ROMANOS 16 - Quichua Imbabura 2016

Rijsishcacunatami, “alillachu capanguichi” nishca

1Febe shuti ñucanchi panitaca, aliguta chasquipanguichi nipanimi. Paica, Cencrea shuti pueblopi tandanajuj crijcunapaj diaconisami.

2Diospajlla causajcunata mingachijshnallatami, Apunchi Jesuspaj shutipi mingachina canguichi. Pai panimi shujcunatapash, ñucatapash tucuipi yanaparca. Shina cajpimi, pai imaguta na charijpipash carapanguichi nijuni.

3Ñucahuan pactalla, Cristo Jesuspajta ruraj, Priscilatapash, Aquilatapash, “alillachu capanguichi nijunmi” nipanguichi.

4Paicunami, ñucamandaca ñalla huañurca. Shinamandami, na Israelpuramanda tandanajuj crijcunapash, ñucapash paicunataca “pashi” ninajunchi.

5Paicunapaj huasipi tandanajuj crijcunatapash, “alillachu capanguichi” nijunmi nipanguichi. Epeneto shuti ñuca juyashca huauquitapash, “alillachu capangui” nijunmi nipanguichi. Acaya shuti llactapica, paimi Cristotaca tucuicunapaj punda crirca.

6Cangunapurapi ashtaca alita rurajuj Mariatapash, “alillachu capangui” nijunmi nipanguichi.

7Ñuca llactapura, Andrónico shuti huauquipash, Junias shuti panipashmi ñucahuan pacta prezu carca. Paicunatapash “alillachu capanguichi nijunmi” nipanguichi. Apostolpurapica, paicunatami ninanda alicachinajun. Paicunaca, ñucapaj pundallatami Cristotaca crishca carca.

8Amplias shuti huauquitaca Apunchi Jesuspaj shutipi, ninan juyaihuan “alillachu capangui” nijunmi nipanguichi.

9Cristo Jesusmanda ñucanchihuan pactalla ruraj Urbano shuti huauquitapash, ñuca juyashca Estaquis shuti huauquitapash, “alillachu capangui” nijunmi nipanguichi.

10Cristota alipacha catijuj, Apeles shuti huauquitapash, Aristóbulo shuti huauquipaj huasipi causajcunatapash, “alillachu capanguichi” nijunmi nipanguichi.

11Ñuca llactapura, Herodión shuti huauquitapash, Narciso huauquipaj huasipi causajcunatapash, “alillachu capanguichi” nijunmi nipanguichi. Paicunaca, Apunchi Jesusta alipacha crijcunami.

12Apunchi Jesuspajta ruranajuj, Trifena shuti, Trifosa shuti panicunatapash, ninanda llaquishca Pérsida shuti panitapash, “alillachu capanguichi” nijunmi nipanguichi. Pérsida shuti panipash, Apunchi Jesuspajtaca ninandapachami rurajuj carca.

13Apunchi Jesús agllashca Rufo shuti huauquitapash, paipaj mamatapash “alillachu capanguichi” nijunmi nipanguichi. Paipaj mamaca, ñucapajpash mamashnami carca.

14Asíncrito, Flegonte, Hermes, Patrobas, Hermas shuti huauquicunata, paicunahuan tiyaj tucui crijcunatapash, “alillachu capanguichi” nijunmi nipanguichi.

15Filólogo shuti huauquitapash, Julia shuti panitapash, Nereo shuti huauquitapash, paipaj panitapash, Olimpas shuti huauquitapash, paicunahuan tiyanajuj tucui Diospajlla tucushcacunatapash, “alillachu capanguichi” nijunmi nipanguichi.

16Caishujmanda, chaishujmanda, ninanda juyarishpami, “alillachu capangui” nina canguichi. Cristota crishpa tandanajuj tucui crijcunami, “alillachu capanguichi” ninajun nipanguichi.

17Shicanyachingapa pandata yachachij runacunamandaca, tucui crijcuna anchurinami canguichi. Jesucristomanda yachajushcataca, paicunaca na alicachinajunllu. Chaicunahuanga, na tandanajunachu canguichi nipanimi.

18Chashnacunaca, ñucanchi Apunchi Jesucristopajtaca napacha ruranajunllu. Ashtahuangarin, paicunapaj munaitalla rurashpami, uyanayai shimicunahuan, llullashpa villanajun. Shinami, nara ali yachajujcunapaj shungutaca pandachinajun.

19Canguna aliguta cazunajushcataca, tucui llactacunapimi uyanajun. Shina cajpimi, ninandapacha cushijuni. Ashtahuangarin, na alita ama rurangapami, alita ruranata ali yachajushca cana canguichi.

20Ali causaiguta caramuj Taita Diosmi, Satanastaca mishashpa, cangunapaj chaqui ucupi churanga. Ñucanchi Apunchi Jesucristopaj ninan juyaica, cangunahuan cachunmi munani.

21Ñucahuan Diospajta rurashpa purij Timoteopash, ñuca llactapuramanda Lucio, Jasón, Sosípater shuti huauquicunapashmi, “alillachu capanguichi” ninajun.

22Caita quilcamuj Tercio shuti ñucapashmi cangunataca, Apunchi Jesusmanda “alillachu capanguichi” nishpa cachamuni.

23Ñucatapash mingachij, crijcuna tandanajuchumbash paipaj huasipi chasquij, Gayo shuti huauquipashmi, “alillachu capanguichi” nijun. Cai pueblopaj culquita tandachishpa ricuj Erasto shuti huauquipash, Cuarto shuti huauquipash, “alillachu capanguichi” ninajunmi.

24Apunchi Jesucristopaj jatun juyaica, tucui cangunahuan cachun ninimi. Chashna cachun.

Quilcaita tucuchijushpa, Diosta alicachishcamanda

25Jesucristo quishpichij cashcata ñuca villashcashnami cangunataca shinllichijun. Cai villanataca, cai pachapash nara tiyajpillata pacashpa charijushcatami villajuni.

26Shina cajpipash, chaitaca cunanmi ña ricuchishca. Profetacuna quilcashcacunapi, causaita causajuj Taita Dios imashna mandashcashna, tucui llactacunapi causajcuna crishpa cazunajuchunmi ricuchishca.

27Tucuita yachaj, shujlla Taita Diosca, Jesucristomanda causaita causaicaman, ninanda alicachi tucushca cachun. Chashna cachun.