ISAÍAS CALLARI YUYAI - Quichua Imbabura 2016
CALLARI YUYAIIsaiasca, alipacha profetapurami cashca. Apunchi Jesús huacharingapa, pusaj patsaj huata illajpillatami causajushca. Chai huatacunapimi, Dios ima nishcata villashpa, Diospajta alipacha rurajushca.Cai Isaías quilcashcapica, Taita Diosca tucui ushaita charij, tucuita Mandaj, jucha illaj Dios cajtami, tucuimanda yalica villajun. Chaimandami: “Israelcunapaj jucha illaj Dios” nishpa shutichishca. Shinamandami, Israel llactapipash, caishuj llactacunapipash, Taita Dios imata ruranatapash ricuchishca.Tucui imapash pai rurajpi tiyajta ricuchishpami Israelcunataca, tucui na alimanda anchurishpa, Taita Dios mandajpi tucui shunguhuan cazushpa, paipajlla causanajuchun aliguta yarichishca.Cai Isaías quilcashcataca, quimsa jatun quilcashcacunapi shicanyachishcami.Punda shicanyachishca quilcashcapica, callari capitulomanda 39camanmi, Asiria llactamanda macanajuj runacuna Judá llactapi causajcunahuan macanajungapa shamujpi, Isaías villashca shimicuna tiyajun. Isaiasca, paicunallata Taita Diosta na cazushpa juchata rurashcamanda, Diosta cungashpa causashcamanda, jatun llaqui japinatami villashca. Paica, shimihuambash villashpa, imatapash rurashpa ricuchishpami, gentecunatapash, paicunata mandajcunatapash, yuyaita japinajuchun “Imatapash ali cashcatalla rurashpa ali causaichi” nishpa villajushca.Shinallata “Jipa punllacunapica, Davidpaj miraipuramanda shuj jatun mandaj shamushpami, tucui cai pachapi casilla ali causai tiyachun alipacha mandanga” nishpami villashca.Capítulo 36manda 39camanmi, imalla tucushcata quilcashca.Shujpaj cati shicanyachishca quilcapica, capítulo 40manda 55camanmi, Judá llactapi causajcunata ninan llaqui japijpi, llactaman apanata muscuipishna ricujushcata villashca. Paicuna llaquipi cajpica, Taita Diosllata paicunata huacaichijujtapash, llaquimanda cacharichishpa, cutin paicunapaj llactaman tigrachinatapashmi villashca. Cai shicanyachishca quilcashcapica, Diosca tucui imatalla ruranapipash, Israelcunata callarichinapipash, pai mandajushcatami villajun. Israelcunata paicunapaj llactaman tigrachishpaca, Taita Diosca tucui llactacunapi causajcunaman paimanda villachunmi mingashca.Shinallata, “Mandaj Diospajta ruraj Runa” shuj gentecunapaj juchacunamanda huañunatapashmi villashca. Pai huañujpica, Taita Diosca pai agllashcacunata quishpichinatapashmi villashca.Apunchi Jesusta crijcuna chai shimicunata quilca catishpaca, Apunchi Jesusmandaca pundamandallata villachishcatami ricunajushca. Hechos 8:32-33 ta ricupangui.Ishcaipaj cati shicanyachishca quilcashcapica, capítulo 56 66camanmi, imatapash ali cashcatalla rurashpa ali causanajuchun, aliguta yarichishcata villajun. Ashtahuanga samana punllata alichinamandapash, Taita Diosta mañanamandapash, Diosman animalcunata cushpa huañuchinamandapash aligutami yarichishca.Shinallata Taita Diosca, imata rurangapa munashpapash pactachij cajtapashmi villashca. Isaías 61:1-2 manda yarichishpa, Apunchi Jesús villashcatami, Lucas 18:19 pica villajun. Apunchi Jesusca, Taita Dios mingashcata rurai callarishpaca, cai pachaman imapa shamushcatapash ricuchingapami yarichishca.Shinallata capítulo 65:17-25 caman ricujpica, Apunchi Jesús mandanamandapash, cai pachata, jahua pachata mushujman Taita Dios tigrachinamandapashmi villajun.
