JEREMÍAS 46 - Quichua Imbabura 2016

Egipto llactata llaquichinata villashcamanda

1Shuj llactacunata imashna llaquichinatami, Mandaj Diosca Jeremiasman villashca.

2Josías runapaj churi, Joacim runa, Judá llactata chuscu huatata mandajujpimi, Egipto llactata mandaj Necao shuti Faraón runapaj macanajuj runacuna, Éufrates yacu manñapi tiyajuj Carquemis shuti pueblopi cajpi, Babilonia llactata jatun mandaj Nabucodonosor runaca, macanajushpa misharca. Chaipimi, Egipto llactata llaquichinataca, cashna nishpa villarca:

3“Macanajuiman tucuita alichirishpa shamuichi.

4Caballopi tiyarinacunata alichishpa tiyarichi.

Macanajungapa churajunata churajuichi.

Tucsishpa huañuchinacunata apashpa shamuichi.

Jirru churajunata churajuichi.

5¿Imashpata manllashpa, huashaman tigranajunguichi?

Paicunapaj ali macanajuj runacunaca, mishai tucurcami.

Tigrashpapash na ricushpami maitapash calpanajurca.

Caimanda, chaimandami cangunata manllachijcunaca shamunga ninmi, Mandaj Diosca.

6Ninanda calpaj runapash, na calpangachu.

Ninan shinlli runapash, ama manllashpa calpachun.

Éufrates yacu manñapimi mishai tucurca.

7¿Pita jatun yacu jatarinshna catimujun?

¿Picunata yacu cuyunshna shamunajun?

8Egipto llacta runacunaca, jatun yacushnami jundamunajun.

Ashtaca yacushnami shamunajun.

Paicunaca: ‘Ñucanchi vichai rishpaca, tucui llactapimi jundashun.

Pueblotapash, chaipi causajcunatapash tucuillami tucuchishun’ ninajunmi.

9Caballopi tiyarishpa macanajujcuna, ñaupaichi.

Carretapi tiyarishpa macanajujcuna catichi.

Alipacha macanajuj runacunapash, catichi.

Etiopía llactamanda, Libia llactamanda macanajuj runacunapash, jarcarina jirrocunata apashpa shamuichi.

Lud llactamanda runacunapash, arcocunata apashpa shamuichi.

10Chai punllapica, tucuita Mandaj Diospaj punllami canga.

Paita fiñajcunata, ninanda llaquichina punllami canga.

Espadahuanmi, tucuicunata huañuchinga.

Mandaj Diosman animalta cushpa huañuchishcashnami,

Éufrates yacu manña jahuaman causanajuj gentecunataca huañuchishca canga.

11Chairalla viñajuj cuitsacunashna, Egiptopi causajcunaca,

Galaad shuti llactaman vichai rishpa, jambita apagrichiyari.

Ima jambita ufiajushpapash, napacha ali tucunguichu.

12Canda llaquichijujtaca, shuj llactacunapash ñami yachan.

Can caparishcapash, cai pachapica, tucuipimi uyarirca.

Ninan shinlli macanajuj runacunapash, paipura huajtarishpami urmanajurca” nishpami villajurca.

13Mandaj Diosca, paipaj profeta Jeremiastami villachun cachamurca. Paimi, Babilonia llactata jatun mandaj Nabucodonosor runa shamushpa, Egipto llactata imashna tucuchinata villashpa cashna nijurca:

14“Egipto llactapi villaichi. Migdol Menfis, Tafnes shuti pueblocunapipash cashna nishpa villaichi:

‘Alichirishpa shayarichi. Can causajuj pueblopi gentecunataca espadahuanmi tucuchinga’ nishpa villaichi.

15¿Imashpata cangunaca ninan shinlli cashpapash tucurishcanguichi?

Mandaj Dios, Paipaj Ninan Ushaihuan shamujpimi, na shinlli shayari usharcanguichi.

16Ashtacapachami urmashca sirinajurca.

Jahuan jahuan urmashpami, chashna ninajurca:

‘Jatarishpa ñucanchi huacharishca llactaman tigrashpa jacuchi,

jatun macanajuimanda pacajushpa calpashunchi’ ninajurcami.

17Chaipimi cashna nishpa caparinajurca:

‘Egipto llactata jatun mandaj Faraonga mishai tucushcami.

Pai tucuita mishana ushaipash tucurishcami’ nishpami caparinajurca.

18Jatun Mandaj Dios Ñucami causaita causajuni.

Ñucaca, Tucuita Mandaj Diosmi cani.

Tucui urcucunata yali Tabor shuti urcushnami cani.

Mama cucha manñapi tiyajuj, Carmelo shuti urcushnami cani.

19Egiptopi causajcunaca, tucuillami, prezu apajpi ringapa alichirina canguichi.

Menfis shuti puebloca, shitashca pambami saquiringa.

Chaipica shujllapash na causangachu.

20Egipto llactaca, juyailla huarmi shicushnami.

Shina cajpipash, janaj llactaman causajcunami tucuchingapa shamunajun.

21Culquipaj macanajuj runacunapash, virayashca shicucunashnami causanajurca.

Paicunaca, na tigrashpa ricushpami calparca.

Paicunata llaquichina punllacuna, huatacuna chayajpimi, chashna calpanajurca.

22Egiptopi causajcunaca, culebracuna huacashpa rijshnami calpanajunga.

Paicunata fiñajcunaca, yamdata chijtaj runacunashnami hachacunahuan shamunajunga.

23Mandaj Diosca, cashnatapashmi nin:

‘Ninanda sachayashca quirucunatapash, cuchushpa tucuchinga.

Paita fiñajcunaca, langosta jurucunashna, pipash na yupai ushanallami canga’.

24Egiptopi causajcunaca, ninandami pingai tucunga.

Janaj llactamanda shamuj gentecunapaj maquipimi churai tucunga” ninmi.

25Tucuita mandaj, Israelcunapaj Taita Diosca, cashnami nin: “Ñucami Tebas shuti pueblopi tiyajuj Amón shuti rurashcalla diostaca tucuchigrini. Faraondapash, pai mandajuj Egipto llactatapash, paicunapaj rurashcalla dioscunatapash, chaipi mandajcunatapash tucuillami tucuchigrini. Faraonda, alicachishpa causajcunataca tucuillami tucuchisha.

26Paicunata huañuchijcunapaj maquipimi churasha. Babilonia llactata jatun mandaj Nabucodonosor runapaj maquipi, paipajta rurajcunapaj maquipimi churasha. Shina cashpapash, Egiptopi llactapica, pundashnallatami gentecunaca cutin chaipi causanajunga” ninmi Mandaj Diosca.

27“Ñucapajta ruraj, Jacobmanda mirai Israelcunaca, na manllanachu canguichi.

Ñucami cangunataca, caru llactacunapi cajpipash cacharichishpa tigrachimusha.

Cangunapaj miraicunatapash, prezu cashcamandaca tigrachimushami.

Jacobpaj miraicuna tigramushpaca cushijushpami causanga.

Paicunaca, ali causaitami charinga.

Paicunataca, pipash na manllachingachu.

28Ñucapajta ruraj, Jacobpaj miraicunaca, na manllanachu canguichi.

Ñucaca cangunahuanmi pacta cani.

Ñuca calpachijpi rishpa, causajushca shuj llactacunataca, Ñucallatami tucuchisha.

Shina cashpapash cangunataca na tucuilla tucuchishachu.

Cangunataca, llaquichinatallami llaquichisha.

Shina cashpapash, llaquichina cashcataca pactachishapachami” ninmi nishpa villachunmi Mandaj Diosca mandarca.