1Israelcuna chaimanda rishpaca, Jericó pueblo chimbapuraman chayashpami, Jordán yacu manñapi tiyaj, Moab llacta pambacunapi carpacunata shayachishpa causanajurca.
2Zipor shuti runapaj churi Balac shuti runaca, Israelcuna, amorreo gentecunata imatalla rurashcatami yachaj chayarca.
3Moab shuti llactapi causajcunaca, Israelcuna ashtaca cajta ricushpami, ninanda manllarishpa llaquirinajurca.
4Chashna cashpami Moab llactapi causajcunaca, Madián llactata mandajcunaman cashna ninajurca: “Uyaichi cai tucui gentecunaca, huagracuna jihuata micushpa lambijshnami ñucanchitaca tucuchinga” ninajurcami.
Chai punllacunapica, Zipor shuti runapaj churi Balac runami, Moab llactataca mandajurca.
5Paimi, Petor shuti pueblopi causajuj, Beor shuti runapaj churi Balaam runata cayachun cacharca. Petor puebloca jatun yacu manñapimi, chaica Moab llactamandaca carupipachami tiyajun. Chai llactamanmi, Balac runaca, Balaam runata cashna nishpa pushamugrichun cacharca: “Egiptomandami ashtaca gentecuna llujshimushpa, tucuilla cai llactacunapi jundamunajun. Paicunaca ñami ñuca chimbapura llactapi causanajun.
6Paicunaca, ñucanchita yali shinlli gentecuna cashcamanda, ninan llaquita apachun Diosta mañangapa shamupai. Can chaita rurajpillami, huañuchitapash, cai llactamanda llujchishpa cachaitapash ushapashun. Can bendiciapai nijpipash, na cashpaca, ninan llaquita apachun nijpipash chaica pactanapacha cajtapash yachapanimi nichunmi” cacharca.
7Shina nijpimi Moab llactata mandajcunapash, Madián llactata mandajcunapash, ninan llaquita apachun nishcamanda culquita cungapa apashpa rinajurca. Balaam runapajman chayashpaca, Balac runa imatalla nishcatami villanajurca.
8Shina villajpimi, Balaam runaca cashna nirca:
“Cunan tutaca, caipi pacaringuichilla. Mandaj Dios imatalla nishcatami cangunaman villasha” nircami.
Shina nijpimi Moab llactata mandajcunaca, Balaam runapaj huasipi pacarinajurca.
9Shinamandami Taita Diosca, Balaam runapajman shamushpa:
“¿Canhuan caipi tiyanajuj runacunaca, picunata?” nishpa tapurca.
10Shina nijpimi Balaam runaca, Taita Diostaca cashna nirca:
“Moab llactamanda Zipor shuti runapaj churi mandaj Balac runami, ñucata cashna nichun cachamushca:
11‘Egipto llactamanda cai tucui gentecunami caipi jundashpa causangapa shamushca. Paicuna ninan llaquita apachun nishpa mañapai’ nishpami shamushca. Shina rurajpi macanajuipi mishashpa, caicunamanda calpachi usharinga ningapami shamushca” nijurcami.
12Shina nijpimi Taita Diosca, Balaam runataca cashna nirca:
“Chai runacunahuanga na rinachu cangui. Chai gentecuna ninan llaquita apachunga na mañanachu cangui. Paicunaca ñuca bendiciashca gentecunami” nircami.
13Shina nijpimi Balaam runaca tutamandata jatarishpa, Balac runa cachamushca mandajcunataca cashna nirca:
“Mandaj Diosca, ñucataca cangunahuan richunga napacha saquihuanllu. Cangunapaj llactaman tigraichilla” nircami.
14Shina nijpimi, Moab llactata mandajcuna, Balac runapajman tigrashpaca:
“Balaam runaca, ñucanchihuan shamungapaca na munarcachu” ninajurca.
15Balac runaca, cutinmi cati mandajcunata agllashpa cacharca.
16Paicunapash Balaam runapajman rishpami cashna ninajurca:
“Zipor shuti runapaj churi Balac runaca, cashnami nijun: ‘Ñuca llactamanga shamunapachami capangui.
17Na llullashpami cashna nini. Candaca ninandami alicachisha. Can mashnata mañashcatapash cupashallami. Cunanga paicuna ninan llaquita apachun Diosta mañangapa shamupailla’ nijunmi” ninajurcami.
18Shina nijpimi Balaam runaca, Balac runapajta rurajcunataca cashna nijurca:
“Balac runapaj huasi ucu junda curita, culquita cuna cajpipash na ri ushapanichu. Ñucata Mandaj Taita Dios ama ruranguichu nishcataca, ashalla cajpipash, ashtaca cajpipash, na rurai ushapanichu.
19Cunanga, ñucata Mandaj Dios cutin ima nijtapash yachangapami, cunan tutaca caipi pacarina capanguichi” nijurcami.
20Mandaj Diosca chai tutami, Balaam runapajman shamushpa cashna nirca:
“Chai runacuna canda pushangapa shamushca cajpica, jatarishpa paicunahuan rilla. Shina cajpipash, Ñuca imata rurai nishcatalla rurangui” nircami.
Diospaj angelmandapash, Balaam runapaj burrumandapash21Tutamandata jatarishpami, Balaam runaca, paipaj burrupi tiyarinata churashpa, Moab llactata mandajcunahuan rijurca.
22Pai rijujpimi, Mandaj Diosca ninanda fiñarishpa, ñambi jarcachun shuj angelta cachamurca. Paica, paipaj burrupi tiyarishpami, paipajta ruraj ishcai runacunandi rinajurca.
23Balaam runa tiyarishca rijuj burruca, Mandaj Diospaj angeltaca, espadata chaririyaj chaupi ñambi shayajujtami ricurca. Chaita ricushpami burruca, ñanmanda llujshishpa pambata rirca. Shinamandami Balaam runaca, ñanman tigrachingapa burrutaca astijurca.
24Ashtahuangarin, Mandaj Diospaj angelca, ishcandi manñaman pircashca, uva chagra chaupita rina chaqui ñambimi shayarirca.
25Mandaj Diospaj angelta ricushpami, burruca, pircaman quimirishpa, Balaam runapaj chaquita pircapi llapirca. Chaimandami Balaam runaca, ashtahuan asti callarirca.
26Mandaj Diospaj angelca ashtahuan ñaupajman rishpami, lluquimambash, alimambash, maitapash na yalinallapi shayarirca.
27Mandaj Diospaj angelta ricushpami burruca, na yali ushashpa Balaam runa tiyajujpillata alpapi siririrca. Chaimandami Balaam runaca, ninanda fiñarishpa caspihuan huajtajurca.
28Chaipimi Mandaj Dios ushaita cujpi chai burruca, Balaam runata:
“Quimsacaman ñucata can macachunga, ¿ima na alitata rurarcani?” nirca.
29Shina nijpi Balaam runaca, burruta rimashpaca:
“¿Imashpata ñucata yangapi churangui? ¡Espadata ñuca maquipi charijushpaca, cunanllatami candaca huañuchiman!” nirca.
30Shina nijpimi burruca, Balaam runataca cashna nirca:
“¿Nachu cambaj burru cani? Ñucata chari callarishca punllamandapacha cunangamanmi ñucapi tiyarishpa purishcangui. ¿Ima punllallapash candaca chashna rurashcanichu?” nirca.
Shina nijpimi Balaam runaca:
“Na chashna cashcanguichu” nirca.
31Balaam runapaj ñavita, Mandaj Dios pascajpimi, Mandaj Diospaj angeltaca, espadata chaririyaj chaupi ñambi shayajujta ricurca. Chashna ricushpami, Balaam runaca cungurishpa, alpaman chayajta cumurirca.
32Chaipimi Mandaj Diospaj angelca cashna nirca:
“Cambaj burrutaca, ¿imashpata quimsacaman macangui? Canga, ñuca ñaupajpi jatun na alita rurangapa rijujpimi, jarcangapa shamurcani.
33Ñucata ricushpami, ñuca ñaupajmandaca quimsacaman burruca anchurirca. Burru na anchurijpica, canda huañuchishpami, paitaca causajta saquiman carcani” nircami.
34Shina nijpimi Balaam runaca, Mandaj Diospaj angeltaca cashna nirca:
“Cai ñambi shayarishpa, ñuca ñaupajpi can jarcajujtaca, na yachaimandami juchata rurapashcani. Ashtahuangarin cunanga, ñuca chaiman rina na ali cajpica tigrapashallami” nircami.
35Shina nijpimi Mandaj Diospaj angelca, Balaam runataca cashna nirca:
“Chai runacunahuan rilla. Shina cajpipash, ñuca imata rimai nishcatallami rimana cangui” nircami.
Shina nijpimi Balaam runaca, Balac runa cachashca mandajcunahuan rirca.
36“Balaam runaca ñami chayamujun” nijta uyashpami Balac runaca, Moab llactapi tiyaj shuj pueblopi tuparingapa llujshirca. Chai puebloca, Moab gentecuna causanajuj, Arnón shuti yacu manñapimi carca. Chai yacuca, Moab llacta manñatami yalijun.
37Chaipi tuparishpami Balac runaca, Balaam runataca cashna nirca:
“Ñuca cayachun cachajpica ¿imashpata na shamurcangui? ¿Nachu ñuca ninanda alicachishpa, chasqui ushanataca yacharcangui?” nircami.
38Shina nijpimi Balaam runaca, Balac runataca cashna nirca:
“Ñami cambajman chayamurcani. Ashtahuangarin, cambaj munashcataca na rimai ushashachu. Ñuca shimihuanga, Taita Dios imata rimachun nishcatallami rimai ushasha” nircami.
39Chai jipami Balaam runapash, Balac runapash, Quiriat-huzot shuti puebloman rinajurca.
40Chai pueblopimi, Balac runaca huagracunata, llamacunata huañuchinajuchun mandarca. Shina huañuchishpami Balaam runamambash, pushangapa rishca mandajcunamambash carachun cacharca.
Balaam runa Israelcunata bendiciashcamanda41Chai cayandi punllami Balac runaca, Bamot-baal shuti urcu jahuaman, Balaam runata vichai pusharca. Chai urcu jahuamandami, Israel gentecuna tiyanajuj carpacunata ricurca.
Who We AreWhat We EelieveWhat We Do
2025 by iamachristian.org,Inc All rights reserved.
