1Chai punllapica, cashnami ninajunguichi:
“Mandaj Dioslla, Candallami alicachishpa candashun.
Canga, ñucanchihuan fiñarishca cashpapash,
chai fiñarishcata yalichishpami, cutin ñucanchitaca llaquircangui.
2Taita Diosmi ñucataca quishpichin.
Paita yariashpa causashpami, imatapash na manllasha.
Mandaj Diosca, ñucanchita huacaichishpami, shinlliyachijun.
Paimi ñucanchitaca quishpichirca” ninguichimi.
3Cangunaca cushijushpa ufiajshnami, quishpiringuichi.
4Chai punllapica, cashnami ninajunguichi:
“Mandaj Diospaj shutitaca, caparishpami alicachina canguichi.
Pai imatalla rurashcataca, tucui llactacunapimi villana canguichi.
Paipaj shutitaca, ninandapachami jatunyachina canguichi.
5Mandaj Diostaca, salmocunahuanmi alicachina canguichi.
Paica, tucuita imatapash alitallami rurashca.
Chaicunataca, tucui cai pachapimi yachana canguichi.
6Sion pueblopi causajcunalla, cangunaca ninanda cushijushpami candana canguichi.
Cangunahuan causajuj, Israelcunapaj jucha illaj Diosca jucha illajmari nishpami candana canguichi” ninajunguichimi.
Who We AreWhat We EelieveWhat We Do
2025 by iamachristian.org,Inc All rights reserved.
