2 CRÓNICAS 17 - Quichua Imbabura 2016

Josafat runa mandajushcamanda

1Asa shuti runapaj randica, paipaj churi Josafat runami, Judá llactataca mandajurca. Paica, shinllipachami Israelcunahuan macanajurca.

2Judá llactapi tiyaj muyundi pircahuan jarcashca tucui pueblocunapimi, macanajuj runacunata churarca. Shinallata, Judá llactapipash, paipaj taita Asa shuti runa quichushca, Efraín llacta pueblocunapipashmi ricuj runacunata churarca.

3Paipaj ñaupa taita David causashcashna, aliguta causashpa, Baal shuti dioscunata na mascajpimi, Mandaj Diosca, Josafat runahuan pacta carca.

4Ashtahuangarin paipaj taitapaj Taita Diosta mascashpami, Dios mandashcacunata cazushpa, Israelcuna na alita rurashcashnaca na rurajurca.

5Chashna cajpimi Mandaj Diosca, Josafat runa mandanataca shinllitapacha rurarca. Judá llactapi tucui causajcuna, impuestota cushpa causanajujpimi, Josafat runaca, ninan charijpash, ninanda alicachi tucushcapash carca.

6Josafat runaca, Mandaj Diosta cazushpa causana yuyaitami, paipaj shungupi ashtahuan japirca. Paica, lomacunapi altarcunatapash, Judá llacta chaupipi tiyaj Asera shuti huarmi diosman rijchajcunatapashmi anchuchirca.

7Paica, ña quimsa huatata mandajushpami, Ben-hail, Abdías, Zacarías, Natanael, Micaías shuti cati mandajcunataca, Diosmanda yachachinajuchun, Judá llacta pueblocunaman cacharca.

8Paicunahuanga, Semaías, Netanías, Zebadías, Asael, Semiramot, Jonatán, Adonías, Tobías, Tob-adonías shuti levitacunatapash, Elisama shuti, Joram shuti sacerdote runacunatapashmi cacharca.

9Judá llactapica, Mandaj Dios mandashpa quilcachishcata apashpami yachachinajurca. Judá llactapi tucui pueblocunaman rishpami, gentecunaman yachachishpa purinajurca.

10Chaimandami, Judá llacta muyundipi tiyaj llactacunata tucui mandajcunaca, ninandapacha Mandaj Diosta manllanajurca. Shinamandami, Josafat shuti runahuan macanajungapaca na munanajurca.

11Filisteocunapashmi, tucui caranacunata, impuestota cuna culquita, Josafat runaman apamunajurca. Arabecunapashmi canchis huaranga canchis patsaj maltun llamacunata, canchis huaranga canchis patsaj jari chivocunata apamunajurca.

12Josafat runaca, ashtahuan ashtahuanmi, ninan ushaita japishpa catijurca. Paica, Judá llactapica shinlli torrecunata, granocunata alichina pueblocunatapashmi rurachirca.

13Judá llacta pueblocunapica, tucui imatapash ashtacatapachami charirca. Shinallata, macanajunata ali yachaj, shinlli runacunatapashmi Jerusalenbi charirca.

14Chai runacunapaj ñaupa taitacunapaj huasi ucupuracunaca, Judá llactapi huaranga huaranga runacunata mandajpuramandaca, Adnas shuti runami, quimsa patsaj huaranga ashtahuan shinlli runacunata mandajurca.

15Paipaj catica, Johanán shuti mandajmi, ishcai patsaj pusaj chunga huaranga runacunata mandajurca.

16Chaipaj catica, Zicri shuti runapaj churi Amasías shuti runami mandajurca. Paica, paipaj munaillatami, Mandaj Diospajta rurangapa ari nishca carca. Paica, ishcai patsaj huaranga shinlli runacunatami mandajurca.

17Benjamín ayllupuramandaca, imatapash na manllaj Eliada shuti runami, ishcai patsaj huaranga runacunata mandajurca. Chai runacunaca arcocunahuan, macanajuipi jarcarina jirrucunahuan alichirishcacunami carca.

18Chaipaj catica, Jozabad shuti runami, macanajuiman rinalla, patsaj pusaj chunga huaranga runacunata mandajurca.

19Paicunami, jatun mandaj Josafat runapajta rurajcuna carca. Tucui Judá llacta muyundipi jatun pircahuan pueblocunapi churashca runacunatacarin, na yupashcachu carca.