2 CORINTIOS 8 - Quichua Imbabura 2016

Diospajlla causajcunaman ofrendata tandachishcamanda

1Juyashca crijcuna, Macedonia llactapi tandanajuj crijcunata, Taita Dios ninanda juyashcata canguna yachachunmi caitaca villanchi.

2Paicunaca, jatun llaquicuna japijpipash ninandami cushijunajurca. Imaguta na charishpapash, carana munaita ninandapacha charishpami caranajurca.

3Paicunaca, imata carai ushanagutapash ninan cushijuihuanmi caranajurca. Huaquimbicarin, ashtahuan yalishpami caranajurca. Chaitaca ñucapacha ricushca cashpami villajuni.

4Diospajlla causajcunaman, imagutapash carangapa ninanda munashpami, “carachun saquihuaichi” nishpa ninanda mañanajurca.

5Paicunaca, ñucanchi shuyanajushcatapash ashtahuan yalishpami tandachirca. Pundaca, Apunchi Jesuspaj maquipi mingarishpami, ñucanchimambash villashpa, Dios munashcashna chashna ruranajurca.

6Titomi, canguna carashcata tandachingapaca callarirca. Chaimandami, “ashtahuan tandachishpa catipanguichi” nishpa ninanda mañarcanchi.

7Canguna imashna crishcatapash, Diospaj Shimita yachajushcatapash, alipacha yachajushca canatapash, tucuipaj ali shunguta charinatapash, juyaita charishcatapash, tucuicunami yachan. Imashnami tucuipi ali canguichi, shinallata, ninanda juyashpa carachumbashmi mañanchi.

8Mandashpaca na chashna nijunichu. Ashtahuangarin, caishujcuna ninanda cushijushpa carashcata yachashpa, canguna imata carashpapash tucui shunguhuan, juyashpa carachunmi munani.

9Ñucanchi Apunchi Jesucristoca ninanda juyashpami, ninan charij cashpapash, imagupash illaj tucushpa shamurca. Canguna imata na charishpapash, charij tucuchunmi paica chashna tucurca.

10Cangunapaj ali cachunmi, caitaca yarichijuni. Cangunaca, caina huatallatami, paicunata juyashpa, carangapa ña tandachi callarircanguichi.

11Cunanga, juyaimanda carangapa tandachi callarishcataca, canguna carai ushanaguta cushijuihuan carashpa pactachinguichilla.

12Tucui shunguhuan carangapa munashpa, ima charishcaguta carajpica, Diosca chasquinllami. Imapash illashpata carachunga na nijunllu.

13Canguna yanapashcamanda, shujcuna charijyajpi, cangunaca imagupash illaj saquirichunga na chashna nijunichu.

14Ashtahuangarin, cunanbi canguna charishcataca, paicunapaj imagu illajpipash caranguichilla. Shina carajpimi, paicunapash, cangunaman randi caramunga. Chashnami cangunapash, paicunapash shinallata charinguichi.

15Quilcashcapica cashnami nijun: “Ashtacata pallajpash, na yapalla charircachu. Ashagutalla pallajpash, na illaj saquirircachu” nijunmi.

16Ñucashnallata, Titopash cangunata yanapana munaita charishcamandami Taita Diostaca “pashi” nijuni.

17“Ripai” nishpa ñuca mañajpimi, Titoca, paipash ninanda ringapa munashpa rirca.

18Titohuanga, quishpirinamanda villaj shuj huauquitapashmi cachanajunchi. Paitaca tandanajushca tucui crijcunami alicachinajun.

19Shinallata, tandanajushca crijcunami, ofrendata apashpa ñucanchihuan richun paitaca agllarca. Cangunata yanapana munaita charishpa, Taita Diosta alicachingapami chashna ruranajunchi.

20Pipash ama ñucanchita juchachinajuchunmi, cai ashtaca ofrendataca, taucapura tandachinajunchi.

21Jatun Diospaj ñaupajpipash, gentecunapaj ñaupajpipash, ama juchachi tucungapami chashna aliguta ruranajunchi.

22Paicunahuanga, shuj huauquitapashmi cachamunajunchi. Paitaca, imatapash aliguta rurajujtami cutin cutin ricurcanchi. Cunanga, cangunata ninanda crishpami, cushijuihuan tucuita rurangapa ashtahuan munashpa shamujun.

23Titoca, ñucapaj cumba cashpami, cangunapaj ali cachun, ñucashnallata tucuita aliguta rurajun. Caishuj huauquicunapash, tandanajushca crijcunaman villashpa purijcuna cashpami, Cristotaca ninanda alicachinajun.

24Paicunataca juyaihuan chasquipanguichi, chashna rurashpami tandanajushca crijcunamanga, ñucanchi villashcashna, canguna ali crij cashcata ricuchinguichi.