DEUTERONOMIO 29 - Quichua Imbabura 2016

Mandaj Diosca, Moab llactapimi Israelcunahuan cutin ari nirishca

1Mandaj Diosca, Moisesmanmi, Moab llactapi Israelcunahuan pactachingapa ari ninajuchun mandarca. Horeb urcupi ari ninajushca jahuami, cutin chashna ari ninajuchun mandarca.

2Moisesca, tucuilla Israelcunata cayashpami cashna nijurca:

“Egipto llactapi Faraondapash, paipajta rurajcunatapash, chai llactapi causajcunatapash, Mandaj Dios imatalla rurashcataca, cangunapaj ñavihuanmi ricurcanguichi.

3Ninan llaquicunata rurashpa, pipash na rurai ushanallacunata rurashpa, jatun manllarinacunata rurashpami ricuchirca.

4Chai tucui rurashcacunataca, uyaitapash ama uyachun, ricuitapash ama ricuchunmi, Mandaj Diosllata cangunapaj shungutaca shinlliyachishca.

5Cangunataca, chuscu chunga huatatami jichushca pambata pushamurcani. Chaicunapica, cangunapaj churajushcapash, chaquipi churajushcapash na maucayarcachu.

6Tandatapash na micushpa, vinotapash, sidratapash na ufiashpami purircanguichi. ‘Cangunata Mandaj Dios cajta yachachunmi, chashna pushamurcani’ nircami.

7Cai llactaman chayamujpica, Hesbón shuti pueblota jatun mandaj Sehón shuti runapash, Basán llactata jatun mandaj Og shuti runapash, ñucanchihuan macanajungapa llujshimujpimi, paicunataca tucuchircanchi.

8Paicunapaj llactacunata japishpami, Rubenbaj, Gadpaj ayllucunaman, Manasespaj chaupi aylluman curcanchi.

9Mandaj Dioshuan ari nirishcacuna ali llujshichunga, tucuitami aliguta pactachina canguichi. Chaicunata pactachishpallami tucuipi ali causanguichi.

10Cunanga, tucuillami cangunata Mandaj Taita Diospaj ñaupajpi canguichi. Cangunapaj ayllucunata mandajcunapash, cangunata mandaj ancianocunapash, shuj mandajcunapash, Israel jaricunapash caipimi canguichi.

11Shinallata, cangunapaj huahuacunapash, cangunapaj huarmicunapash caipimi canguichi. Shuj llactamanda shamushpa cangunahuan causajcunapash, yamdata tandachijcunapash, yacuta apajcunapash caipimi canguichi.

12Cangunata Mandaj Dioshuan ari nirishcata chasquishpa, chaipi imata nijujta tucuita pactachingapami caipi canguichi.

13Cangunapaj ñaupa taita Abramman, Isaacman, Jacobmanmi Taita Diosca tucuita pactachingapa ari nirca. Shinallatami, cunambash, Pai agllashca gentecuna cashpa, Taita Diospajlla causangapa ari ninajunguichi.

14Caicunata pactachinataca, na cangunahuanlla juramentushpa ari nijunichu.

15Ashtahuangarin, Mandaj Diospaj ñaupajpi cunanbi caipi cajcunahuambash, jipa miraicunahuambash pactachingapami ari ninajunchi.

16Egipto llactapi imashna causashcatapash, ñucanchi shamunajushpa llactacunapaj chaupicunata imashna yalimushcatapash, cangunallata alimi yachanguichi.

17Chai llactacunapi causajcuna na alita rurashpa causajtapash, caspita, rumita, culquita, curita paicunapaj dioscuna cachun rurashpa causajtapash ricurcanguichimi.

18Cangunapuramandara, jari cashpa, huarmi cashpa, shuj ayllumanda cashpa, maijan mirai ayllupuramanda cashpapash, ñucanchita Mandaj Diostara cunganman. Shina cungashpara, chai llactacunapi causajcunapaj dioscunata alicachingapa rishpa, cangunapurapi, jayaj venenoshna, jayaj ajenjo sapishna tiyanguichiman.

19Shina tiyashpaca, ninan llaquicuna japina cashcata uyashca jahuapash, paica alimi causani yashpami cashna nijunga: ‘Shinlli shungu cashpapash, machashpa yacunayaita yalichishpami ali causaita charini’ nijungami.

20Mandaj Diosca chashna na ali shunguta charij runataca napacha perdonangachu. Mandaj Diosca, Paipajlla causachun munashca cashcamandami, ninandapacha fiñarishpa, llaquichina shimicunata cai quilcashcapi nijushcata pactachishpa, paipaj shutitapash cai pachamanda anchuchinga.

21Mandaj Diosca, paicunata ninanda llaquichingapami Israel mirai ayllumandaca shicanyachinga. Imashna llaquichingapa ari nishcata quilcashcata pactachingapami chashna ruranga.

22Cangunapaj jipa mirai huahuacunapash, caru llactacunamanda shamushpa causajcunapash, ninan llaquicunata, huañuchij ungüicunata Mandaj Dios cachamushcata ricushpami cashna ninajunga:

23(Paicunapaj tucuilla llactaca, azufrehuan, cachihuanmi rupachi tucunga. Chaipica, imatallapash na tarpungachu, imapash na fucungachu, jihuallapash na viñangachu. Sodoma, Gomorra, Adma, Zeboim shuti pueblocunashnami tucunga. Chai pueblocunataca, Mandaj Diosmi ninandapacha fiñarishpa tucuchirca).

24Ashtahuangarin tucui llactacunapi causajcunapashmi cashna ninajunga: ‘Mandaj Diosca, ¿imashpashi cai llactataca cashna llaquichirca? Chashna ninanda fiñarishpa llaquichishcacuna ¿imatashi ricuchijun?’ ninajujpimi,

25cashna ninajunga: ‘Egipto llactamanda llujchimuj, paicunapaj ñaupa taitacunata Mandaj Taita Dioshuan pactachingapa ari nirishcata na pactachishcamandami, chashna tucuchishca.

26Shinallata, na rijsishca, paicunaman imatapash na caraj, rurashcalla dioscunata alicachishpa, cungurishpa mañashpa, jatunyachishcamandami, chashna rurashca.

27Chaimandami Mandaj Diosca, cai llactapi causajcunataca ninandapacha fiñashca. Imashna llaquichinata quilcashca tiyajujta pactachingapami, chashna llaquichishca.

28Mandaj Diosca ninanda fiñarishpami, napacha ricunayachishpa, Pai carashca llactamandaca, sapimanda pilashpa shitajshna shuj llactaman calpachishca. Chaitami cunanga ricunajunguichi’ ninajungami.

29Imapash na yachanallacunataca, ñucanchita Mandaj Taita Diosllami yachan. Ashtahuangarin, yachai ushanalla mandashca shimicunaca, ñucanchipash, ñucanchipaj mirai huahuacunapash pactachishpa causachun cushcami.