1Jatun mandaj Ezequías runaca chaita uyashpami, pai churajushcatapash liquishpa, cañamuta churajushpa, Mandaj Diospaj huasiman yaicurca.
2Chai jipami mayordomo Eliaquim shuti runatapash, quilcaj Sebna shuti runatapash, sacerdotecunata mandaj ancianocunatapash, cañamuta churajushcata, profeta Isaiaspajman cacharca. Isaiasca, Amoz shuti runapaj churimi carca.
3Cashna nichunmi cacharca: “Ezequiasca cashnami nin: ‘Cunan punllamari, ninanda na alicachi tucushpa, rimai tucushpa, ninan llaqui punllapi canchi. Huahuata unguna punlla pactajpi, huahuata unguj huarmishnami, ushai illaj canchi.
4Rabsaces shuti mandaj rimashcataca, canda Mandaj Taita Diosca tucuita uyangapashchari. Paitaca, Asiria llacta gentecunata jatun mandajmi, Taita Diosta na ali shimicunahuan rimachun cachamushca. Chashna rimashcataca, canda Mandaj Taita Diosllata uyapashcami. Shina cashcamanda, caipi saquirishcacunamanda, Diosta mañapailla’ ninmi” nichunmi cacharca.
5Chaita villangapami, Ezequiaspajta rurajcunaca, Isaiaspajman shamurca.
6Chaita villajpimi Isaiasca cashna nirca: “Cangunata mandajman cashna ninguichi: Mandaj Diosca cashnami nin: ‘Asiria llactata jatun mandajpajta rurajcunami, na ali shimicunahuan ñucata ninanda rimarca. Chaita uyashcamandaca, ama manllaichu.
7Ñucami, paimanga, ninan llaquichina villaita cugrini. Chaita uyashpa, paipaj llactaman tigrajpimi, paitaca espadahuan huañuchinga’ ninmi ninguichi” nircami.
8Rabsaces tigrashpaca, Libna shuti pueblopi causajcunahuan macanajujujtami, Asiria llactata jatun mandajtaca tuparigrirca. Paica, Laquis shuti puebloman rishcata yachashpami chashna tigrarca.
9Shinallata, Etiopía llactata Tirhaca shuti jatun mandaj, paihuan macanajungapa llujshimushcatapashmi yacharca. Chaimandami paica, cutin tigramushpa paipaj randi parlajcunata Ezequiasman, cashna nichun cachamurca:
10“Judá llactata jatun mandaj Ezequiastaca, cashna ninguichi: ‘Can yariashpa causajungui, cambaj Taita Dios umachijuchunga, na saquinachu cangui. Paica: Jerusalendaca, Asiria llactata jatun mandajpaj maquipica, na churashachu ningami.
11Asiria llactata jatun mandajcuna, tucui llactacunata tucuchishcataca, alimi yachanguimi. Shina jahuachu, ¿canra quishpirisha yajungui?
12Ñuca ñaupa taitacuna tucuchishca llactacunataca, ¿maijan dioscunallapash quishpichi usharcachu? Paicunaca: Gozán, Harán, Resef pueblocunatapash, shinallata, Edén shuti llactapi tiyajuj Telasar shuti pueblopi causajcunatapashmi tucuchirca.
13¿Hamat, Arfad, Sefarvaim, Hena, Iva shuti pueblocunata jatun mandajcunapash maipitayari?’ ninguichi” nichunmi cacharca.
14Ezequiasca, jatun mandajpaj randi parlajcuna cushca quilcashca fangata japishpa quilca catishpami, Mandaj Diospaj huasiman vichai rirca. Chaipimi Ezequiasca, chai quilcashca fangataca, Mandaj Diospaj ñaupajpi pascarca.
15Ezequiasca, Mandaj Diospaj ñaupajpimi cashna nishpa mañarca: “Querubín angelcunapaj chaupipi causajuj, Israelcunata Mandaj Taita Dioslla. Canllami, cai pachapi tiyaj tucui jatun mandajcunapaj Taita Dios cangui. Jahua pachatapash, cai pachatapash Canmi rurarcangui.
16Mandaj Dioslla, ñuca mañashcaguta uyapai. Shinallata, Mandaj Dioslla, ñucanchi llaqui apanajujta urai ricumupai. Senaquerib runa, Can Taita Diosta na ali shimicunahuan rimashcata uyashpa shayaripailla.
17Mandaj Dioslla, Asiria llactata jatun mandajcunaca, caishuj llactacunapi causajcunatapash, paicunapaj llactacunandi tucuchishcapachami.
18Paicunapaj dioscunatapashmi ninapi rupachirca. Chaicunaca, runacunapaj maquihuan rurashca caspicunalla, rumicunalla cajpimi chashna tucuchinajurca.
19Cunanga, ñucanchita Mandaj Taita Dioslla, chai jatun mandajpaj maquimanda ñucanchita quishpichihuai nipanimi. Cai pachapi mandajuj llactacunapica, can Mandaj Dioslla, Taita Diospacha cajta yachachun, chashna rurapayari” nishpami mañajurca.
20Chaimandami Amoz shuti runapaj churi Isaiasca, Ezequiasman cashna nichun cacharca: “Israelcunata Mandaj Taita Diosca, cashnami nin: ‘Asiria llactata jatun mandaj Senaquerib shuti runa llaquichishcamanda, imatalla Ñucata mañashcataca uyarcanimi’ ninmi.
21Chai jatun mandajtaca, Mandaj Diosca cashnami nijun:
‘Sion pueblopi causajcunaca, jarihuan nara tacarishca cuitsagu asinshnami, candaca yangapi churashpa asinajun.
Jerusalenbi causajcunaca, can tigrashpa rijpica, umata cuyuchishpami asinajun.
22¿Pitata ninanda na alicachishpa, na ali shimicunahuan rimarcangui? ¿Pitata shinlli rimashpa jariyashpa ricujurcangui?
Israel llactapaj jucha illaj Diostamari, chashna rimajurcangui.
23Canga, villaj runacunata cachashpami, Mandaj Diostaca ninanda na alicachishpa, rimashpa cashna nijurcangui:
Ñucapaj ashtaca carretacunahuanmi, urcu pundacunaman, Líbano urcu ashtahuan jahuacunaman vichai rishcani.
Chaipimi, jatun cedro quirucunata, ashtahuan juyailla ciprés quirucunata urmachisha.
Chaipica, ashtahuan caru pushtucunapi, juyailla jihua junda, ashtaca quirucuna shayanajuj pambacunaman rishpami tiyajusha.
24Ñucami, pugyucunata allashpa, ñuca na rijsishcacunapaj yacuta ufiarcani.
Egipto llactata rijuj tucui yacucunatapash, ñuca chaquihuan sarushpami chaquichircani nijurcanguimi.
25Chashna tucunata ñaupa huatacunamandallata Ñuca rurashcataca, ¿nachu uyarcangui?
Chaitaca, punda punllacunallata Ñuca yarijushcataca, ¿nachu uyarcangui?
Cunanga, Ñucami candaca pushamurcani.
Canmi cai pueblo muyundi jatun pircacunatapash urmachishpa, rumi mundundalla saquingui.
26Chai pueblocunapi causajcunaca, na shinllicunachu carca.
Paicunaca, manllashpami ninanda musparinajurca.
Paicunaca, pamba jihuacunashna, micuna llullu jihuacunashna, huasi jahuapi jihuacuna nara ali viñashpallata chaquishcashnami carca.
27Candaca, imashna cajtapash tucuitami yacharcani.
Can maiman rishpa cutin tigramujtapash, can ñucahuan ninanda fiñarishcatapash yachanimi.
28Canga, Ñucahuan ninanda fiñarishpa, ninanda jariyashpami, Ñuca uyajta rimarcangui.
Chaimandami candaca, Ñuca garfio jirruta singapi churachishpa, caballopaj shimipi churachina jirruta, cambaj shimipi churachishpami, maita shamushcata tigrachisha.
29Mandaj Ezequías, chashna tucunataca canmanmi ricuchigrini:
Cunan huatapash, cati huatapash paipaj munai fucushca granotami micunguichi.
Ña quimsa huata tucujpica, canguna tarpushca chagratami tandachinguichi.
Uvatapash tarpushpami, fucujpi micunguichi.
30Judá llactapuramanda pacajushpa puchushcacunaca,
alpa ucupi sapiyashpa saquirishcamanda,
cutin viñamushpa fucunshnami miranajunga.
31Jerusalenbi, puchushcacunami cutin miranga.
Sion shuti urcumandami, na huañushpa quishpirishcacunaca llujshinga.
Tucuita Mandaj Taita Dios Ñuca ninandapacha juyashcamandami, chashna tucunga.
32Chaimandami Mandaj Dios Ñucaca, Asiria llactata jatun mandajmandaca, cashna nini:
Cai puebloman yaicuitaca, na ushanguichu.
Cai pueblopica, shuj flechatallapash na cacharinguichu.
Macanajungapa jarcarinata apashpa, cai pueblo ñaupajpi shayaringapapash na shamunguichu.
Pircashcata yalingapa imata churaitapash, na ushanguichu.
33Maita shamushca ñandallatami tigrangui.
Cai puebloman yaicumuitaca, na ushanguichu.
Mandaj Dios Ñucami, chashna nini.
34Ñucami, cai pueblotaca yanapashpa quishpichisha.
Ninanda juyashpa, Ñucapajta ruraj Davidtapash juyaimandami, chashna rurasha’ ninmi” nichunmi cacharca.
35Chai tutallatami, Mandaj Diospaj angelca, Asiria llacta runacunapaj carpacunaman rishpa, patsaj pusaj chunga huaranga macanajuj runacunata huañuchirca. Cayandi tutamandata jatarishpaca, tucuilla huañushca sirinajujtami ricunajurca.
36Chaimandami, Asiria llactata jatun mandaj Senaquerib shuti runaca, Nínive puebloman tigrashpa chaipi saquirirca.
37Senaquerib runa, Nisroc shuti paipaj diospaj huasipi, chai diosta ninanda alicachijujpimi, Adramelec shuti, Sarezer shuti paipaj churicunallata, espadahuan huañuchirca. Shina huañuchishpaca, Ararat shuti llactamanmi pacajushpa rinajurca. Paipaj randica, Esar-hadón shuti paipaj churimi mandajurca.
Who We AreWhat We EelieveWhat We Do
2025 by iamachristian.org,Inc All rights reserved.
