1Súah llactamanda Bildad shuti runaca, cashnami nirca:
2“¿Ima punllacamanda rimajugringuilla?
Ali yuyaita japi, chai jipaca parlashunllami.
3¿Imashpata ñucanchitaca, animalcunatashna ricujungui?
¿Imashpata juizu illajcunatashna ricujungui?
4Ninanda fiñarishpa tucurijun runalla.
¿Canmandachu llactaca jichui tucunga?
¿Jaca rumicunapashchu, cuyuchi tucunga?
5Diosta na manllajcunaca causaita quichui tucungami.
Paicunapaj causaica tucuringallami.
6Paipaj carpapi michapash asha asha yanayangami.
Punchayachijuj paipaj lamparapash huañungami.
7Ucha purij cashpapash, alimandallami puringa.
Pai na alita yarijushcallatami urmachinga.
8Pai purinapica, pandachingapami linllita shitanga.
Chaipillatami paica japi tucunga.
9Paipaj chaquica, lazuhuanshnami japi tucunga.
Paitaca, tugllata churashpami japinga.
10Paita urmachina huascapash, pacashcami tiyajun.
Paita japina tugllatapash, ñambimi churashca.
11Maimandapash, llaquicuna shamushpami manllachinga.
Shinami ninanda manllachishpa calpachinga.
12Yarjaimandami ushaipash tucuringa.
Ninanda llaqui apanapash, paihuanmi pacta canga.
13Ungüimi, paipaj cuerpo aichataca ismuchinga.
Huañuimi, paipaj cuerpo aichataca micushpa tucuchinga.
14Paipaj ali causaitaca, carpamanda carumanmi shitanga.
Ninanda manllachij huañuimi paitaca japinga.
15Paipaj carpapillatami, na paipaj carpapishna causajunga.
Paipaj huasi jahuapica, azufretami chafsinga.
16Alpa ucupica, sapicunami chaquinga.
Jahuapica, malquicunami chaquinga.
17Paitaca, cai pachapica pipash na yaringachu.
Paipaj shutitaca, ñangunapipash na yarinajungachu.
18Punchalla michamandaca, yana tutamanmi shitai tucunga.
Cai pachamandapash, anchuchi tucungami.
19Paipaj llactapica, paipaj miraicunacana na tiyangachu.
Paipaj huasicunapica, pipash na causaihuan saquiringachu.
20Indi huashajunman causajcunapash ninandami manllaringa.
Indi llujshimujman causajcunapash, manllarishpami chujchunajunga.
21Diosta na manllaj runapaj causaica, chashnami tucuringa.
Taita Diosta na rijsij runapash, shinallatami canga” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
