2 CORINTIOS 3 - Quichua Imbabura 2016

Shuj mushujta ari nishcata rurajcunami canchi

1¿Cutinllu ñucanchillata ninanda alicachirina canchi? ¿Na cashpaca, shujcunashnalla alicachishpa quilcashcatachu charina canchi? ¿Na cashpaca, cangunatapash ñucanchita alicachishpa quilcashcatachu mañana canchi?

2Cangunami ñucanchi cartashna canguichi. Ñucanchi shungupi quilcashcashna cajpimi, shuj gentecunaca quilca catijshna ricunajun.

3Cangunami, ñucanchi quilcashca Cristopaj cartashna, tucuicuna ricunalla canguichi. Na tintahuan, ashtahuangarin, Taita Diospaj Espirituhuan quilcashcashnami canguichi. Shinallata, na tabla rumipi quilcashcashna cashpami, ashtahuangarin, cangunapaj shungupipacha quilcai tucushcashna canguichi.

4Chaitaca, Cristota crishpa chasquishcamandami, Taita Diospi shuyashpa causanajunchi.

5Imata ruraitapash, ñucanchipaj ushaihuanmi ruranchi yashpaca na causanachu canchi. Ashtahuangarin, Taita Dios ushaita carajpillami imagutapash rurai ushanchi.

6Shuj mushujta ari nishcata villachunga, Diosllatami ñucanchiman ushaita curca. Chaica, na mandashca shimimanda shamujunllu, ashtahuangarin, Taita Diospaj Espiritumandami shamujun. Mandashca shimicunaca huañuimanmi cachajun, ashtahuangarin Diospaj Espirituca causaitami caramujun.

7Tabla rumicunapi quilcashca, huañuiman apajuj, mandashca shimicunapash punchapambami ricurimurca. Chaicunataca, Moisespaj ñavi punchapamba cajpimi Israelcunaca, ricuitaca na ushanajurca. Shina punchapamba ricurijushpapash, chinganallatami carca.

8Diospaj Espíritu caramujun shuj mushujta pactachinata villana shimicunaca, ¿nachu ashtahuan ushaita charij cangayari?

9Ninan llaquiman cachangapa tiyajuj mandashca shimicunapash juyaillagumi ricurin. Ashtahuangarin, “alitalla rurashcatashnami chasquijun” nishpa villajuj shimicarin, ashtahuan juyaillagupachami canga.

10Punda mandashca shimicunaca juyaillagumi ricurijushca. Shina cajpipash, cunanbi mandashca shimicunaca ashtahuan ushaita charishpami, punda mandashca shimicunataca yali ushaita charishcata ricuchijun.

11Chai chinganalla shimicunapash, juyaillagu cashca cajpica, cunanbi villashca shimicunacarin, ashtahuan juyaillagu cashpami causaita causajungalla.

12Chaita yariajlla crishpapacha causanajushpami, imatapash na manllashpa villanajunchi.

13Moisesca, chinganalla punchapambata, Israelcuna ama ricuchunmi, paipaj ñavita quilparijurca. Ñucanchica na chashna quilparijcunachu canchi.

14Ashtahuangarin, imashpa shina quilparijujtapash, Israelcunaca na yachai usharcachu. Shinamandami, Taita Dioshuan pactachingapa punda ari nirishcata, quilca catishpapash, ñavita finduhuan quilpashcashna cashpa, cunan punllacaman na yachai ushanajun. Chaitaca, Cristollami anchuchi usharca.

15Moisés mandashcataca, cunan punllacunapi quilca catinajushpapash, paicunapaj shunguta quilpashcashna cashpami na yachai ushanajun.

16Ashtahuangarin, Apunchi Jesuspajman tigrarijpimi chai quilpashcapash anchuringa.

17Apunchi Jesuspash, Diospaj Espiritupash shujllami. Diospaj Espíritu maipi cashpapash ñucanchihuan cajpimi, ñana huatashcashna canchi.

18Shinamandami, Apunchi Jesús ninan ushaita charijtaca, espejopishna ñucanchitaca ricunajun. Ñavita tapashcashna cajtaca ñami anchuchishca canchi. Apunchi Jesuspaj Espirituhuanmi, Paishnallapacha punchapamba cachun, ñucanchitaca ashtahuan punchayachijun.