DEUTERONOMIO 6 - Quichua Imbabura 2016

Tucui mandashcamanda ashtahuan yali mandashcami

1Mandaj Dios cangunaman yachachijuchun cushca, cai tucui mandashca shimicunataca, cangunaman carashca alpapi causanajushpa pactachinajuchunmi curca.

2Cambash, cambaj mirai huahuacunapash, Mandaj Diosta manllashpa, cai mandashcacunata pactachishpa causanajuchunmi curca. Tucui caicunata causanajushpallata pactachishpami, unaicaman causanguichi.

3Uyaichi Israelcuna. Lechepash, balun mishquipash, ninandapacha tiyaj llactapi, canguna imata rurashcapash ali llujshichunmi, cai tucui mandashcacunataca pactachina canguichi. Chashna causashpami cangunapaj ñaupaj taitacunaman, Mandaj Dios carashca llactapica ninanda mirashpa causanguichi.

4Israelcuna, aliguta uyahuaichi: Ñucanchita Mandaj Diosca, Shujlla Taita Diosmi.

5Canda Mandaj Taita Diostaca, cambaj tucui shunguhuan, tucui almahuan, tucui ushaihuanmi juyana cangui.

6Cai mandashca shimicunataca, na cungashpami cambaj shungupi charina cangui.

7Cai shimicunataca, ñanda purijushpapash, huasipi cashpapash, puñungapa sirijushpapash, jatarijushpapash, cambaj huahuacunamanmi cutin cutin yachachina cangui.

8Cai mandashcacunataca, ricuchina cachunmi, maquipipash, frentepipash huatarina cangui.

9Shinallata, cambaj huasi pilarcunapipash, pungucunapipashmi quilcana cangui.

Diosta cazushpa causachun yachachishcamanda

10Cangunapaj ñaupa taita Abrahamman, Isaacman, Jacobman, carashapachami nishca llactaman cangunata Mandaj Dios pushajpica, canguna na huasichishca, juyailla jatun pueblocunapimi causangapa ringuichi.

11Chai huasicunapica, canguna imata na charishca cashpapash, tucuitami charinguichi. Yacuta alichina utujuta canguna na allashca cashpapash, uva chagracunata na tarpushca cashpapash, olivo yuracunata na tarpushca cashpapash, tucui chaicunatami charinguichi. Shinallata, micuitapash, na munangacamanmi micunguichi.

12Shina cashpapash, Egipto llactapi gañan tucushpa causashcamanda, llujchimuj cangunata Mandaj Diostaca napacha cunganachu canguichi.

13Cangunata Mandaj Diostallami manllana canguichi. Paitallami alicachina canguichi. Paipaj shutipillami juramentuna canguichi.

14Rurashcalla dioscunataca na yarinachu canguichi. Cangunapaj llacta muyundipi tiyaj pueblocunapi causajcunapaj dioscunataca, napacha catinachu canguichi.

15Ashtahuangarin, cangunapaj chaupipi causajuj, Mandaj Diosca, Paipajlla cachunmi munan. Cangunata Mandaj Dios ninanda fiñarishpa, cai pachamanda tucuchishpa chingachinamandaca huacaichirinami canguichi.

16Masah shuti llactapi Mandaj Taita Diosta fiñachishcashnaca, napacha fiñachinachu canguichi.

17Mandaj Dios mandashcacunata, imashna causachun yachachishcacunata, pactachinajuchun cushca shimicunataca, aliguta yariashpami pactachina canguichi.

18Mandaj Diospaj ñaupajpica, alitalla rurashpami causana cangui. Cangunapaj ñaupa taitacunaman Mandaj Dios carashapachami nishca llactaman yaicushpa, aliguta causangapami, chai mandashcacunataca pactachina cangui.

19Mandaj Dios imashna nishcashnallata, canda fiñajcunata llujchishpa cachachunmi chashna causana cangui.

20Jipa punllacunami cambaj huahuaca: ‘Ñucanchita Mandaj Taita Dios cushca cai mandashca shimicunaca, ¿imatata nijunga?’ nishpa tapunga.

21Shina tapujpica cashnami nina cangui: ‘Ñucanchica Egiptopimi, Faraonbaj gañanguna tucushpa causarcanchi. Chai Egipto llactamandami, Mandaj Diosca ninan ushaihuan llujchimurca.

22Mandaj Diosca, ñucanchi ñaupajpimi, Faraonmambash, paipaj huasipi causajcunamambash, imatapash rurashpa ricuchinacunata, pipash na rurai ushanalla jatun manllarinacunata rurarca.

23Ñucanchi ñaupa taitacunaman carashapachami nishca llactata ñucanchiman carangapami, chaimanda llujchishpa pushamurca.

24Mandaj Diosca, tucui mandashca shimicunataca pactachishpa causanajuchunmi curca. Shinallata, ñucanchita Mandaj Taita Diosta manllashpa causanajushpami, tucui punllacuna, cunan punllashnallata aliguta causanajushun.

25Shina cai tucui mandashcacunata, ñucanchita Mandaj Taita Diospaj ñaupajpi, pai mandashcashna, aligutapacha cazushpami, ali cashcatapacha rurashpa causashun’ ninami canguichi.