Psalms 28 - Quichua Imbabura 2016

Diosta mañashcata uyajpi cushijushcamandaDavid rurashca Salmomi.

1Mandaj Dioslla,

Candami caparishpa mañapasha.

Jatun rumishna ñuca Dioslla.

Ñuca mañajujta uyapayari.

Ñucamanda, Can anchurijpica,

huañushcata pambana utujuman urai rijshnami saquirisha.

2Caparishpa, ñuca mañajujtaca uyahuayari.

Cambajlla shicanyachishca huasipi,

maquita vichai churashpa mañajujtaca uyahuayari.

3Ñucataca, na alita ruraj runacunahuanga ama tandachihuaichu.

Paicunaca, jatun na alita rurajcunami.

Paicunaca, alitashnalla tucuita rimanajushpapash,

paicunacapaj shungupica, na alitamari yarinajun.

4Paicuna na alita rurashcamandaca, chashnallata cupanguilla.

Paicuna na alita rurashcashnallata randi tigrachishpa llaquichipanguilla.

5Paicunaca, Mandaj Dios alita rurashcacunataca na yarishpami causanajurca.

Cambaj ninan ushaihuan imatalla rurashcacunatapash, na yarinajurcachu.

Chaimandami paicunata urmachishpaca, cutinga na shayachinga.

6Mandaj Diosca, ninanda alicachi tucushca cachun.

Paimi, ñuca mañashcataca uyarca.

7Mandaj Diosca, ñucata tucuipi shinllichishpa huacaichij Diosmi.

Ñuca shungupica, Paitalla yariashpa causajpimi yanapahuarca.

Chaimandami, ñuca shungupica ninanda cushijurcani.

Ñuca shimihuan candashpami, Paitaca alicachisha.

8Mandaj Diosca, Pai agllashcacunataca, ninandami shinllichin.

Pai agllashca Jatun mandajtaca, huacaichishpami quishpichin.

9Can agllashca gentecunataca quishpichishpa, tucuipi bendiciapailla.

Paicunapaj tucui causaipi michishpa, yanapashpa pushapailla.