2 REYES 21 - Quichua Imbabura 2016

Judá llactata Manasés mandajushcamanda(2 Crón. 33:1-20)

1Manasés shuti runaca, chunga ishcai huatata charishpa mandai callarishpami, picha chunga picha huatata Jerusalenbi mandajurca. Paipaj mamaca, Hepsiba shutimi carca.

2Paica, Israelcunapaj ñaupajmanda, Mandaj Diosllata llujchishpa cachashca gentecunashnami, Mandaj Diospaj ñaupajpica na alitalla rurashpa causajurca.

3Lomacunapi altarcunata paipaj taita Ezequías tucuchishcataca, paimi cutin shayachirca. Shinallata Baal shuti diosmambash, altarcunata rurashpami, Israel llactata jatun mandaj Acab runa, Asera shuti huarmi diosman rijchajta rurashcashna rurarca. Shinallata, jahua pachapi tiyaj luzerocunata, ninanda alicachishpami, chaicunatara mañashpa causajurca.

4Shinallata, Mandaj Diospaj huasipipashmi altarcunata rurachirca. Chai huasitami, Mandaj Diosca: “Jerusalenbi tiyajuj huasipimi, ñuca shutita churasha” nishca carca.

5Shinallata, Mandaj Diospaj huasi pungupimi, jahua pachapi tiyaj luzerocunaman altarcunata rurachirca.

6Manasés runaca, paipaj churitapash rurashcalla dioscunaman carashpami rupachirca. Ima tucunata yachajcunata, brujucunata, huañushca almacunata cayashpa villajcunata cazuchunmi churarca. Chashna na alicunata rurashpami, Mandaj Diospaj ñaupajpica fiñachijurca.

7Manasés runaca, Asera shuti huarmi diosman rijchajta rurashpami, Diospaj huasipi churarca. Chai huasimandami Mandaj Diosca, Davidtapash, paipaj churi Salomondapash cashna nishca carca: “Jerusalén pueblotaca, tucui Israel ayllupuramandami agllarcani. Cai huasipimi Ñuca Shutitaca, causaita causachun churasha.

8Ñuca mandashcatapash, Ñucapajta ruraj Moisés mandashcatapash, cazushpa pactachinami canguichi. Chashna causajpillami, cangunapaj ñaupa taita Israelcunapaj llactamandaca, napacha cutinga llujchishpa cachasha” nishcami carca.

9Ashtahuangarin paicunaca, na cazunajurcachu. Manasesca, Israelcunapaj ñaupajpi Mandaj Dios tucuchishca, shuj llactamanda gentecunatapash yali na alita rurana yuyaitami curca.

10Chaimandami Mandaj Diosca, profetacunata cachashpa cashna nirca:

11“Judá llactata jatun mandaj Manasesca, napacha alita rurashpami Amorreo gentecuna na alita rurashcatapash yali na alita rurachirca. Shinallata rurashcalla dioscunahuanmi, Judá llactapi causajcunataca juchata rurachishca.

12Chaimandami, Israelcunata Mandaj Taita Diosca cashna nin: Cunanga Jerusalenbi, Judá llactapi causajcunamanga, jatun llaquitami cachamugrini. Chai llaquita uyashpaca, ninanda manllashpami, na uyangapapash munanga.

13Jerusalenbi causajcunataca, Samaria pueblota llaquichishcashnallata, Acab runapaj huasi ucupurata tucuchishcashnallatami tucuchisha. Jerusalendaca, platota maillashpa urai singanshnami, imapash illajta saquisha.

14Ñucapaj cachun agllashca gentecuna saquirishcataca, paicunata fiñaj runacunapaj maquipimi churasha. Paicuna, imatalla charishcatapash, tucuillata quichushpa apachunmi saquisha.

15Paicunapaj ñaupa taitacunata Egiptomanda llujshimushca punllamanda cunangamanmi, na alita rurashpa, ninanda fiñachihuan. Chaimandami chashna ruragrini” nishpa villachunmi cacharca.

16Judá llacta gentecunata juchata rurachishca jahuapash, Manases runaca, alipash causajcunata huañuchishpami, Jerusalenbica, shuj manñamanda, caishuj manñacaman yahuarta jichachirca. Mandaj Diospaj ñaupajpimi, chashna juchacunata rurarca.

17Manasés runa imatalla rurashcapash, tucui imatalla pai rurashcapash, juchata rurashcapash ¿nachu Judá llactata jatun mandajcuna imatalla rurashcata quilcashca libropi tiyajun?

18Manasés runa huañushpa, paipaj ñaupa taitacunahuan tandanajungapa rijpica, paipaj huasipi, Uza shuti huertapimi pambarca. Paipaj randica, Amón shuti paipaj churimi mandajurca.

Amón runa mandajushcamanda(2 Crón. 33:21-25)

19Amón shuti runaca, ishcai chunga ishcai huatata charishpa, mandai callarishpami, Judá llactataca ishcai huatata Jerusalenbi mandajurca. Paipaj mamaca, Jotba shuti pueblomanda, Haruz shuti runapaj ushi Mesulemet shutimi carca.

20Paipash Mandaj Diospaj ñaupajpica, paipaj taita Manasés runashnami na alitalla rurajurca.

21Paipaj taitaca, rurashcalla dioscunata alicachishpa mañashpa causashcashnami, paipash chashnallata rurashpa causajurca.

22Paipaj ñaupa taitacunapaj Mandaj Taita Diosta saquishpami, Mandaj Diospaj ñanmandaca anchurirca.

23Jatun mandaj Amón shuti runataca, paipajta ruraj runacuna fiñashpami, pacalla rimarishpa, paipaj huasipillata huañuchirca.

24Shinamandami, chai llactapi causajcunaca, pacalla rimarishpa jatun mandaj Amón runata huañuchijcunataca, tucuillata huañuchirca. Chai llactapica, Amón runapaj randi mandachunmi paipaj churi Josías runata, jatun mandaj cachun churanajurca.

25Amón runa imatalla rurashcapash, ¿nachu, Judá llactata jatun mandajcuna imatalla rurashcata quilcashca libropimi tiyajun?

26Amón shuti runataca, paita pambana utujupillatami, Uza shuti huertapi pambarca. Paipaj randica, Josías shuti paipaj churimi mandajurca.