1Taita Diosca, Israelcunataca ninandapachami juyan.
Shungupi ima mapapash illajcunatami, ninandapacha juyan.
2Ñucaca ashamandallami na pandarircani.
Ñuca purijushpaca, ashamandallami na urmarcani.
3Na ali gentecuna jariyashpa, charij tucujta ricushpami,
ñucapash chashnallata cangapa munarcani.
4Paicunaca, huañui japinatapash na manllanllu.
Alimi canchi yashpami, chashna causanajun.
5Caishujcunashnaca, na ima llaquitapash apanajunllu.
Shuj runacunashnaca, na asti tucunajunllu.
6Shinamandami, paicuna jariyana coronata churajushcashna purinajun.
Pitapash llaquichinatalla yarishpami causanajun.
7Yapa viracuna cashpami, ñavipash llujshishcashna ricunajun.
Paicunapaj shungupi munashcata pactachishpapash, ashtahuan yalishpami ruranajun.
8Ninanda na alicachishpa rimashpami, pitapash llaquichinatalla yarinajun.
Ninanda jariyashpami parlanajun.
9Paicunapaj shimihuambash, Diosta fiñashpami rimanajun.
Cai pachapi causajcunatapash chashnallatami rimanajun.
10Chaimandami Taita Diosca, Pai agllashca gentecunataca, paicunapajman cachan.
Chaipimi, paicuna rimashcataca, yacuta ufiajshna chasquinajun.
11Na ali gentecunaca: “¿Taita Diosca, imashnata yachanyari?
Jahua pachapi causajuj Diosca, ¿Imatapash yachanllu?” ninajunmi.
12Diosta na manllaj runacunaca,
cai pachapi ima llaquitapash na japishpami, ninanda charijyanajun.
13Ñucaca, yangallatami mapa illaj purijuni.
Ñuca alitalla rurashca, maquita na mapayachishcapash yangallatami.
14Ashtahuangarin punllandimi asti tucujuni.
Tucui tutamandacunami macai tucujuni.
15Ñucapash paicunashnallata rimajushpaca,
Can agllashca huahuacunatami pandachijuiman.
16Chaita ali yachangapami, aligutapacha yarijurcani.
Ñucapaca ninan shinllipachami carca.
17Taita Diospaj huasiman ña yaicushpami,
paicuna imashna tucurinataca yacharcani.
18Paicunataca, urmanalla pushtupimi churashcangui.
Shina churashpami, paicunataca llaquichishpa tucuchingui.
19¡Cungashcapi llaquinayaita tucuchi tucunajunga!
Ninan llaquita apashpami, manllarishpa tucurinajunga.
20Muscuimanda rijcharinshnami,
Can Jatun Diosca llaquichijpi, paicunaca tucuringa.
21Ñucapash, shungumandapachami llaquirircami.
Ñuca shungutapash, chugrichinshnami llaquichihuarca.
22Ñucaca, juizu illajshna cashpami, imatapash na yachai usharcani.
Cambaj ñaupajpica, animalshnami carcani.
23Chashna cashpapash, tucui causaipimi Canhuan carcani.
Canga ñucataca, ali maquimandami charihuarcangui.
24Ali causachun Can yachachishpami pushahuashcangui.
Chai jipaca, punchapamba llactapimi chasquihuangui.
25Ñucaca, jahua pachapica ¿pitata chariniyari? Candallami charipani.
Cai pachapipash, Canhuan cashcamandaca, imatapash na charingapa munanichu.
26Ñuca aichapash, ñuca shungupash ña huañunallami tucujun.
Ashtahuangarin jatun rumishna jarcaj Diosca,
ñuca shungupi ushaita carajpimi causajuni.
Taita Diosca, tucui causaipimi imagutapash carahuan.
27Canmanda anchurijcunaca huañungami.
Canmanda anchurishca gentecunataca, tucuillatami tucuchipangui.
28Ashtahuangarin ñucaca, Taita Diospajman quimirinatallami charini.
Mandaj Jatun Diostami, shuyashpa causajuni.
Can tucui rurashcacunata villangapami causajuni.
Who We AreWhat We EelieveWhat We Do
2025 by iamachristian.org,Inc All rights reserved.
