DANIEL 4 - Quichua Imbabura 2016

Nabucodonosor runa, yuyai illaj tucushcamanda

1Jatun mandaj Nabucodonosor runaca, tucui llactacunapi, pueblocunapi causajcunata, shuj shuj rimaipi rimaj tucui gentecunatami, cashna nirca: “Cangunaca, ashtahuan ali causaita charishca cachun ninimi.

2Jahua pachapi causajuj Taita Dios, imatapash juyaillata rurashpa ricuchishcata, pipash na rurai ushanallacunata rurashpa ñucaman ricuchishcataca, cangunaman villana ali cajpimi villajuni.

3¡Imatapash juyaillata rurashpa ricuchishcacunaca jatumbachamari! ¡Manllarinacunata Pai rurashcapash, tucui ushaihuan rurashcacunamari! Pai mandana llactaca, causaita causaicaman napacha tucurij mandana llactami. Cati cati miraicunatapash mandajungallami.

4Nabucodonosor runa ñucami, ñuca huasipi samajurcani. Mandashpa tiyajuna huasipi imalla charishcacunahuan cushijushpami causajurcani.

5Shuj tutami, ninanda manllarinata muscushpa ricurcani. Camapi sirijujpillata ñuca yuyaipica, muscuipi ricushcata maitapash yarijushpallatami, imata ruraita na ushajurcani.

6Chaimandami, ñuca muscushcacuna ima cajta villachunga, Babilonia llactapi causaj tucui alipacha yachajushcacunata, ñuca ñaupajman pushamuchun cacharcani.

7Shinamandami yachajcuna, luzerocunata ricujcuna, caldeo runacuna, yumbucunapash shamunajurca. Paicunaman ñuca muscushcata parlajpipash, chai muscui ima cajtaca na villai ushanajurcachu.

8Shina cajpimi Danielca, ñuca ñaupajman shamurca. Paipaj shutica, ñuca diospaj shutishnallata Beltsasar shutimi. Paipica, jucha illaj Diospaj espiritumi causajun. Paimanmi, ñuca muscushcataca cashna nishpa villarcani:

9‘Yachajcunata mandaj Beltsasar shuti runa, ñucaca jucha illaj Diospaj espíritu cambi causajujtami ña yachani. Pipash na yachai ushanallacunapash, cambica na pacalla cai ushanllu. Shina cashcamandaca muscuipishna ñuca ricushcatapash, chai muscui ima cajtapash villahuailla’ nircani.

10Ñuca camapi sirijushpaca, ñuca yuyaipica cashnatami muscuipishna ricurcani: Cai pacha alpa chaupipica, shuj quiru shayajujta ricushcatashnami yarini. Chai quiruca jatumbachami carca.

11Chai quiruca, ashtahuan viñashpami shinlli shinlli tucurca. Chai quiru pundaca, jahua pachacamanmi viñarca. Chaitaca, tucui cai pachamanda, maimandapash ricunallami carca.

12Fanga junda, juyailla quirumi carca, granocunapash ninandami fucujurca. Chaipi fucushca granocunaca tucuicuna micungapami pactarca. Tucui animalcunapash, chai quiru ucupimi, llandushpa sirinajurca. Jahuata rij alasyu animalcunapash, chai quirupimi causanajurca. Ima cashpapash causaita tucui charijcunaca, chai quirumandami micushpa causanajurca.

13Ñuca camapi sirijushpami, ñuca yuyaipica muscuipi cashnatapash ricurcani: Jucha illaj shuj angelmi, jahua pachamanda urai shamurca.

14Paica, cashna nishpami ninanda caparijurca: ‘Chai quirutaca urmachinguichi. Chai quiru malquicunatapash, tucuillata fitinguichi. Fangacunatapash tucuillata anchuchinguichi. Chaipi fucushca granocunatapash, caiman chaiman shitanguichi. Chai quiru ucupi sirinajuj animalcunatapash, malquicunapi tiyanajuj alasyu animalcunatapash calpachinguichi.

15Ashtahuangarin, racu sapitapash, alpa ucuman sapicunatapash chaipillata saquichilla. Chaitaca, jirru cadenacunahuan, bronce cadenacunahuan, pamba jihua chaupicunapi huatashpa saquichi. Chaica jahua pachamanda urmashca jamzi paramuhuan mutiyashpa, animalcunahuan pacta purishpa, pamba jihuata micuchunmi saquina canguichi.

16Paipaj shungutapash, runapaj shungupaj randica, animalpaj shungutashna cuchun. Canchis huatacaman chashna causachun.

17Shina tucuchun mandashcataca, jucha illaj villaj runacunami, chashna mandarca. Chaitaca, cai pachapi causajcunataca, jahua pachapi causajuj Dios tucuita ricushpa mandajujta yachachunmi, chashna villarca. Paillatami, chai mandana ushaitaca piman cungapa munashpapash cushpa, ali shunguta charij runatapash mandanapi churajlla cajta yachachunmi, shina villajurca’ nijurcami.

18Cai muscuitaca, jatun mandaj Nabucodonosor ñucami ricurcani: Chai muscui ima cajtaca, can Beltsasarmi villana cahuangui. Ashtahuangarin ñuca mandajuj llactapi tiyaj ninanda tucui yachajushcacunapash, chai muscui ima cajtaca na villai ushanllu. Cambica, jucha illaj Diospaj espiritumi causajun. Shina cashcamandami, ñuca muscushcataca villai ushangui” nijurcami.

19Shina nijpimi, Beltsasar nishpa shutichishca Danielca, imatapash na rurai ushashpa unaita upalla saquirirca. Chaimandami jatun mandajca, cashna nirca: “Beltsasar, ñuca muscushcata canman villajpi, chai muscui ima cajta ñucaman villanamandaca, ama manllarichu” nircami. Shina nijpimi Beltsasar runaca, cashna nijurca: “Ñucata mandajlla, cambaj muscuica canda fiñajcunapaj cashpami ali canman. Canda llaquichingapa munajcunapi pactashpami ali canman.

20Canga, shuj quiru viñashpa, shinlli shinlli tucuntami ricurcangui. Chai quirupaj umapash, jahua pachacaman chayajtami ricurcangui. Chai quirutaca, cai pacha manñacunamandapash, ricunalla cajtami ricurcangui.

21Chai quirupaj fangapash juyailla, granocunapash ninandami fucujurca. Chaipi fucushca granoca, tucuicuna micungapa pactanami carca. Chai quiru ucupimi, animalcunapash causanajun carca. Chai quiru malquicunapimi, jahuata rij alasyu animalcunapash, tazinda ruranajun carca.

22Jatun mandajlla, canllatami chai quiru viñanshna jatun tucushpa, ninan shinlli tucurcangui. Jahua pachaman chayajta jatun tucushpami cai pacha tucuri manñacunacaman mandajungui.

23Can jatun mandajca, jahua pachamanda jucha illaj ángel urai shamujtami ricurcangui. Paica cashnami nijurca: ‘Chai quirutaca, fitishpa tucuchishpa saquichi. Ashtahuangarin, racu sapitapash, alpa ucuman sapicunatapash chaipillata saquichilla. Chaitaca, jirru cadenacunahuan, bronce cadenacunahuan, pamba jihua chaupicunapi huatashpa saquichi. Chaica jahua pachamanda urmashca jamzi paramuhuan mutiyashpa, animalcunahuan pacta purishpa, pamba jihuata micuchunmi saquina canguichi. Canchis huata yalingacaman chashna causachun saquichi’ nijurcami.

24Jatun mandajlla, jahua pachapi causajuj Diosca, can jatun mandajta llaquichingapami, cai muscui ima cajtaca cashna villachijun:

25Candaca, gentecunapaj chaupimanda shitajpimi, pambapi animalcunahuan causangui. Candaca huagratashnami, jihua pambacunapi michinajunga. Canga, jahua pachamanda urmashca paramuhuanmi armachishca cangui. Canchis huatacamanmi, chashna causangui. Runacuna mandana llactataca, jahua pachapi causaj Dioslla mandajujta, shinallata chai mandanataca, Pai piman cungapa munashpapash, cujlla cajta can yachangacamanmi, chashna causangui.

26Shinallata racu sapitaca, alpa ucupi sapicunandi chaipillata saquichun mandajtami ricurcangui. Chaica, jahua pachamanda tucuita mandaj cajta can yachashca jipaca, can mandajushca llactataca, canllata cutin japinatami villajun.

27Shina cashcamandaca jatun mandajlla, ali yuyaita ñuca cushcata uyahuailla: Tucuita alitalla rurashpallami, chai juchamandaca cacharichi tucungui. Na alicunata can rurashcata anchuchijuchumbash, llaquichi tucushpa causajcunata llaquishpami causana cangui. Shina rurashpaca, imapash na tucushpa, aligutapacha causai ushanguipashchari” nijurcami.

28Tucui caicunami, jatun mandaj Nabucodonosor runapajman shamurca.

29Shina villashcamandaca, ña huata tucujpimi, jatun mandajca, Babilonia llactapi mandashpa tiyajuna huasipi caiman chaiman purijurca.

30Shina purijushpami, cashna rimari callarirca: “Cai jatun Babilonia pueblotaca, ¿nachu ñuca rurachircani? Caitaca, ñuca mandana huasita caipi charingapami, ñuca ninan ushaihuan rurachircani. Ñuca mandajushcamanda ninanda alicachi tucungapami, caitaca rurachircani” nirijurcami.

31Jatun mandaj chashna nirijujpillatami, jahua pachamanda cashna nij uyarirca: “Mandaj Nabucodonosor, candami cashna nirca: ‘Can mandana llactataca, ña quichui tucurcanguimi.

32Candaca, gentecunapaj chaupimanda shitajpimi, pambapi animalcunahuan causangui. Candaca huagratashnami, jihua pambacunapi michinajunga. Canchis huatatami chashna causangui. Runacuna mandana llactataca, jahua pachapi causajuj Dios mandajujta, shinallata chai mandanataca, Pai piman cungapa munashpapash cujlla cajta yachangacamanmi, chashna causangui’ nircami” nijunmi uyarirca.

33Chai punllallatami, Nabucodonosor runa chashna tucunaca pactarca: Shinamandami, gentecunapaj chaupimanda llujchishpa shitai tucurca. Micunatapash, huagrashnami jihuatalla micujurca. Shinallata jahua pachamanda urmashca jamzi paramuhuanmi mutiyajurca. Paipaj tucui aichapimi, jatun angapaj plumashna milmacuna viñarca. Sillucunapash, alasyu animalcunapaj sillucunashnami tucurca.

34Ashtahuangarin, ñuca chashna purijuna tucuri huatacuna pactajpimi, Nabucodonosor ñucaca, jahua pachata vichai ricurcani. Shina ricujpimi, gentepaj yuyaita ñucaman tigrachihuarca. Chaimandami, Jahua pachapi causajuj Diostaca ninanda alicachishpa cashna nircani:

“Causaita causaicaman causajuj Diostaca,

jatunmi cangui nishpami alicachircani.

Pai mandana llactaca, causaita causaicaman na tucurishpa mandanami.

Paica, tucui mirai miraicunacaman mandajungallami.

35Paipaj ñaupajpica, cai pachapi causajcunaca imapash na canllu.

Paimi, jahua pachapi ima tiyajcunata,

tucui cai pachapi causajcunataca, pai imashna yarishcata ruran.

Paipaj maquihuan imata rurajujpipash,

paipaj maquita charishpa:

‘¿Imatata rurajungui?’ nitaca, pipash na ushanllu” nircanimi.

36Chai punllallatami, gentepaj yuyaita tigrachihuarca. Ñuca mandashpa tiyajuna llactatapash, alicachi tucunapash, jatun canapash ñucamanmi tigramurca. Ñuca churashca mandajcunapash, ñucaman ali yuyaita cujcunapashmi ñucataca mascahuarca. Shinami ñucaca, ñuca mandana llactata cutin mandajurcani. Chai jipaca, punda charishca ushaitapash yali ushaitami carahuarca.

37Cunanga, Nabucodonosor ñucaca, jahua pachata Jatun Mandajtami ninanda alicachishpa jatunyachini. Pai tucui imata rurashcapash na llullachu, imatapash aligutapachami rurajun. Paica, jariyashpa jatun tucujcunatapash pingaichi ushambachami.