1 SAMUEL 8 - Quichua Imbabura 2016

Jatun mandaj tiyachun, Israelcuna mañashcamanda

1Samuelca, ña rucugu cashpami, Israelcunapaj juezcuna tiyachun, paipaj churicunata churarca.

2Paipaj punda churica, Joel, jipa churica, Abiasmi carca. Paicunami, Beerseba pueblopica juezcuna carca.

3Ashtahuangarin chai churicunaca, na paicunapaj taitashnalla aliguta causanajurcachu. Paicunaca, charijyangapalla munashpami, culquita pacalla cujpi japishpa, alita ruranataca, na alita ruranajurca.

4Shinamandami, Israelcunata mandaj rucucunaca, tucuilla tandanajushpa Samuelhuan parlangapa, Ramá shuti puebloman shamunajurca.

5Paicunaca cashnami ninajurca: “Ricui, cambash ñami rucu cangui. Cambaj churicunapash, na can causashcashna aliguta causanajunllu. Shina cashcamanda, imashnami caishuj llactacuna jatun mandajta charin, chashnallata ñucanchita mandashpa pushachun, jatun mandajta churapai” ninajurcami.

6“Shuj jatun mandajta churai” nishpa mañajpimi, Samuelca ninanda llaquirishpa, Mandaj Diosta mañarca.

7Chashna mañajpimi Mandaj Diosca, Samueltaca: “Gentecuna imata mañashcata uyashpa, tucuita rurailla. Paicunaca, na candaca yangapi churanajunchu, ashtahuangarin, Ñucatami yangapi churanajun. Paicunata na ashtahuan Ñuca mandachun munashpami, chashna ninajun.

8Paicunaca, Egiptomanda llujchimushca punllamandapacha, cunan punllacaman, Ñucata na cazushpami, rurashcalla dioscunatara catinajun. Candapash, chashnallatami yangapi churanajun.

9Cunanga, paicuna imata mañashcata rurailla. Ashtahuangarin shuj jatun mandaj yaicushpaca, paicunata imashna mandashpa charinatalla aligutapacha yarichishpa villangui” nijurcami.

10Samuelca, “jatun mandajta churai” nishpa mañanajuj gentecunamanmi, Mandaj Dios imata nishcataca, tucuita villajurca.

11Paica cashnami nijurca: “Cangunata jatun mandajca, cashnami ruranga: Cangunapaj churicunata apashpami, macanajuna carretacunapi, caballocunapi rinajuj gentecunata ñaupashpa calpanajuchun churanga.

12Shujcunataca, macanajunata yachaj huaranga runacunata mandachun, caishujcunataca, macanajunata yachaj picha chunga runacunata mandachunmi churanga. Shinallata huaquingunataca, paipaj alpacunapi yapunajuchun, granocunata tandachinajuchunmi churanga. Shujcunataca, macanajunacunata ruranajuchun, carretacunapaj tucui imacunata ruranajuchunmi churanga.

13Shinallata, cangunapaj ushicunatapash apashpami, huaquingunataca, mishquilla ashnajuncunata ruranajuchun, yanunajuchun, tandata ruranajuchun churanga.

14Shinallata, uva chagracunata, ali olivo yuracuna shayanajuj, ashtahuan ali alpacunata quichushpami, paipajta rurajcunaman cunga.

15Cangunapaj granocunatapash, uvacunatapash, chungamanda shujta japishpami, pai churashca mandajcunaman, paipajta rurajcunaman cunga.

16Cangunaman ruraj jaricunatapash, huarmicunatapash, chairalla viñai ali huambracunatapash, ali burrucunatapashmi apashpa, Paiman tucuita rurachun churanga.

17Cangunapaj llamacunatapash, chungamanda shujtami japinga. Cangunapash, paipajta rurajcuna tucushpami causanguichi.

18Cangunallata agllashca, jatun mandaj llaquichijui punllacunapica, caparishpa mañanajujpipash, Mandaj Diosca napacha uyangachu” nijurcami.

19Ashtahuangarin gentecunaca, Samuel chashna nijujta na uyanayachishpami: “Ima cachumbash, jatun mandajta charingapami munanchi.

20Ñucanchipash, tucui llactacunapi causajcunashna cangapami munanchi. Ñucanchita jatun mandajmi, ñucanchitaca mandanga. Paimi, jatun macanajuicunapipash, ñucanchita ñaupashpa ringa” ninajurcami.

21Gentecuna imatalla nishcatami Samuelca, Mandaj Diosman villangapa rirca.

22Shina villajpimi Mandaj Diosca, Samueltaca: “Paicuna nishcata uyashpa, jatun mandajta churailla” nirca. Shina nijpimi Samuelca, Israelcunataca: “Canguna causanajuj pueblocunaman tigraichilla” nishpa cacharca.