JOEL 3 - Quichua Imbabura 2016

Llactacunataca, Mandaj Diosmi llaquichinga

1Chai punllacunapi, chai huatacunapica,

Judá llactamanda, Jerusalenmanda prezu apai tucushcacunatami tigrachimusha.

2Tucui shuj llactacunapi causajcunata tandachishpami,

Josafat shuti pugru pambaman cachasha.

Chaipimi, Ñuca agllashcacunata llaquichijcunataca, Ñucapash llaquichisha.

Paicunami, Ñucapajlla cachun agllashca Israelcunataca,

shuj llactacunaman caiman chaiman cachashpa,

Ñuca llactataca chaupirinajurca.

3Ñuca agllashcacunataca, pipaj urmajta ricungapa rurashpami, caishuj chaishuj chaupirinajurca.

Ñuca agllashcacunapaj churicunataca, culquimanda huainayaj huarmicunaman cungapami jatunajurca.

Ushicunataca, vinomandalla jatushpami ufianajurca.

4Shinallata Tiro, Sidón pueblocunapi, tucui Filistea llactapi causajcunalla,

cangunahuanga ¿imatata ricunata charini?

¿Cangunaca, Ñuca imashna llaquichishcashna, Ñucatapash llaquichingapachu munanguichi?

Chashna rurajpica, canguna japinatallatami ñapash cachamusha.

5Cangunaca, Ñuca culquita, curita, juyailla Ñuca charishcacunata quichushpami,

cangunapaj dioscunapaj huasicunaman aparcanguichi.

6Cangunaca, Judá llactapi causajcunapaj, Jerusalenbi causajcunapaj churicunataca,

paicunapaj llactamanda caruman cachangapami, griegocunapaj miraicunaman jaturcanguichi.

7Paicunataca maiman jatushpa cachashcatapash tigrachimushallami.

Chai jipami, canguna japinataca cangunapaj jahuapillata cachamusha.

8Cangunapaj churicunata, ushicunataca, Judá llactapi causajcunamanmi jatusha.

Paicunami, caru llactapi causanajuj sabeo runacunaman jatushpa cachanajunga.

Mandaj Dios Ñucami chashna villani.

9Caitaca, tucui llactapuracunapi villaichiyari.

Macanajui tiyanatapash villaichiyari.

Ninan shinlli runacunapash alichirishcalla cachun villaichiyari.

Macanajuj runacunapash, caiman shamuichiyari.

10Cangunapaj azadongunataca, espadata ruraichiyari.

Hocescunataca, lanzacunata ruraichiyari.

Ushaita na charijcunapash: ‘Ushaita charinimi’ nishpa caparichiyari.

11Quimiria llactacunapi causajcuna, tucuicuna tandanajushpa shamuichiyari” nijunmi.

Mandaj Dioslla, ninan shinlli cambaj runacunata paicunapajman cachamupayari.

12Tucui llactacunapi causajcuna, rijcharichiyari.

Josafat shuti pugru pambaman vichai richiyari.

Chaipimi, muyundi llactacunapi causajcuna imata rurashcataca tapuchingapa tiyarisha.

13Granocunaca ñami fucushca, chaitaca hoceshuan cuchujunshna tandachipaichi.

Uvacunata cutana pushtupi, uvacuna jundajshnami, paicuna na alita rurashcacunaca, ashtacapacha mirashca.

14Imata rurashcatapash tapuchina pugru pambapica, ashtaca llactacunami tandanajurca.

Paicuna imata rurashcatapash tapuchina pugru pambapi,

Mandaj Dios ricuchina punllami ña chayamujun.

15Chai punllapica indipash, lunapash yanayangami,

luzerocunapash na punchayachingachu.

Judá llactapi causajcunatami cacharichinga

16Mandaj Diosca, Sion shuti urcumandami león huacanshna caparinga.

Pai rimashcapash, Jerusalenmandami uyaringa.

Jahua pachapash, cai pachapash ninandami chujchunga.

Shina cajpipash, Pai agllashcacunaca, Mandaj Diospillami shuyanajunga.

Paica Israelcunataca, ninandami shinllinchinga.

17Taita Diosca: “Shina rurajpimi Ñucataca, cangunata Mandaj Taita Dios cajta rijsihuanguichi.

Ñucapajlla Sion urcupi causajujtami rijsihuanguichi.

Jerusalenbash, Ñucapajlla tucujpimi shuj gentecunaca, cutinga chaitaca na ashtahuan yalinajunga.

18Chai punllacunapimi, urcucunamandaca llullu vino talirijunga.

Lomacunamandaca, lechemi talirijunga.

Judá llactapi tiyaj tucui jatun larcacunataca, ashtaca yacumi calpajunga.

Mandaj Dios Ñucapaj huasimandapash, shuj pugyumanda yacu llujshishpami,

Sitim shuti pugru pambaman jicharinga.

19Egipto llactaca, tucuchi tucungami.

Edom llactapash, tucuilla tucuchijpimi jichushca pambaman tigranga.

Judá llactapi causajcunata na alicachishpa rimashcamanda,

ima na alitapash na rurajcunata huañuchishpa yahuarta jichashcamandami, chashna tucunga.

20Ashtahuangarin Judá llactaca, causaita causaicamanmi gentecunahuan junda canga.

Mirai mirai huahuacunami, Jerusalenbica causanajunga.

21Yahuarlla cajpi nara fichashcataca, Ñucami fichasha.

Mandaj Dios Ñucami, Sión urcupi causasha” nijunmi.