ÉXODO 5 - Quichua Imbabura 2016

Moisespash, Aaronbash, Faraonbaj ñaupajman rishcamanda

1Chai jipami Moisespash, Aaronbash, Faraonbaj ñaupajman rishpa cashna ninajurca:

“Israelcunata Mandaj Taita Diosmi cashna nin: ‘Ñuca agllashca gentecuna, jichushca pambapi Ñucata alicachishpa cushijunajuchun richun saquilla’ ninmi” ninajurcami.

2Shina nijpimi Faraonga cashna nirca:

“Pai nishcata uyashpa, Israelcunata richun saquingapaca, ¿Mandaj Diosca, pita cangayari? Mandaj Diostaca na rijsinichu. Israelcuna richunga na saquishachu” nirca.

3Shina nijpimi cashna ninajurca:

“Hebreocunapaj Taita Diosmi, ñucanchita ricungapa shamushca. Shinamandami cunanga, jichushca pambata quimsa punllata rishpa, ñucanchita Mandaj Taita Diosman animalcunata rupachishpa caragrina canchi. Ima ungüipash, espadahuan huañuchi tucunapash, ñucanchita ama japichunmi, chashna rurana canchi” ninajurcami.

4Shina nijpimi Egipto llactata jatun mandajca cashna nirca:

“Moisespash, Aaronbash, ¿imashpata cai gentecuna imatalla ruranajujta saquichinguichi? Canguna imata ruranajushcata rurangapa tigraichilla” nircami.

5Faraonga cashnatapashmi nirca:

“Cai llactapi causaj ashtaca gentecuna imatalla ruranajujtaca, cangunami saquichishcanguichi” nircami.

6Faraonga chai punllallatami, Israelcuna imatalla rurashcata ricushpa mandajcunatapash, cati mandajcunatapash cashna nirca:

7“Israelcuna ladrillota rurachun jupata cunajushcataca ñana cunachu canguichi. Cunanga, paicunallata rishpami jupataca tandachimunga.

8Shina cashpapash paicunataca, ladrillota mashnata punda ruran cashcashnallata rurachun mandanguichi. Paicunaca quillamandami: ‘Ñucanchi Taita Diosman animalcunata rupachishpa carangapa jacuchi’ nishpa caparinajun.

9Paicunataca ashtahuan shinlli ruranacunapi churanguichi. Chashna ruranajushpami chai llulla shimicunataca na uyanajunga” nijurcami.

10Shina nijpimi Israelcuna imatalla rurashcata ricushpa mandajcunapash, cati mandajcunapash, chaimanda llujshishpaca cashna ninajurca:

“Faraonga cashnami nin: ‘Ñucaca, na ashtahuan jupata cushachu.

11Cunanga, cangunallata rishpa maipi tarishpapash jupata tandachimunguichilla. Shina cashpapash, mashna ladrillota punda ruraj cashcashnallatami rurana canguichi’ ninmi” ninajurcami.

12Shina nijpimi Israelcunaca, jupapaj randica, chaquishca jihua sapicunata tandachingapa tucui Egipto llactacunata, caita chaita rinajurca.

13Shinallata, imatalla rurashcata ricushpa mandajcunapash, cashna nishpami llaquichinajurca: “Cangunaca, imashnami jupata punda cujpi rurashpa tucuchin carcanguichi, chashnallatami punllandi rurashpa tucuchina canguichi” ninajurcami.

14Israelpura cati mandajcunataca, imatalla rurashcata ricushpa mandachun Faraón churashca runacunami: “¿Imashpata cainapash, cunambash na pundashnallata ladrillocunata rurashpa pactachinguichi?” nishpa ninanda astinajurca.

15Shinamandami Israelpurallata cati mandajcunaca, Faraonbajman rishpa cashna ninajurca:

“¿Imashpata cambajta rurajcunataca, cashna llaquichijungui?

16Cambajta rurajcunamanga jupata na cushpapash: ‘Ladrillotaca ruraichilla’ ninajunmi. Cambajta ruraj ñucanchimi asti tucunajunchi. Cambaj gentecunami, chashna na alita ruranajun” ninajurcami.

17Shina ninajujpimi Faraonga cashna nirca:

“Cangunaca, imata ruranatapash na munaj quillacunapachami canguichi. Chaimandami: ‘Mandaj Diosman animalcunata rupachishpa cungapa jacuchi’ ninajunguichi.

18Cunanga ladrillota rurangapa richi. Jupata na cujpipash, mashna ladrillota ruraj cashca cashpapash, chashnatallatami pactachina canguichi” nircami.

19“Shuj punllapi mashna ladrillota rurana cashpapash, chashnatallatami pactachina canguichi” nijpimi, Israelcunata cati mandajcunaca, ninan llaquipi cashcata ricunajurca.

20Faraonbaj ñaupajmanda paicuna llujshinajushpami Moisestapash, Aarondapash tuparishpa,

21cashna ninajurca:

“Mandaj Taita Diosllata, cangunata ricushpa imata cashpapash rurachun. Faraonbaj ñaupajpipash, paipajta rurajcunapaj ñaupajpipash, ñucanchi na alipi ricurichunmi rurashcanguichi. Ñucanchita huañuchinajuchun, paicunapaj maquipi espadata cujshnami, llaquipi churashcanguichi” ninajurcami.

Mandaj Diosca Moisestapash, Aarondapash cachashcamanda

22Shina ninajujpimi Moisesca, Mandaj Diostaca cashna nirca:

“Jatun Dioslla, ¿imashpata cai gentecunataca ninanda llaquichijungui? ¿Imapata ñucataca cachamuhuarcangui?

23Cambaj shutipi, Faraonman villangapa ñuca shamushca punllamandapachami, cai gentecunataca ninanda llaquichinajun. Ashtahuangarin, Can agllashcacunata quishpichingapaca imatapash na rurashcanguichu” nircami.