ÉXODO 31 - Quichua Imbabura 2016

Bezaleel shuti, Aholiab shuti runacunata cayashcamanda(Éx. 35:30—36:1)

1Mandaj Diosca, Moisestami cashna nirca:

2“Ñucami Bezaleel shuti runataca agllarcani. Paica, Uri shuti runapaj churimi. Uri shuti runaca, Judá ayllupuramanda, Hur shuti runapaj churimi.

3Bezaleel runamanmi, alipacha yachajushca, ali yuyaita charij, ali yachajushcahuan ruraj, tucui yachaihuan imatapash rurajuchun, Ñuca Espirituta curcani.

4Shina cashpami paica: curimanda, culquimanda, broncemanda imata cashpapash juyaillaguta rurai ushajunga.

5Shinallata, rumicunapipash, caspicunapipash, imapash juyaillagu ricurijuchun, tucui imapipash ruranata ali yachaj cachunmi agllashpa churarcani.

6Bezaleel shuti runahuanga, Dan ayllupuramanda, Ahisamac runapaj churi Aholiab shuti runatami agllashpa churarcani. Ñuca ima mandashcacunata rurachunmi, shungupi ali yachajushcacunaman, ashtahuan yachajuna ushaita curcani.

7Paicunami, Ñucahuan tuparina jatun carpatapash, mandashcacunata alichina cajondapash ruranga. Shinallata, cajonbaj tapatapash, chai huasi ucupi imalla tiyanatapashmi ruranajunga.

8Shinallata, mezatapash, chaipi imalla tiyanacunatapash, mapa illaj curi candelerotapash, chaipi imalla tiyanacunatapash, inciensota cushnichina altartapashmi ruranajunga.

9Shinallata, Ñucaman cushcata tucuillata rupachina altartapash, chaipi imalla tiyanacunatapash, maillangapa pilundapash, pilunda churana bazatapashmi ruranajunga.

10Shinallata, sacerdote Aaronbash, paipaj churicunapash, Ñucapajta ruranajushpa churajunatapashmi ruranajunga.

11Ñucapajlla cachun shicanyachingapa javina aceitetapash, Ñucapajlla ucupi juyaillaguta ashnajuchun churana inciensotapash, paicunami Ñuca mandashcashna tucuita ruranajunga” nijurcami.

Samana punllamanda

12Mandaj Diosca, Moisestaca, ashtahuan cashnatapashmi nirca:

13“Canmi, Israelcunataca cashna nina cangui: ‘Samana punllapica, samashpa pactachinapachami canguichi. Chaica, canhuan Ñucahuan ari nirishcata cangunapaj miraicuna ricushpa yarinami canga. Cangunapaj, Mandaj Dios caimanda, Ñucapajlla cachun agllashcata yachanajuchunmi, chashna rurana canguichi.

14Chai punllataca, Diospajlla shicanyachishca cajpimi pactachinapacha canga. Chaita, maijambash na cazushpaca huañungapachami. Shinallata, pipash chai punllapira imatapash rurajujpica, chai llactamanda llujchishpa cachanami canga.

15Sucta punllacamanllami imatapash rurana canga. Ashtahuangarin, canchis punllapica, Mandaj Diospajlla shicanyachishca cajpimi, samana canga. Samana punllapi imatapash rurashpaca huañungapachami.

16Israelcunaca, paicunapaj miraicunandimi samana punllataca, Ñucahuan ari nirishcata yarishpa, causaita causaicaman pactachinajunga.

17Chaica, Ñucahuan, Israelcunapaj miraicunahuan, ari nirishcata ricushpa yarinami canga.

Mandaj Diosca, sucta punllapimi jahua pachatapash, cai pachatapash churashpa, canchis punllapica tucuita tucuchishpa samarca’ ningui” nijurcami.

Curi shicuta rurashcamanda(Deut. 9:6-29)

18Sinaí urcupi Moiseshuan rimaita tucuchishpaca, imashna causanata mandashpa yachachishca shimicunatami, ishcai jatun tabla rumicunapi, Taita Diosca paipaj maquihuan quilcashpa Moisesman curca.