JOSUÉ 9 - Quichua Imbabura 2016

Gabaón llacta runacuna umachishcamanda

1Heteo, amorreo, cananeo, ferezeo, heveo, jebuseo gentecunata tucuilla mandajcunaca, tucui imatalla Israelcuna rurashcatami yacharca. Tucui chai gentecunaca, Jordán yacu chimba urcucunapi, pugru pambacunapi, Líbano shuti llacta chimbapura Mama cucha manñacunapimi causanajurca.

2Chai tucui gentecunami, Josuehuan, Israelcunahuan macanajungapa tandanajurca.

3Ashtahuangarin, Gabaón shuti pueblopi causajcunaca, Jericó pueblopi causajcunatapash, Hai shuti pueblopi causajcunatapash, Josué imatalla rurashcatami yacharca.

4Chaimandami paicunaca, umachinata ali yachajcuna cashpa, jatun mandajpaj randi rimajcunashnalla tucushpa, Josuetaca umachinata yarinajurca. Paicunaca, mauca costalcunata burrucunapaj jahuapi churashpami, vinotapash, sirashca mauca caracunapi churashpa apashpa rinajurca.

5Shinallata, chaquipi churajunatapash, sirashpa, mauca maucacunata churajushpami rinajurca. Ñambi micuna tandatapash, chaquichishpa mujuzuyashcatami apanajurca.

6Gilgal puebloman chayanallapi carpacunata shayachishca tiyanajujpi shamushpami Josuetapash, Israelcunatapash cashna ninajurca:

“Ñucanchica, caru caru llactamandami shamupanchi. Cunanga, ñucanchihuan imatalla pactachingapa ari nipaichiyari” ninajurcami.

7Shina ninajujpimi Israelcunaca, heveo llactamanda gentecunataca:

“Ñucanchi quimiriallapi causajcunara canguichiman. ¿Imashnata cangunahuanga ari nishunyari?” ninajurca.

8Shina tapujpimi Josuetaca:

“Ñucanchica, cambajta rurajcuna cangapami munapanchi” nijpi, Josueca:

“Cangunaca, ¿picunata canguichi, maimandata shamunguichi?” nishpa tapurca.

9Shina nijpimi, cashna ninajurca: “Cambajta rurajcunaca, caru caru llactamandami shamupanchi. Canda Mandaj Taita Diospaj shutica, tucuicuna rijsishca cashcata yachashpa, Egipto llactapi imatalla rurashcatapash yachashpami shamupanchi.

10Shinallata, Jordán yacu chimbaman causanajuj amorreo gentecunapaj ishcai jatun mandajcunata, tucui imatalla rurashcatapash uyaparcanchimi. Paicunaca, Hesbón shuti pueblopi jatun mandaj Sehón shuti runapash, Basán llactapi tiyaj Astarot shuti pueblopi jatun mandaj Og shuti runapashmi carca.

11Chaimandami ñucanchita mandaj ancianocunapash, ñucanchi llactapi tucui causajcunapash, cashna ninajurca: ‘Ñambi micungapa apashpa, tuparingapa richilla. Paicunapajman chayashpaca: Ñucanchica, cangunapajta rurajcunami canchi. Cunanga, ñucanchihuan imatalla pactachingapapash ari nipaichilla ninguichi’ nishpami cachamurca.

12Cangunata tuparingapa llujshimui punllapica, tandataca rupallatami, ñucanchi huasimandaca apamurcanchi. Ricui cunanga, ña chaquishpa mujuzushcamari capan.

13Shinallata vinotapash, mushuj caracunapimi jundachishpa apamurcanchi. Ricui, cunanga maucayashpami, ña liquirijun. Ñucanchi churajushcacunapash, chaquipi churajushcacunapash, mushujmi carca. Carumandapacha shamujpimi, chashna ña maucayashca” ninajurcami.

14Israelcunaca, Mandaj Diostaca na tapushpami, chai runacuna apamushca micunacunataca chasquinajurca.

15Chai jipami Josueca, paicunahuan tucuita pactachingapa ari nishpa, imatapash na manllashpa aliguta causanajuchun saquirca. Shinallata, tandanajushca Israelcunata mandajcunapashmi ari nishpa juramentunajurca.

16Chashna ari nishca quimsa punlla jipami, Israelcunaca, paicunapaj quimiriallapi causajcunallata cashcata yachaj chayarca.

17Chaimandami, Israelcuna mascangapa rishpaca, chai runacuna causanajuj pueblocunamanga quimsa punllallapi chayarca. Paicunapaj pueblocunaca: Gabaón, Cafira, Beerot, Quiriat-jearim shuticunami carca.

18Tandanajushca Israelcunata mandajcunallata, paicunata Mandaj Taita Diospaj shutipi juramentushca cashpami, chaipi causajcunataca na huañuchi usharca. Chaimandami tandanajushca tucuilla Israelcunaca, paicunata mandajcunataca huasha rimanajurca.

19Ashtahuangarin tucuilla cati mandajcuna tandanajushpami Israelcunataca cashna ninajurca:

“Ñucanchimi, Israelcunata Mandaj Taita Diospaj shutipi juramenturcanchi. Chaimandami cunanga, chai runacunataca imatapash na rurai ushanchi.

20Cashnami paicunahuanga rurana canchi: Paicunataca, causanajuchun saquinallami canchi. Paicunaman juramentushca jahua huañuchijpi, Dios fiñarishpa ñucanchita ama llaquichijuchunmi, na huañuchina canchi” ninajurcami.

21Israelcunata cati mandajcunaca: “Paicunataca, causanajuchun saquinallami canchi” ninajurcami.

Shinamandami, Israelcunata mandajcuna juramentushcashna causanajuchun saquishpa, tandanajushca tucui Israelcunaman yamdata, yacuta yalichishpa causajuchun churarca.

22Josueca, chai runacunata cayashpami cashna nirca: “¿Imashpata cangunaca: ‘Cai quimirialla llactamanda cashpata, caru caru llactamandami shamunchi’ nishpa umachircanguichi?

23Chashna cashcamanda cunanga, ninanda na alicachi tucushcacunami canguichi. Cangunapuramandaca, ñucanchi imata mandashcata rurashpami causanguichi. Yamdacunata cuchushpa, yacuta llujchishpa, ñucanchi Taita Diospaj huasiman yalichishpami causanguichi” nircami.

24Shina nijpimi paicunaca, Josuetaca cashna ninajurca: “Tucuilla llactatami cangunaman carasha nishpa, cangunata Mandaj Taita Diospajta ruraj Moisesman villashcatami yachaparcanchi. Shinallata, chai llactapi causajcunataca, cangunapaj ñaupajpillatami, tucuillata tucuchisha nishcatapashmi yachaparcanchi. Chaimandami, canguna ñucanchita huañuchinata ninanda manllashpa, chashna ruraparcanchi.

25Cunanga, cambaj maquipimi capanchi. Ñucanchitaca, imata rurashpa cambi ali cana cajpipash, chaita rurapailla” ninajurcami.

26Shina nijpimi Josueca, paicuna nishcashnallata rurashpa, chai runacunataca, Israelcuna huañuchinamanda quishpichirca. Chaimandami, paicunataca na huañuchirca.

27Chai punllami Josueca, Gabaón llactamanda gentecunataca, tandanajushca tucui Israelcunamambash, Mandaj Diospaj altarmambash, yamdata, yacuta yalichishpa causanajuchun churarca. Mandaj Dios agllashca maijan pushtupipash, cunangaman chashna rurashpa causanajuchunmi chashna churashca.