1Filisteocunapash, Afec shuti pambapimi macanajungapa tandanajurca. Shinallata Israelcunapash, yacu tugyajun Jezreel shuti pambapimi carpacunata shayachishpa tiyanajurca.
2Macanajuj runacunaca, filisteocunata cati mandajcunapaj ñaupatami, patsajpi, huarangapi shicanyachishpa yalinajurca. Davidca, paipaj macanajuj runacunandimi, Aquis shuti jatun mandajpaj huashata catinajurca.
3Chaita ricushpami, filisteocunata cati mandajcunaca: “Cai hebreocunaca, ¿imatata ruranajun?” nishpa tapurca. Shina nijpimi, Aquis runaca, filisteocunata cati mandajcunataca cashna nirca: “Paica, Israel llactata mandaj Saulpajta ruraj Davidmari. Paica, tauca huatacunatami ñucahuan causajun. Paitaca, ima na alita rurashcatapash na ricushcanichu” nirca.
4Shina nijpimi, filisteocunata cati mandajcunaca ninanda fiñarishpa, Aquis runataca cashna nirca: “Macanajuiman ñucanchihuan ama richun, maimanda shamushca cajpipash, chaimanllata tigrachishpa cachailla. Chaipira ñucanchita fiñajcunahuan tandanajushpa ñucanchihuan macanajunman. Cai runacunapaj umacunata apashpami, paita mandajpaj ñaupajpica alipi ricuringa.
5¿Nachu cai Davidta:
‘Saulca, huaranga runacunatami huañuchishca.
Davidca, chunga huaranga runacunatami huañuchishca’ nishpa taquishpa tushunajurca?” ninajurcami.
6Shina nijpimi Aquis shuti runaca, Davidta cayashpa cashna nirca: “Mandaj Diosca ricujunmi. Canga ali cashcata rurajmi cangui. Shinallata maiman rishpa, tigramushpapash alitalla rurashpa purijmi cangui. Ñucapajman shamushca punllamandapacha, cunangaman ima na alitapash, na rurashcanguichu. Ashtahuangarin cati mandajcunami candaca na ricunayachin.
7Shina cashcamanda filisteocunapaj cati mandajcunata, ama ashtahuan fiñachingapa upalla tigrailla” nircami.
8Shina nijpimi Davidca, Aquis runataca cashna nirca: “¿Ima na alitata rurashcani? ¿Cambajman shamushca punllamanda cunangaman cambajta ruraj ñucataca, ima na alita rurashcatata ricushcangui? ¿Imashpata ñucata jatun mandajta fiñajcunahuanga, na macanajugrina cani?” nircami.
9Shina nijpimi Aquis runaca, Davidta cashna nirca: “Candaca, Taita Diospaj angelshna tucuipi ali cajtami ricuni. Ashtahuangarin filisteocunata cati mandajcunami: ‘Paica, cai macanajuimanga napacha ri ushangachu’ ninajuhuan.
10Shina cashcamanda, caya tutamandata jatarishpa, cambash, canhuan shamushca runacunandi, nara ali punllayajllapita ringuichilla” nircami.
11Shina nijpimi Davidca, paipash, paipaj catijcunandi filisteocunapaj llactaman ringapa tutamandata jatarirca. Shinallata filisteocunaca, Jezreel pambamanmi rinajurca.
Who We AreWhat We EelieveWhat We Do
2025 by iamachristian.org,Inc All rights reserved.
