COLOSENSES 4 - Quichua Imbabura 2016

1Mandajcunapash, jahua pachapi shuj Mandajta charishcata yachashpami, cangunapaj gañangunamanga, tucuipi alita rurashpa, aliguta charina canguichi.

2Diosta mañanataca na saquishpami, pashi nishpa mañanajunalla canguichi.

3Shina mañanajushpaca, ñucanchimandapash mañapanguichi ninimi. Cristomanda nara uyashca Shimita villanajujpi, punguta pascajshna, Apunchi Jesús yarichijuchunmi Diosta mañana canguichi. Paimanda villajushpami prezu tiyajuni.

4Ñuca aliguta villajuchumbashmi chashna mañana capanguichi.

5Na crijcunahuan cashpaca, punllacuna ama yanga yalichunmi, aliguta yarishpa causana canguichi.

6Pihuan imata parlajushpapash, cachihuan mishquiyachijshnami, aliguta, juyaihuan tigrachina canguichi.

“Aliguta causapanguichi” nishpami tucuchishca

7Ñuca imashna causajujtapash,Tíquico shuti juyashca huauquimi cangunaman villanga. Paica, Apunchi Jesusmandami, na shaijushpa ñucahuan villashpa purijun.

8Ñucanchi imashna causanajujta villashpa, cangunapaj shungupi cushichijuchunmi, paitaca cangunapajman cachamuni.

9Paihuanga, cangunapuramanda, tucuita pactachij, Onésimo shuti juyashca huauquitami cachamuni. Paimi, caipi ima tucujujtapash tucuita villanga.

10Ñucahuan prezu tiyajuj Aristarco shuti huauquipash, Bernabepaj ayllu Marcospashmi, cangunataca “alillachu capanguichi” ninajun. Cangunapajman Marcos chayamujpica, ñuca imashna mandashcashna aliguta chasquipanguichi ninimi.

11Justo ni tucushca, Jesús shuti huauquipashmi, “alillachu capanguichi” nijun. Circuncisionda rurashcapuramandaca, paicunallami, Taita Diospaj llactapi causagrinamanda villashpa, ñucataca ashtahuan shinllichinajuhuarca.

12Cangunapuramanda, Epafras shuti huauquipash, “alillachu capanguichi” nijunmi. Paica, Cristopajta ruraj cashpami, cangunamandaca na cungashpa, Diosta ninanda mañajun. Taita Dios munashcashna shinllitapacha shayarishpa, ima pandatapash na rurashpa, tucuita pactachishpa causachunmi chashna mañajun.

13Cangunatapash, Laodicea shuti, Hierápolis shuti pueblocunapi causaj crijcunatapash, paica yariajunllami. Paitaca, ñuca ricushcapacha cashpami chashna villajuni.

14Ñucanchi juyashca jambij Lucaspash, Demas shuti huauquipashmi, “alillachu capanguichi” ninajun.

15Laodicea shuti pueblopi crijcunatapash, Ninfas shuti panitapash, paipaj huasipi tandanajuj crijcunatapash, “alillachu capanguichi” nijunmi nipanguichi.

16Cai quilcashcata cangunapurapi quilca catishca jipaca, Laodicea pueblopi tandanajuj crijcunamambash quilca catishpa uyachipanguichi. Shinallata, Laodicea puebloman ñuca cachashca quilcatapash japishpa ricupanguichi.

17“Apunchi Jesuspajta rurachun mingashcataca, cazushpa pactachingui” nijunmi nishpa, Arquipo shuti huauquimambash villapanguichi.

18“Alillachu capanguichi” nishpaca, Pablomi, ñuca maquihuambacha quilcajuni. Ñuca prezu tiyajujtaca, ama cungashpa yarihuanguichi. Taita Dios cangunata ninanda juyashca cachunmi munani. Chashna cachun.