1Caihuanga, quimsacamanmi cangunapajman shamugrini. Ishcai cashpa, na cashpaca quimsa cashpapash ricushpa villaj tiyajpimi, ima llaquitapash alichina canguichi.
2Punda nishcashnami, cunambash cangunahuan chaipi cashcashnallata nigrini. Juchata punda rurajcunatapash, tucui na cazujcunatapash, cutin shamushpaca fiñarishpami “llaquichinapacha cani” nishpa, carupi cashpapash quilcamuni.
3Cangunaca, Cristo imata villachumbash, ñucaman yarichijushcata yachangapami munanguichi. Cristoca, imatapash na rurai ushanshnaca na canllu, ashtahuangarin, ninan ushaita charishcatami cangunapurapica ricuchijun.
4Cristoca, imatapash na rurai ushanshnami chacatai tucurca. Shina cashpapash, Taita Diospaj ushaihuanmi causajun. Shinallatami ñucanchipash, ushaita na charijshnalla cashpapash, paihuan shujlla tucushpa Diospaj ushaihuan cangunapaj ali cachun causashun.
5Cangunallatami, imashna crij cashcatapash yachana canguichi. Chaitaca, cangunallatami yarina canguichi. Jesucristo cangunapaj shungupi causajujtaca ¿nachu yachanguichi? Chaita na yachashpaca, nara ali crijcunachu canguichi.
6Ashtahuangarin ñucanchitaca, alipacha crij cajta canguna yachachunmi munani.
7Imatapash na alita canguna ama rurachunmi, Taita Diosta mañanajunchi. Ñucanchilla alipi ricuringapaca, na mañashpami canguna alita rurashca ricurichun chashna mañanajunchi. Ñucanchita na alicachijpipashmi, chashna ruranajunchi.
8Shina cashpami, na llullashpa villajuj Shimitaca imata ruraitapash na ushashpa, chai Shimitaca ninanda alicachinchi.
9Shinamandami, ñucanchica ushaita na charishpapash, canguna shinllipacha crij cajpi cushijunchi. Canguna ima pandatapash ama rurachunmi Diostaca mañashpa catinchi.
10Chaimandami cangunapajman shamushpa, ama yapata llaquichingapa, nara shamushpallata, cashnataca quilcani. Canguna ashtahuan alipacha crishpa, ama chingagrichunmi, cangunata yanapachun, Apunchi Jesusca ushaita carahuarca.
Quilcaita tucuchijushpa Diosta alicachishcamanda11Cunanga juyashca crijcuna, ninanda cushijushpa, ima pandatapash na rurashpa catinguichi. Shujmanda shujmanda ali yuyaita charishpa, shujllashnalla yarishpa, ali causaita charipanguichi. Shina causajpimi, ninanda juyashpa causaj Taita Diosca, llaqui illaj causaita carashpa cangunahuan canga.
12Caishujmanda chaishujmanda, ninanda juyarishpami “alillachu capanguichi” nina canguichi.
13Diospajlla causajcunaca, tucuillami cangunataca “alillachu capanguichi” ninajun.
14Apunchi Jesucristopaj ninan juyaipash, Taita Diospaj juyaipash, Jucha Illaj Diospaj Espiritumanda, tucui canguna shujllashnalla causanapash, cangunahuan cachunmi munani. Chashna cachun.
Who We AreWhat We EelieveWhat We Do
2025 by iamachristian.org,Inc All rights reserved.
