, Taita Diosmi cani yajurcanguimi.

7Shinamandami shuj llactacunamanda ninan shinlli runacunata cambajman cachamusha.

Paicunami, espadata alichinamanda llujchishpa, can juyailla alipacha yachajushcataca tucuchinga.

Shinami, can alicachi tucushcataca tucuchinga.

8Candaca, huañuchishpami pambanga.

Mama cucha chaupipi huañujcunashnami huañungui.

9Canga, canda huañuchijuj runapaj ñaupajpica:

‘¿Ñucaca, Taita Diosmari cani’ ni ushanguichu imashi?

Canda huañuchijpaj maquipica, huañuna aichayuj runallami cangui.

Canga, na Taita Dios canguichu.

10Caru llactamandami, circuncisionda na rurashca runatashna huañuchinga.

Cai shimicunataca, Ñucami cashna nini” ninmi Mandaj Jatun Diosca.

11Mandaj Diosca, cashnatapashmi nihuarca:

12“Huañuna aichayuj runa, Tiro shuti pueblota jatun mandajmandaca, cashna nishpa ninanda huacangui:

Mandaj Jatun Diosca, cashnami nin:

‘Canga, ima pandatapash na rurashcata ricuchijmi carcangui.

Alipacha yachajushca, juyaillagupachami carcangui.

13Canga, Taita Diospaj Edén shuti pambapimi causarcangui.

Cambaj churajunapash, juyailla tucui rumicunahuan rurashcami carca:

Cornerina, topacio, jaspe, crisólito, berilo, ónice, zafiro, carbunclo, esmeralda shuti rumicunahuan, curihuambashmi rurashca carca.

Canda Dios churajui punllapica, tamborcunata, gaitacunata taquingapa alichishcallami carca.

14Canga, tucuita ricushpa jarcaj, ninan ushaita charij querubín angelmi carcangui.

Chaimandami candaca, Taita Dios Ñucapajlla urcupi churarcani.

Canga, chaipimi carcangui.

Nina rupajuj rumi chaupicunapimi purijurcangui.

15Canda Dios churashca punllamandapacha, tucui alitalla rurashpami causajurcangui.

Shina cashpapash, na alita rurashpami callarircangui.

16Canga, charijyangapa munashpami, tucui na alita rurashpa, juchata rurarcangui.

Chaimandami candaca, Taita Dios Ñucapajlla urcumandaca calpachircani.

Rupajuj rumicunamandami candaca calpachircani.

Tucuita ricushpa tiyaj querubín ángel, candaca chashnami calpachircani.

17Canga, juyaillagupacha cashpami, ninanda jatun tucushpa na cazurcangui.

Ninanda jariyashpami, can ali yachajushcatapash huaglichircangui.

Chaimandami candaca, alpaman shitasha.

Can imashna tucushcata ricushpa asinajuchunmi, jatun mandajcunapaj ñaupajpi churasha.

18Ninanda charijyangapa munashpa, jatun na alicunata rurashpami,

cambajlla shicanyachishca huasitaca yangapi churarcangui.

Chaimandami, cambaj chaupipica ninata japichircani.

Chai ninami, candaca tucuchirca.

Cai pachapica, tucuicuna ricujtami candaca uchufatashna shitamurcani.

19Chaimandami, canda tucui rijsij gentecunaca, ninanda manllarinajunga.

Canga, tucuicuna manllarishpa ricujtami, cutinga na jataringapa llaquichi tucungui’ nishpa huacangui” nihuarcami.

Sidón shuti pueblota llaquichinata villashcamanda

20Mandaj Diosca cashnami nihuarca:

21“Huañuna aichayuj runa, Sidón shuti puebloman ricushpa, chai pueblota llaquichinata villangui.

22Paitaca cashna ningui:

Mandaj Jatun Diosca, cashnami nin:

‘Sidón shuti pueblolla, Ñucami, canhuanga fiñarishca cani.

Canda llaquichishca jipami, Ñucaca, cambaj chaupipi jatunyachi tucusha.

Chashna rurajpimi, Ñucataca, Mandaj Dios cajta yachanga.

Tucui na alicunata rurashcamanda llaquichijpimi, Ñucataca jucha illaj cajta yachanga.

23Millai ungüicunata, chai puebloman cachajpimi, ñangunapipash, huañushca sirinajunga.

Chai pueblo causajcunaca, espadahuan huañuchi tucushcami, caipi chaipi sirinajunga.

Shina rurajta ricushpami Ñucataca, Mandaj Dios cajta yachanajunga.

24Sidón puebloca, Israelcunataca, cutinga na ninanda llaquichingachu.

Shinallata, muyundipi tiyaj llactacunapash imatapash na rurai ushangachu.

Chaimandami Ñucataca, Mandaj Dios cajta yachanajunga’ ninmi ningui” nihuarcami.

25Mandaj Jatun Diosca, cashnatapashmi nirca: “Shuj gentecunapaj chaupicunapi, caipi chaipi causanajuj Israelcunata tandachimushpami, chai llactacunapi causajcunapaj ñavipica, jucha illaj ricurisha. Israelcunaca, paicunapaj llactapimi causanajunga. Chai llactataca, Ñucapajta ruraj Jacobmanmi cararcani.

26Chai llactapimi imatapash na manllashpa causanajunga. Chaipica, huasicunata shayachishpa, uva yuracunata tarpushpami, cungashca causanajunga. Paicunapaj muyundipi causanajuj, paicuna imatalla charishcacunata quichushpa apaj runacunata Ñuca llaquichijpimi, chashna causanajunga. Chaita ricushpami Ñucataca, paicunata Mandaj Taita Dios cajta yachanajunga” nircami.