JUECES 18 - Quichua Imbabura 2016

Micaía runamandapash, Dan ayllupura runacunamandapash

1Chai huatacunapica, Israel llactapi jatun mandajca na tiyarcachu. Chai huatacunallatami, Dan shuti ayllupaj miraicunaca, alpata japishpa chaipi causangapa mascashpa purinajurca. Paicunaca chai huatacunacamanmi, Israel ayllupurapica, paicuna causana alpataca na charishca carca.

2Chaimandami Dan shuti ayllu miraicunaca, paicunapaj ayllupuramanda picha runacunata cacharca. Llactata ali ricushpa rijsishpa tigramugrichunmi, Zora shuti, Estaol shuti pueblocunamanda, ashtahuan shinlli runacunata cacharca. Paicunataca: “Richi, llactata ali rijsishpa tigramugrichi” nishpami cacharca.

Chai runacunami, Efraín urcuman rishpa, Micaía runapaj huasiman chayashpa, chai tutaca chaipi pacarirca.

3Micaía runapaj huasiman ña chayagrinajushpami, chairalla viñai chai levitapaj shimita rijsirca.

Ña chayashpaca, cashnami ninajurca: “¿Pita candaca, caiman pushamurca? ¿Imatata caipica rurajungui? Canga caipica, ¿imatata rurangapa shamurcangui?” ninajurca.

4Shina nijpimi chai Levita huambraca, imatalla Micaía paimanda rurashcata parlajurca. Shinallata sacerdote cachun paita churashcatapashmi parlarca.

5Shina parlajpimi chai runacunaca:

“Ñucanchi cashna rinajushcapash, alichu llujshinga imashi, chaita yachangapa Taita Diosta tapupai” ninajurca.

6Shina nijpimi chai sacerdotepash cashna nirca:

“Ama manllashpa richilla. Canguna rinajushca ñandaca, Mandaj Diosmi ricushpa pushajun” nirca.

7Shina nijpimi, chai picha runacunaca, Lais shuti puebloman rinajurca. Chai pueblopi causajcunataca, Sidón shuti pueblopi causajcunashna, ima llaqui japinatapash na yarishpa, cungashca causanajujtami ricurca. Chai llactapica, pipash imapillapash na fiñachijpi, mandajuj chai llactatapash pipash na quichungapa tiyajpimi, ali causanajurca. Sidón shuti pueblomandapash, carupimi causanajurca. Pihuan randishpa jatushpa causanatapash na charircachu.

8Zora shuti, Estaol shuti pueblocunapi causanajuj paicunapaj huauquicunapajman, chai picha runacuna tigrajpimi, paicunapaj huauquicunaca:

“¿Imapash tiyanllu?” nishpa tapunajurca.

Shina tapujpimi, paicunaca cashna ninajurca:

9“Paicunahuan macanajungapa vichai rishunchilla. Ñucanchica, chai llactata ali ricungapa rishpaca, aligupacha cajtami ricurcanchi. Cangunaca, ¿nachu imatapash ruragringuichi? Chai llactata japingapa ringapaca, ama quillanayachishpa ucha rishunchilla.

10Ñucanchi rishpaca, ima llaqui japinatapash na yarishpa causanajuj gentecunapajman, ashtaca alpacunata charij llactamanmi chayagringuichi. Paicunataca, Taita Diosmi cangunapaj maquipi churashca. Chai alpacunapica, tucui imapash na illanllu” ninajurcami.

11Shina nijpimi, Zora shuti, Estaol shuti pueblocunamanda, Dan shuti ayllu miraicunaca, sucta patsaj runacuna, macanajungapa alichirishcalla rinajurca.

12Chaimanda rishpaca, Judá llactapi tiyaj Quiriat-jearim shuti pueblopimi, indi huashajunman carpacunata shayachishpa tiyanajurca. Chaimandami cunangaman chai pambataca, “Dan shuti ayllupaj carpacuna shayana pamba” ninajun.

13Chai pambamandaca, Efraín urcu alpacunaman chimbashpami, Micaía shuti runapaj huasicaman chayanajurca.

14Chaiman chayashpami, Lais shuti pueblo muyundi llactacunata rijsingapa rij chai picha runacunaca, paicunapaj huauquicunataca cashna ninajurca: “Cai huasipica, efodpash, terafín dioscunapash, caspita llagllashpa rurashca imamambash rijchaj diospash, culquita yacuyachishpa rurashca diospash tiyajtaca, ¿nachu yachanguichi? Shina cashcamanda imata rurana cashpapash, aliguta yarishpami rurana canguichi” ninajurcami.

15Chaiman chayashpaca, Micaía runapaj huasipi causajuj, chairalla viñai levita runapajman rishpami, “alillachu cangui” ninajurca.

16Dan shuti ayllupaj miraipura sucta patsaj runacunapash, macanajunacunata chaririyajmi, pungu yaicunapi shayanajurca.

17Llactacunata rijsingapa rij picha runacunaca, chai huasiman yaicushpami, llagllashpa rurashca imamambash rijchaj diostapash, efodtapash, terafín dioscunatapash, culquita yacuyachishpa rurashca, imamambash rijchaj diostapash japinajurca. Sacerdoteca, macanajungapa alichirishcalla sucta patsaj runacunahuan pungu yaicunapi shayanajujpimi, chashna ruranajurca.

18Micaía runapaj huasiman yaicushpami, llagllashpa rurashca imamambash rijchaj diostapash, efodtapash, terafín dioscunatapash, culquita yacuyachishpa rurashca, imamambash rijchaj diostapash japinajurca. Shina japishpa apanajujta sacerdote ricushpami: “¿Cangunaca, imatata ruranajunguichi?” nirca.

19Shina nijpimi paicunaca, cashna ninajurca: “Maquihuan shimita quilparishpa upalla cai. Sacerdote tucushpa ñucanchi taitashna tucungapa, ñucanchihuan jaculla. ¿Israel ayllu miraicunapaj sacerdote cangapa randica, shuj runapaj huasipilla sacerdote canachu ashtahuan ali canga?” ninajurcami.

20Shina nijpimi, chai sacerdoteca shungupi cushijushca cashpa, efodta, terafín dioscunata, imamambash rijchaj diostapash apashpa, gentecunapaj chaupipi rijurca.

21Paicunaca chai huasimanda llujshishpami, huahuacunata, animalcunata, imalla charishcacunata ñaupachishpa rinajurca.

22Dan shuti ayllupaj miraicuna Micaía runapaj huasimanda ña caruta rinajujpimi, Micaía runapaj huasi quimiriallapi causajcunaca tandanajushpa, Dan shuti ayllu runacunata catinajurca.

23Dan shuti ayllu runacunaca, caparishpa catimunajujta uyashpa, tigrarishpa ricushpami, Micaía runataca: “¿Ima nishpata cai tucui runacunata tandachishpa catimujungui?” ninajurca.

24Shina nijpimi Micaía runaca, cashna nirca: “Cangunaca, ñuca rurashca dioscunatapash, ñuca sacerdotetapashmi apashpa rinajunguichi. Imapash illajtamari saquihuanguichi. Chashna jahuachu: ‘¿Imata nishpata catimujungui?’ nihuanguichi” nirca.

25Shina nijpimi Dan shuti ayllupaj miraicunaca, cashna ninajurca: “Ama ñucanchita caparishpa catimuichu, pactarallapash ñucanchipuramanda maijambash ninanda fiñarishpara candapash, cambaj ayllucunatapash huañuchinman” ninajurcami.

26Shina nishpaca, Dan shuti ayllupaj miraicunaca ri callarircallami. Micaía runaca, paita yali shinlli runacuna cajta ricushpami, paipaj huasiman tigrarca.

27Paicunaca, Micaía runa rurashca dioscunatapash apashpa, paipaj sacerdotetapash pushashpami, Lais shuti puebloman chayarca. Chai pueblopi causajcunataca, ima llaquipash illaj cungashca causanajujpimi, espadahuan, huañuchishpa pueblotapash rupachinajurca.

28Sidón shuti pueblomanda carupi causanajujpimi, chai pueblota yanapangapaca pipash na shamurca. Paicunaca, picunahuan randishpa jatushpa causanatapash na yacharcachu. Chai puebloca, Bet-rehob shuti puebloman chayanalla pugru pambapimi carca. Shinallata, jipa punllacunapica, Dan runapaj mirai gentecunami chai pueblota cutin alichishpami, chaipi causanajurca.

29Chai pueblotaca pundaca, Lais shuti cashca cajpipash, Dan shutitami shutichirca. Paicunapaj ñaupa taitaca, Israelpaj churi Dan shuti cashcamandami, chai pueblotaca chashna shutichirca.

30Dan shuti ayllupaj miraicunaca, imamambash rijchaj diostami chai pueblopi shayachirca. Paicunapaj sacerdote cachumbash, Moisespaj churi Gersón runapaj churi Jonatán runatami churarca. Paica, paipaj churicunandimi, Israelcuna prezu apai tucuna huatacaman, Dan ayllupaj sacerdotecuna tucushpa causanajurca.

31Shinami paicunaca, Micaía runa rurachishca imamambash rijchaj diostaca, paicunapaj pueblopi shayachirca. Taita Diospaj carpa, Silo shuti pueblopi tiyajushca tucui huatacunacamanmi chashna charirca.