HEBREOS 6 - Quichua Imbabura 2016

1Shina cashpaca, Cristomanda yachajunataca, chairalla crij tucushpa yachajunshnaca na causanachu canguichi. Ashtahuangarin, alipacha yachajushcacuna cangapami ñaupajman catina canchi. Huañuiman apana juchata rurashcamanda llaquirinata, Diosta crishpa causanataca ñami yachanguichi. Chaicunatallata, cutin cutin tigrashpaca na yachajunachu canguichi.

2Shinallata, bautizarinamanda, crijcunapaj uma jahuapi maquita churanamanda, huañushcacuna causarinamanda, causaita causaicaman ninanda llaquichi tucunamandaca, chaitallata tigrashpaca na yachajunachu canchi.

3Taita Diospaj munai cajpica, ashtahuanmi yachajushpa catishunchi.

4Diosta crishca jahua, jahua pachapi Dios caranata yachashca jahua, jucha illaj Espiritutapash rijsishca jahua, huashaman tigrashpa, cutin Diospajman tigraritaca napacha ushanallachu.

5Shinallata, Taita Diospaj juyailla Shimitapash, shamui punllacunapaj ninan ushaitapash alicachishpami chasquinajurca.

6Chai tucuita chaquishca jahua, huashaman tigrashpaca, cutin ninanda llaquirishpa Diospajman tigraritaca, napacha ushangachu. Paicunaca, Taita Diospaj Churita cutin chacatajshna na alicachishpa rimachingapami, chashna causanajun.

7Tarpujcuna micuchunga, cutin cutin tamiajpimi, alpaca yacuta chupashpa aligutapacha micuna jihuacunata viñachimun. Shina viñachimujpimi tarpujcunaca, Taita Dios bendiciajpi causanajun.

8Ashtahuangarin cashacunalla, na ali jihuacunalla jundashca cashpaca na alicachi tucushcami. Shina cashpami chai alpaca, Dios llaquichinapacha cajpi, jipa punllapica rupashpa tucuringa.

9Juyashca crijcuna, chashna shinllita rimanajushpapash, cangunaca alipacha crijcuna cashpa, ña quishpirishcatami yachanchi.

10Taita Diosca, ali cashcatalla ruraj cashpami, canguna imatalla ruranajushcataca na cunganga. Diosta juyashpa, Paipajlla causajcunata yanapashcatapash, cunangaman chashna catinajushcatapash na cungangachu.

11Ashtahuangarin cangunaca, tucurimui punllacaman chashnallata aliguta catichunmi munanchi. Canguna shuyanajushcataca, chasquingacaman catinajuchunmi munanchi.

12Na quillanayachinachu canguichi. Ashtahuangarin, Dios carashapacha nishcata crishpa, cushijuihuan shuyajcunata ricushpa catichunmi munanchi.

13Taita Diosca, Abrahamman carashapacha nijushpaca, Diosta yalica pipash na tiyajpimi, Paipaj shutipillata juramentushca.

14Paica: “Candaca ninanda bendiciashpami, canmanda miraicunataca ninandapacha mirachisha” nishcami.

15Abrahamga, cushijuihuan shuyajushpami, Dios carashapacha nijushcataca japirca.

16Gentecunaca paicunata yali jatumbaj shutipimi juramentunajun. Paicuna parlanajushcata ama cutin tigrashpa parlangapami chashnaca juramentunajun.

17Taita Diosca, Paipaj huahuacunaman, “carashapachami” nishcataca na cungashpa, pactachishpa ricuchingapami juramentushca.

18Cai ishcai shimita rimashcataca pactachinapacha cajpimi Taita Diosca napacha llullanga. Chaimandami, “carashapacha” nishcata japigringapa yariajlla shuyajcunaca, ninandapacha cushijuna canchi.

19Chai shuyanami, ñucanchi almataca, ama pandarichun shinllitapacha charijun. Shinallata, Diospaj huasi ucupi huarcushpa, quilpashca fachata yalina ushaitapashmi cujun.

20Chai ucumanmi Jesusca, ñucanchi yaicuna ñanda pascashpa yaicushca. Paica, jatun mandaj Melquisedec sacerdoteshnami causaita causaicaman, sacerdotecunata mandaj tucushca.