NEHEMÍAS 2 - Quichua Imbabura 2016

Artajerjes shuti runa, Nehemiasta Jerusalenman cachashcamanda

1Jatun mandaj Artajerjes shuti runaca, ishcai chunga huatatami mandajurca. Shina cajpimi, Nisán shuti quillapi, jatun mandaj ufiachun vinota copapi churashpa yalichijurcani. Paipaj ñaupajpi, ñuca llaquilla cajta ricushpami,

2jatun mandajca cashna nihuarca:

“¿Imashpata, canga na ungushca cashpapash, llaquilla cangui? Ashtahuangarin cambaj shungupimi, llaquita charingui yarin” nijpimi, ninanda manllarircani.

3Shinamandami jatun mandajtaca, cashna nircani:

“Jatun mandajlla, canga causaita causajupailla. ¿Imashpata na llaquilla cashayari? Ñuca ñaupa taitacunata pambashca pueblomari jichushca pambashna saquirishca. Chai pueblopaj jatun pungucunatapash, ninahuanmi tucuchishca” nircanimi.

4Shina nijpimi, jatun mandajca:

“¿Imatata rurachun munangui?” nihuarca.

Shina nijpimi ñucaca, jahua pachapi causajuj Taita Diosta mañarcani.

5Chai jipami jatun mandajtaca, cashna nircani:

“Can jatun mandajpaj yuyaipi ali cajpi, cambajta ruraj ñucapash cambaj ñaupajpi ali ricurishca cajpica, Judá llactapi punda ñuca taitacunata pambashca pueblota cutin alichigringapa cachahuai” nircani.

6(Jatun mandajpaj huarmipash, chaipillatami carca). Chaipimi jatun mandajca, cashna nihuarca:

“¿Mashna punllacunatashi chaipi cangui? ¿Ima punllashi tigramungui?” nircami.

Ima punlla tigramunata villajpimi, jatun mandajca alicachishpa cachahuarca.

7Jatun mandajtaca, caitapashmi nircani:

“Jatun mandajpaj yuyaipi ali cajpica, cashna rurapai: Judá llactaman ñuca rijujpi ama jarcachunga, jatun yacu chimbaman tiyaj llactacunapi mandajcunaman cungapa, cartacunata quilcashpa cachahuai.

8Shinallata, Diospaj huasipi tiyaj huasicunapi pungucunata, pueblopaj jatun pircacunata, ñuca causana huasita caspicunahuan rurangapapash caspicunata cuchun, can jatun mandajpaj quirucuna shayanajuj pambata ricuj Asaf shuti runaman shuj cartata cachahuai” nircanimi.

Mandaj Diospaj juyaj maquihuan ñucata yanapajpimi, jatun mandajca ñuca imatalla mañashcataca ari nihuarca.

9Chai jipami, jatun yacu chimbapi mandajcunapajman shamushpa, jatun mandaj quilcashpa cachashca cartacunata curcani. Jatun mandajca ñucahuanga, macanajuj runacunata mandajcunatapash, caballopi tiyarishca runacunatapashmi cachahuarca.

10Israelcunaman alita rurangapa maijan cashpapash shamushcata yachashpami, Horón shuti pueblomanda Sanbalat shuti runapash, jatun mandajpajta ruraj amonitapura Tobías runapash, ninandapacha fiñarirca.

Nehemiasca, Jerusalén pircacunata cutin shayachingapa, gentecunaman ali yuyaita cushcamanda

11Jerusalenman chayamushpa, quimsa punllata ña chaipi cashca jipami,

12ñucaca tuta jatarishpa, huaquin runacunandi rircani. Shina rishpapash, Jerusalenbi ñuca imata rurachun Taita Dios yarichishcataca, maijan runamambash na villarcanichu. Chaipica, caballopi tiyarishpa ñucahuan rijcunaca illarcami. Ñucallami caballopi tiyarishca carcani.

13Chai tutaca, Pugru pambaman llujshina punguta llujshishpami, Dragón shuti pugyumambash, Mapata llujchishpa shitana pungumambash rircani. Chaimandaca, Jerusalén pircacunatapash urmachishcata, pungucunatapash ninahuan tucuchishcatami ricurcani.

14Chai jipaca, Pugyuman llujshina pungumanmi yalircani. Shinallata, Jatun Mandajpaj yacuta alichina pushtumambashmi chayarcani. Ashtahuangarin, ñuca tiyarishca rijuj caballohuanga, maita yalitapash na usharcanichu.

15Yacu rijujta tuta vichai rishpami, muyundi jatun pircata ali ricurcani. Chaimanda muyushpa rishpami, Pugru pambaman llujshina pungutallata tigrashpa yaicurcani.

16Ashtahuangarin cati mandajcunaca, ñuca maiman rishcatapash, imata rurajujtapash na yacharcachu. Shinallata, Judá llacta runacunaman, sacerdotecunaman, alicachi tucushcacunaman, cati mandajcunaman, chaipi imatalla rurajcunamambash, na villarcanichu.

17Shinamandami cashna nircani:

“Jerusalenga jichushca pambashna tucushcamanda, pungucunatapash ninahuan tucuchishcamanda, ñucanchi jatun llaquipi cajtaca, cangunallata alimi ricunguichi. Shina cashcamandaca, shujcuna ama ashtahuan na alicachishpa rimanajuchunga, Jerusalén muyundi pircacunata alichingapa shamuichi” nircani.

18Chai jipami ñuca Taita Dios, Paipaj maquihuan ñucata imashna aliguta yanapashcatapash, jatun mandaj ñucahuan parlashca shimicunatapash villarcani. Shina villajpimi paicunaca:

“Alichi callaringapa, jatarishunchi” ninajurca.

Shinami, paicunapaj maquipash ashtahuan shinlli tucushpa, alita ruranajurca.

19Ashtahuangarin, Horón shuti pueblomanda Sanbalat shuti runapash, jatun mandajpajta ruraj amonitapura Tobías shuti runapash, árabe gentepura Gesem shuti runapash chaita uyashpami, ñucanchitaca yangapi churashpa asishpa cashna ninajurca:

“¿Imatata cangunaca ruranajunguichi? ¿Jatun mandajta na cazushpachu chashna ruranajunguichi?” ninajurca.

20Shina nijpimi, cashna nircani:

“Ñucanchitaca, jahua pachapi causaj Taita Diosmi tucuipi yanapanga. Shina cajpimi, Paipajta ruraj ñucanchica jatarishpa, cutin alichishun. Ashtahuangarin cangunaca, Jerusalenbica imata ruranatapash, imata japinatapash, imata yarinatapash, na charishpami causanguichi” nircani.