EZEQUIEL 22 - Quichua Imbabura 2016

Jerusalenbi causajcunapaj juchacunamanda

1Mandaj Diosca cashnami nirca:

2“Huañuna aichayuj runa, chai pueblopi causajcuna huañuchishpa juchata rurashcamandaca, ¿nachu paitaca canga llaquichi tucunapachami cangui nishpa rimana cangui? ¿Paicuna na alita rurashcataca, nachu paicunamanllata villana cangui?

3Paicunataca, cashna ningui: Mandaj Jatun Diosca, cashnami nin: ‘Pueblo ucupillata, huañuchij na ali runacunalla, ¡rurashcalla dioscunata rurashpa na alita rurashcamandapash, gentecunata huañuchishpa na alita rurashcamandapash llaquita apana punllacunami chayamushca!

4Huañuchishcamanda, rurashcalla dioscunata mañashpa juchata rurashcamandami, llaquichinapacha cani. Cangunallatami, llaquicunata apangapa mascarcanguichi. Chaimandami, canguna huañushpa tucurina huatapash chayamushca. Cangunataca, shuj llactacunapi causajcuna na alicachinajuchun, na cazushpa asinajuchunmi saquircani.

5Na alitalla rurashpa mapayajta ricushpami, cambaj quimiriapi causajcunapash, carupi causajcunapash ninanda na alicachishpa rimanajunga.

6Israel llactata mandajcunaca, paicuna imashna ushaita charishcashnami huañuchishpa tucuchinajun.

7Chaipi llactapi causajcunaca, taita, mamatapash na cazunajunllu. Caru llactamanda shamushca runacunatapash, taita mama illaj huahuacunatapash, sapalla mamacunatapash, paicuna imata charishcata quichushpami llaquichinajun.

8Ñucapajlla shicanyachishca huasicunatapash, Ñuca churashca samana punllacunatapash yangapimi churashca.

9Yangamanda juchachishpami huañuchinajun. Ñucapajlla lomacunapi tiyaj altarcunapi micungapa rishpami, na alita ruranajun.

10Taitapaj jipa huarmihuanmi pacta puñunajun. Quilla nanaihuan purinajun mapayashca huarmicunahuanmi pacta puñunajun.

11Cusayuj huarmicunahuanmi pacta puñunajun. Paicunapaj jachunhuanllata pacta puñushpami na alita ruranajun. Taitamandalla panihuambash, chashnallatami na alita ruranajun.

12Huaquingunaca, culquimandallami huañuchinajun. Culquita mañachishpapash, ashtahuan mirachishpa cuhuai nishpami shuhuanajun. Shujcunatapash shuhuashpami ninanda llaquichinajun. Ñucataca ashatallapash na yarinllu, ninmi Mandaj Diosca.

13Charijyangapa munashpa huañuchishpa causanajujpimi, ninanda fiñarishca cani. Canguna llaquichishpa huañuchishcamandami, ninanda fiñarishca cani.

14¿Cambaj shunguca, imatapash na manllashpa shinllichu canga? ¿Ñuca llaquichijui punllacunapica, canga ushaita charinguichu imashi? Mandaj Dios Ñucami, cashna nini. Chaitaca pactachishapachami.

15Cai llactamandaca, caita chaita calpachishpami, shuj llactacunaman cachasha. Chashna rurashpami, cai llactataca jucha illajta saquisha.

16Shuj llactacunapi causajcunapash, ninanda na alicachishpami ricunajunga. Shina cashpami Ñucataca, Mandaj Dios cajta yachanguichi’ ninmi ningui” nihuarcami.

17Mandaj Diosca cashnatapashmi, nihuarca:

18“Huañuna aichayuj runa, Israelcunaca ninandapachami mapayashca. Paicunaca, culquita, bronceta, estañota, jirruta, plomota, rupachishpa llujchishca mapashnami tucushca.

19Shina cajpimi Mandaj Diosca, cashna nishca: Cangunaca tucuillami, ninan mapacuna tucushcanguichi. Chaimandami cangunataca Jerusalén chaupipi tandachisha.

20Culquita, bronceta, jirruta, plomota, estañota tandachishpaca, ninapi rupachishpami yacuyachin. Chashnallatami cangunatapash ninanda fiñashpa, pueblo chaupiman tandachishpa, yacuyachinshna tucuchigrini.

21Cangunata tandachishpaca, ninanda fiñashca cashpami, cangunapaj jahuapi ninata japichinshna llaquichigrini. Chashna rurajpimi yacuyashpa tucuringuichi.

22Ninapi rupachishpa culquita yacuyachinshnami, cangunatapash yacuyachigrini. Shina rurajpimi, Mandaj Dios Ñuca fiñashcataca yachanguichi” ninmi nigri nihuarcami.

23Mandaj Diosca, cashnatapashmi nihuarca:

24“Huañuna aichayuj runa, Israel llactataca cashna ningui: ‘Canga, ninan na ali mapa llacta cashcamandami, ninanda fiñarishpa llaquichijui punllapica, tamiatapash quichujpi chaquishca siringui.

25Chai llacta chaupipica, león huacashpa shuj animalta japinshnami, gentecunataca huañuchishpa tucuchinga nishpami villanajun. Chashna tucuchishpami, paicuna imata charishcatapash tucuilla quichunga. Chai llacta chaupipica, sapalla huarmicunallami saquiringa.

26Sacerdotecunapash, Ñuca mandashcata na cazushpa, Ñucapajlla tiyanajuj altarcunatapash yangapi churashpami, na alita ruranajurca. Imalla Ñucapajlla cajtapash, imalla na ali cajtapash na yacharcachu. Imalla mapa cajtapash, na mapa cajtapash na yachai usharcachu. Samana punllacunatapash na yarishpami, Ñucatapash yangapi churanajurca.

27Paicunata mandajcunapash, chai llacta chaupipica, animalcunata japij atujcunashnami, gentecunata huañuchishpa tucuchinajun. Culquimandallami, chashna huañuchinajun.

28Paicunapaj profetacunapash, pircata jahualla juyailla quilpashcashnami, llullashpalla’ villanajun. Paicunaca: ‘Mandaj Jatun Diosmi cashna nin’ nishpami villanajun. Shina cajpipash Mandaj Dios Ñucaca, paicunahuanga na rimashcanichu.

29Cai llactapi causanajuj gentecunaca, llaquichishpa charishpami, shuhuashpa causanajurca. Llaquita apajujtapash, imagupash illajtapash ninandapachami llaquichinajurca. Shuj llactamanda shamujtapash, yangamandami llaquichinajurca.

30Cai llactata ama llaquichipaichu nishpa, Ñuca ñaupajpi shayarishpa rimachunmi, shuj runata mascarcani. Ashtahuangarin, cai llactapica shujtallapash na tarircanichu.

31Shinamandami, paicunataca ninandapacha fiñarishpa llaquichircani. Ñuca ninandapacha fiñarishpami, paicunataca tucuchircani. Paicuna imashna na alita rurashpa causashcashnami llaquichircani ninmi” Mandaj Jatun Diosca.