1Mandaj Diosca, cashnami nijurca:
“Babilonia llactata llaquichingapaca, ninan huairatami cachamusha.
Chaipi causanajuj, Ñucata fiñajcunamanmi chashna cachamugrini.
2Babilonia llactamanga, huairachinshna tucuchijcunata cachamujpimi, tucuilla tucuchinga.
Paita llaquichijui punllapica, tucuicunami llaquichingapa jataringa.
3Flechahuan macanajujcunatapash,
macanajuipaj churajunata churajushca runacunatapash, cashnami nisha:
Chairalla viñaicunatapash na llaquishpami,
macanajuj runacunatapash, tucuilla huañuchina canguichi.
4Caldeo runacunapaj llactapimi, ashtacapacha huañunga.
Ñangunapimi, huañushca sirinajunga.
5Israelcunatapash, Judá llactapi causajcunatapash, tucuita Mandaj, paicunapaj Taita Diosca na jichushpa saquishcachu.
Juchata rurashpa pandarishca cajpipash, Israelcunapaj jucha illaj Taita Diosca, na jichungachu.
6Babilonia llactamandaca llujshishpa richilla.
Quishpiringapa munashpaca, ucha calpaichilla.
Babilonia llacta na ali cashcamanda, ama huañungapa calpaichi.
Mandaj Dios llaquichina punllacunami chayamushca.
Paicunaman cuna cashcatami cugrijun.
7Babilonia llactaca, curi copashnami, Mandaj Diospaj maquipica carca.
Chai copamandaca, tucui llactacunami ufianajurca.
Chai vinota ufiashpami, machanajurca.
Tucui llactacunapi causajcunami, juizu chingashcashna tucunajurca.
8Babilonia llactaca, ñapashmi tucuilla tucurirca.
Paimandaca, ninanda huacaichiyari.
Paimanga jambita cuichilla,
paipaj nanaita anchuchingapashchari.
9Babilonia llactaca jambijpipash, na ali tucurcachu.
Ñucanchi llactacunaman saquishpa jacuchilla.
Paicuna juchata rurashcacunaca, jahua pachacamanmi ricurijun.
Fuyucamanmi chayajun.
10Mandaj Diosca, ñucanchimanmi tucuita alita rurashca.
Cunanga, Sion shuti pueblopi villangapa jacuchi.
Ñucanchita Mandaj Taita Dios imatalla rurashcataca villagrishunchi.
11Macanajungapa flechacunata apariyaj llujshichi.
Macanajuipi jarcarinacunatapash, apashpa llujshichi.
Mandaj Diosca, Babilonia llactata tucuchingapami,
Media shuti llactata jatun mandajcunata yarichishca.
Mandaj Diosca, Paipaj huasita paicuna urmachishcamandami, chashna rurashca.
12Babilonia pueblopaj muyundi pirca jahuacunapi, banderata churaichi.
Chaipi chapashpa shuyaj runacunata, ali ricunajuchun ashtahuan churaichi.
Mandaj Diosmi, llaquichinajuchun mandashca.
Babiloniapi causajcunata llaquichishami nishcataca pactachingapachami.
13Ashtaca yacu rijuj chaupipi tiyajuj llactalla.
Canga, tucuitami imatapash ashtacata charishcangui.
Cambaj causai tucurina punllacunaca, ñami chayamushca.
14Tucuita Mandaj Diosca, Paipaj shutipimi cashna nishpa juramenturca:
Ñucaca, canda fiñajcunataca, langosta jurucunatashna ashtacacunatami cachamugrini.
Paicunami, ninanda caparishpa canhuan macanajungapa shamunajunga” nijurcami.
15Diosmi, Paipaj ninan ushaihuan cai pachataca churarca.
Paipaj ali yuyaihuanmi, cai pachapi tucuita churarca.
Jahua pachatapash chashnallatami juyailla churarca.
16Pai mandajpimi, jahua pachapica, yacucuna tandanajun.
Fuyutapash, cai pacha juchucunamandami vichai apajun.
Paimi, punchapamba shitamushpa tamiatapash cachamun.
Paimi huairatapash cachamun.
17Gentecunaca, imatapash na yachajcunami tucushca.
Imamambash rijchajcunata rurajcunapash, ninandami pingai tucunajun.
Rurashcalla dioscunaca, na causaita charinchu.
Chai dioscunaca, samaitapash na charinchu.
18Chai rurashcacunaca, imapapash na ali cajpi, asishpa ricungapallami.
Llaquichina punllacuna chayamujpica tucuringallami.
19Jacobpaj miraicunaman tucuita caraj Diosca, na chashna tucuringachu.
Paica, tucuita Mandaj Diosmi.
Israelcunataca, Paipajlla cachunmi agllashpa churashca.
20“Babilonia llactapi causajcunalla,
cangunaca macanajuipi huajtangapa martilloshnami canguichi.
Cangunahuanmi, ashtaca llactacunata tucuchisha.
21Cangunahuanmi, caballocunapi tiyarishpa macanajujcunatapash tucuillata tucuchisha.
Cangunahuanmi, carretacunatapash, chai carretacunapi purijcunandi tucuchisha.
22Shinallata cangunahuanmi, jaricunatapash, huarmicunatapash huañuchishpa tucuchisha.
Cangunahuanmi, rucucunatapash, chairalla viñaicunatapash huañuchishpa tucuchisha.
Cangunahuanmi chairalla viñaicunatapash, cuitsacunatapash huañuchishpa tucuchisha.
23Cangunahuanllatami michijtapash, llamacunandi huañuchishpa tucuchisha.
Cangunahuanllatami, pambata yapujcunatapash, paicuna yapunajuj huagracunandi huañuchishpa tucuchisha.
Cangunahuanllatami, mandajcunatapash, cati mandajcunatapash tucuchisha” nijurcami.
24Mandaj Diosca, cashnatapashmi nin:
“Babilonia pueblopi causajcunatapash,
Caldea llactapi causajcunatapash llaquichishami.
Sion pueblota llaquichishcamandami, canguna chashnallata llaquichigrini” ninmi.
25Mandaj Diosca, cashnatapashmi nin:
“Tucuillata tucuchij urculla. Candami ninanda fiñani.
Canmi, tucui llactacunata tucuchircangui.
Candaca Ñucami llaquichigrini.
Rupashpa tucurishca, uchilla urcutashnami saquisha.
26Canda tucuilla tucuchijpica, huasichingapa shuj rumillapash na saquiringachu.
Causaita causaicamanmi, tucuchi tucushpa imapash illaj saquiringui” ninmi Mandaj Diosca.
27Banderata churaichi.
Trompetacunata huacachinajuichi.
Tucuilla chai llactata llaquichingapa tandanajuichi.
Paicunahuan macanajungapaca, Ararat, Mini, Askenaz shuti llactacunamanda runacunapash, tandanajuichi.
Chaipi macanajungapa ringapaca, alipacha mandaj runata churaichi.
Caballocunataca, ninan millai langostacunatashna cachaichi.
28Tucui llactacuna tandanajuichi.
Media shuti llactata jatun mandajcuna tandanajuichi.
Macanajuj runacunata mandajcuna, cati mandajcunandi tandanajuichi.
Canguna mandanajuj llactacunapi causajcunatapash tandachimuichi.
29Babilonia llactata llaquichingapa, Mandaj Dios yarijushcataca ñami pactachigrin.
Babilonia llactataca, jichushca saquirichunmi tucuchigrin.
Chaipica, shuj runallapash na causangachu.
Chaita yachashpaca, cai pachapica tucuicunami manllarinajunga.
30Babilonia llactamanda ninan shinlli macanajuj runacunaca, macanajuita saquircami.
Pacajungapa shinlli torre huasicunapimi pacajugrirca.
Paicunaca, ushaipash illaj tucushpami, huarmicunashna tucunajurca.
Paicunapaj huasicunaca, pungucunapash faquirishcami rupanajun.
31Villangapa rijcunapash, cati catimi calpanajunga
Babilonia llactata jatun mandajpajman villangapami calpanajunga.
Pueblocunata quichushcata villangapami calpanajunga.
32Fiñajcunaca, jatun yacuta chimbanalla pushtucunatapash ña quichurcami.
Macanajuipi shinlli jarcarinacunatapash rupachinajurcami.
Macanajuj runacunapash, ninandapachami manllanajurca.
33Tucuita Mandaj, Israelcunapaj Taita Diosca, cashnatapashmi nin:
“Babilonia llactapi causajcunaca, ña tandachinalla granoshnami tucushca.
Caimanda asha punllacuna jipallami, tandachina chayamugrin” ninmi.
34“Babilonia llactata jatun mandaj Nabucodonosor runami, llaquichishpa tucuchihuarca.
Shina rurashpami, imapash illajta saquihuarca.
Ñucataca, dragón animal micujshnami langahuarca.
Alitalla agllashpa micushca jipaca, shitashpa saquihuarcallami.
35Babilonia llactataca, ñucata llaquichishcamandaca, chashnallata llaquichishca cachun.
Sion pueblopi causajcunami, chashna ninajunga.
Jerusalen pueblopi causajcunaca, ñucanchita huañuchishcamanda chashnallata Caldeo runacunaca huañuchun” ninajungami.
36Shinamandami Mandaj Diosca, cashna nin:
“Ñucami canmandaca shayarisha.
Canda llaquichishcamandami, paicunatapash chashnallata llaquichisha.
Paicunapaj jatun huaicu yacucunatapash, pugyucunatapashmi chaquichisha.
37Babilonia llactaca, rumi mundunllami tucunga.
Chaipica, chacal animalcunallami causanga.
Manllarishpa, asishpa ricunamanmi tigranga.
Chaipica, pipash na causangachu.
38Leonguna huacanshnami, tucuicuna caparinajunga.
Huahua leongunashnami huacanajunga.
39Ninanda cushijurishca tiyanajujpimi, micunatapash, machana vinotapash carasha.
Chashna cushijushca jipaca, causaita causaicaman napacha rijcharingachu.
Mandaj Dios Ñucami, chashna nini.
40Paicunataca, maltun llamacunatashna huañuchina pushtuman apamuchunmi mandasha.
Jari chivotashna, jari llamatashnami chashna apamuchun mandasha.
41Babilonia llactataca, tucui cai pachapi causajcunami ninanda alicachinajun carca.
¡Cunanga llaquichi tucushcamari!
Chaita ricushpaca, tucuicunami ninanda manllarinajun.
42Babilonia llactataca, mama cucha jatarinshnami quilpamurca.
Ninanda yacu jatarinshnami, tucuilla quilpashca.
43Chai llactapaj pueblocunaca, tucuillami tucurishca.
Alpapash chaquishca, jichushcami saquishca.
Chai alpapica, shuj runallapash na causangachu.
44Babilonia llactapaj Bel shuti rurashcalla diostaca, Ñucami tucuchisha.
Pai micushcataca, cutinmi llujchisha.
Cutinga, shuj llactacunamandaca na paipajman shamunajungachu.
Babilonia pueblo muyundi jatun pircapash urmangami.
45Ñuca agllashca gentecunalla,
Chai llactamandaca llujshinami canguichi.
Mandaj Dios Ñuca, fiñarishpa llaquichinamandaca, uchami llujshishpa rina canguichi.
46Cangunaca, na manllanachu canguichi.
Chai llactapi jatun llaquicuna tiyanata uyashpapash, na manllanachu canguichi.
Chai llaquicunaca, huatandimi shamujungalla.
Llactacunata mandajpurami macanajunga.
47Babilonia llactapi tiyaj rurashcalla dioscunata tucuchina punllami chayamujun.
Tucui chai llactami pingai tucunga.
Tucuicunami huañushpa tucuringa” ninmi.
48Mandaj Diosmi, cashnatapash nin:
“Jahua pachapipash, cai pachapipashmi,
Babilonia llactata tucuchijpica, ninanda cushijushpa candanajunga.
Ashtahuan janaj llactamanda runacuna shamushpa llaquichishpa tucuchijpimi, chashna cushijunajunga.
49Israel gentecunata huañuchishcamandami, Babilonia llactaca chashna llaquichi tucunga.
Babilonia llactapi causajcuna, cai pachapi causajcunata huañuchishcamandami chashna tucunga” ninmi.
50Macanajuipi huañunamanda quishpirishcacunaca, na shuyashpa, ucha calpaichiyari.
Mandaj Diostaca, tucui causaipimi yarina canguichi.
Jerusalendapash, chashnallata yarina canguichi.
51Cangunaca, cashnami ninajunguichi:
“Ñucanchita, na alicachishpa rimajta uyashpaca, ninandami pingai tucurcanchi.
Ñucanchica, nimatapash na rurai ushashpami causanajurcanchi.
Caru llactamanda runacuna shamushpa, Mandaj Diospajlla huasita tucuchijpimi, chashna carcanchi” ninguichimi.
52Chaimandami Mandaj Diosca, cashna nin:
“Babilonia llactapi rurashcalla dioscunata tucuchina punllaca, ñami chayamushca.
Tucui chai llactapimi, ninanda llaquichi tucushpa huacanajunga.
53Babilonia llactapi causajcuna, muyundi pircacunata jahua pachacaman chayajta rurashpapash, na quishpiringachu.
Paita llaquichishpa tucuchijcunataca Ñucami cachamuni” ninmi Mandaj Diosca.
54¡Babilonia llactapica, ninanda caparinajujmi uyarin.
Caldeo gentecunaca, jatun llaquihuanmi ninanda caparinajun!
55Mandaj Diosmi, Babilonia llactataca tucuchinga.
Chaipi causajcuna ninanda jariyashpa rimanajujtaca, Paimi anchuchinga.
Paicunata fiñajcunaca, mama cucha yacushnami jataringa.
Manllanayaita, ashtaca yacu huacanshnami caparinajunga.
56Babilonia llactata fiñashpa tucuchijcunami shamunajun.
Paipaj ninan shinlli macanajuj runacunapash, prezumi japi tucunajurca.
Paicunapaj arcopash faquirircami.
Mandaj Diosca, imata cashpapash tigrachij Taita Dios cashpami, chashna llaquichinga.
57Tucuita Mandaj Dios Ñucami, cashna nini:
“Babiloniapi mandajcunaman, yachajcunaman, macanajuj runacunata mandajcunaman, ninan shinlli runacunamanmi machana vinota caragrini.
Chashna machachijpimi, causaita causaicaman cutinga na jataringa” ninmi.
58Tucuita Mandaj Diosca, cashnatapashmi nin:
“Babilonia pueblo muyundipi shayajuj jatun pircapash, tucuillami urmanga.
Chai pircapi tiyaj jatun pungucunapash, uchufallami saquiringa.
Gentecunaca, yangallatami tucuita ruranajurca.
Ninapi rupachunmi, shuj llactacunapi causajcunapash imatapash ruranajurca” ninmi.
59Judá llactata jatun mandaj Sedequías runahuan, Babilonia llactaman rijujpimi, profeta Jeremiasca, Nerías runapaj churi Seraías runaman, shuj villanata mingashpa cacharca. Nerías runaca Maasías runapaj churimi carca. Sedequías runaca, ñami chuscu huatata mandajurca. Seraías runaca tucuita ricushami alicachijurca.
60Babilonia llactaman tucui ima llaquicuna shamunatami Jeremiasca, pillushca shuj carapi quilcarca. Babilonia llactata imashna llaquichinata quilcashcami, chaipica tiyajun.
61Jeremiasca, Seraías runataca cashnami nijurca: “Babilonia llactaman chayashpaca, tucui cai shimicunata ricushpa, quilca catingui.
62Chai jipaca, cashna nishpa mañangui: ‘Mandaj Dioslla, Canmi cai Babilonia llactataca fiñashpa tucuchisha nircangui. Chaipica, shuj gentellapash, shuj animalcunallapash, causaita causaicamanmi na tiyangachu nircanguimi’ ningui.
63Cai quilcashcata, quilca catishca jipaca, shuj rumita huatashpa, Éufrates yacu chaupiman shitangui.
64Chaiman shitashpaca, cashna ningui: ‘Babilonia llactaca, chashna tucurishpami, cutinga na jataringa. Llaquicunata Dios cachamushcamandami, cutinga na jatarishpa, chingaita chinganga’ ningui” nijurcami.
Jeremías villashca shimicunaca, caicamanllami carca.
Who We AreWhat We EelieveWhat We Do
2025 by iamachristian.org,Inc All rights reserved.
