JUECES 14 - Quichua Imbabura 2016

Sansonmandapash, Timnat shuti pueblomanda filistea huarmimandapash

1Sansonga, Timnat shuti puebloman urai rishpami, filisteocunapaj ushicunamanda shuj cuitsata juyaihuan ricurca.

2Huasiman vichai tigrashpami, paipaj taita, mamaman cashna nijurca: “Timnat shuti pueblopimi, filisteocunapaj ushicunamanda, shuj cuitsata ricurcani. Chai cuitsahuan cazarachihuaichi nipanimi” nirca.

3Shina nijpimi paipaj taitapash, mamapash cashna ninajurca: “Circuncisionda na rurashca filisteocunapaj ushihuan cazarangapaca, ¿nachu ñucanchi ayllupurapillata, na cashpaca tucui Israelpurapillata, cuitsacuna tiyan imata?” ninajurcami. Shina nijpimi Sansonga, paipaj taitataca: “Chai huarmihuan cazarachihuailla, paitapachami munani” nirca.

4Sansonbaj taita mamaca, filisteocunahuan macanajuchun Mandaj Diosllata chashna rurajujtaca na yacharcachu. Chai huatacunapica, filisteocunami Israelcunataca ninanda llaquichishpa causarca.

5Sansonga, paipaj taitandi mamandimi, Timnat shuti puebloman urai rijurca. Chai pueblopi, uva chagramandaca, shuj maltun leonmi, huacashpa tuparimurca.

6Mandaj Diospaj Espíritu Sansón runapajman shamujpimi chai leondaca, huahua chivota tucuchinshna, maquihuanlla fitishpa tucuchirca. Chashna rurashcataca, paipaj taitamambash, mamamambash na villarcachu.

7Chai jipaca, Sansonga, pai ninanda munashca huarmipajman rishpami, chai huarmihuan rimajurca.

8Huaquin punllacuna jipa, chai huarmihuan cazarangapa tigrajushpami, león huañushca sirijujta ricungapa, ñanmandaca caruyashpa rirca. Chaipica balun chuspicunatapash, chai chuspicuna mishquita rurashcatapashmi ricurca.

9Chai mishquita japishpami, micushpandi rijurca. Paipaj taita mamata japigrishpaca, paicunapash micuchunmi cararca. Shina carashpapash, huañuchishca leonbaj cuerpomanda chai balun mishquita apashcataca, na villarcachu.

10Chai huarmipaj huasiman paipaj taitahuan chayashpami, Sansonga huambracuna jatun micuita rurajshna rurajurca.

11Filisteocunaca, Sansonda ricushpami, quimsa chunga runacunata Sansonbajman pushamurca.

12Paicunatami Sansonga, cashna nirca: “Canguna aliguta yarishpa tigrachinajuchunmi shuj tapuita ruragrini. Canguna aliguta yarishpa, cai jatun micui canchis punllacaman alita tigrachijpica, linota rurashca quimsa chunga churajunatapash, cushijui micuipi quimsa chunga churajunatapashmi carasha.

13Ashtahuangarin cangunaman yachachun nishcata na tigrachi ushashpaca, linota rurashca quimsa chunga churajunatapash, cushijui micuipi quimsa chunga churajunatapashmi ñucaman cunguichi” nircami.

Shina nijpimi paicunaca: “Na yachai ushanalla tapuita rurailla. Ñucanchica, tucuicuna uyashunllami” ninajurca.

14Shina nijpimi paicunataca:

“Huañuchishpa micujmandaca, micunami llujshirca.

Ushaita charijmandaca, mishquimi llujshirca” nirca.

Chai tapuitaca, quimsa punllacamambash na tigrachi usharcachu.

15Ña canchis punlla tucujpimi, Sansonbaj huarmitaca cashna ninajurca: “Candapash, cambaj taitapaj huasi ucupuratapash ama rupachingapaca, cambaj cusa tapushca ima cajta ñucanchiman villachun nipai. Cangunaca, ñucanchi imatalla charishcacunata quichungapallami, caiman cayashcanguichi yarin” ninajurcami.

16Chai jipami Sansonbaj huarmica, paipaj ñaupajpi huacashpa cashna nirca: “Canga, ñucataca millanayachishpami, na juyahuangui. Shinamandami, ñuca llactapi causajcunata can tapushca ima cajtaca na villahuangui” nircami. Shina nijpimi Sansonga: “Ricui, chaitaca ñuca taitamambash, ñuca mamamambash na villashcanichu, ¿canmanrachu villana cani?” nirca.

17Shina nijpipash, chai huarmica, jatun micui canchis punllatami, Sansonbaj ñaupajpi huacajurcalla. Sansonga, paipaj huarmi huacashpa tapujujpillami, ña canchis punlla tucujpica villarca. Shina villajpimi chai huarmica, paipaj llactapi causajcunaman villagrirca.

18Jatun micui tucuri canchis punllapi indi nara huashajujpillatami, chai pueblopi causajcunaca cashna ninajurca:

“Balun mishquita yali mishquica, ¿imapash tiyanllu?

Leonda yali ushaita charijca, ¿imapash tiyanllu?” ninajurcami.

Shina nijpimi Sansonga, cashna nirca:

“Ñuca huarmita na umachi ushashpaca, chai tapushca ima cajtaca, na yachai ushanguichimanllu carca” nircami.

19Chai jipaca, Mandaj Diospaj Espíritu Sansonbajman shamujpimi, Ascalón shuti puebloman urai rishpa, filisteocunamanda, quimsa chunga runacunata huañuchirca. Chai runacunapaj churajunacunata apashpami, tapuicuna ima cashcata villajcunaman curca. Sansonga, ninandapacha fiñarishpami, paipaj taitapaj huasiman tigrarca.

20Pai rijpimi, Sansonbaj huarmitaca, chai micuiman rishca Sansonbaj cumbahuanllata cazarachirca.