HEBREOS 2 - Quichua Imbabura 2016

Quishpirinaca ninan alipachami

1Shina cashcamandami ñucanchica, imata uyashcatapash, imata cashpapash ashtahuan ucha rurana canchi. Na chashna catishpaca pandarishunchimi.

2Ñaupa punllacunapi angelcuna villashca shimicunaca, napacha llullachu carca. Chaita na cazushpa na alita rurashcamandami, llaquichi tucuna cashcamandallata llaquichi tucunajurca.

3Cai juyailla quishpirinata na alicachishpa saquishpaca, ¿imashnata ninanda llaquichi tucunamandaca quishpirishun? Imashna quishpirinatapash, Apunchi Jesusmi pundata ña villashca. Chai jipami, Pai villashcata uyajcunaca, alipacha yachashpa villanajurca.

4Taita Diosca, paicunahuan villajushpaca, pipash na rurai ushanallacunata, jatun manllarinacunata, shuj shuj juyailla ruranacunata ricuchishpami villajurca. Shinallata, jucha illaj Paipaj Espiritupash ushaita cushpami, Pai munashcashna pactachirca.

Jesucristomi quishpirinataca callarichishca

5Mushuj llacta shamunamandami villanajunchi. Chai llactata mandachunga, Diosca na angelcunaman ushaita carashcachu.

6Ashtahuangarin Dios quilcachishca Shimipica, maijanllarimi, maipichari cashna nishpa villajushca:

“Runaca, ¿ima cajpita paitaca yarijungui,

na cashpaca huañuna aichayuj runataca, imamandata ricuj shamungui?

7Paitaca, ashamandallami na angelcunatashna rurashcangui.

Paitaca, juyailla coronata churachijshnami alicachishcangui.

Paitaca, Cambaj maquihuan rurashcacunata mandachunmi churashcangui.

8Tucui ima tiyashcatapash, Paiman ushaita cushpami cazuchishcangui” nijushcami.

Tucui imatapash cazuchishpa charijushpami, imallapash Paita na cazushpa tiyajuchunga na saquirca. Ashtahuangarin, tucui imatapash cazuchijujtaca nara ricui ushashpami causanchi.

9Ashtahuangarin Jesustaca, ashacamanllami angelcunatapash yali uchillashna cachun saquirca. Cunanga, ninan llaquita apashpa tucuicunata quishpichingapa huañujpimi, juyailla coronata churachishpa jatumbi churashpa ninanda alicachirca. Taita Diospaj ninan juyaimandami, tucuicunamanda chashna huañuchun saquirca.

10Ashtahuangarin, tucuita ruraj Diosmandallami, tucui imapash Pai munashcashnallata tiyajun. Chaicunataca, Paillatami tucuita charijun. Paipaj huahuacuna tucujpi, ashtacacunata Paipaj punchapamba llactaman pushangapami Paica munan. Llaquicunata apashpa quishpichijpimi Jesucristotaca jatumbi churashca.

11Diospajlla causachun quishpichij Jesucristopash, Diospajlla causajcunapash, tucuicunami shujlla Taitapaj canchi. Chaimandami Jesusca, huauquicuna, panicuna ningapaca na pinganayachin.

12Paica cashnami nijushca:

“Cambaj shutitami, ñuca huauquicunaman villasha.

Tandanajushcapaj chaupipimi, candaca alicachisha” nijushcami.

13Cashnatapashmi nijushca:

“Diostallami yariashpa causasha” nijushcami.

Cutimbashmi:

“Taita Dios ñucaman carashca huahuacunandimi caipi cani” nijushcami.

14Chai huahuacunaca, aichatapash, yahuartapash charinmi. Shinallatami, Jesuspash aichayuj, yahuaryu tucurca. Huañuita mandana ushaita charij diablota, Jesús huañushpa tucuchingapami chashna tucurca.

15Shinallata, huañunata manllashpa, tucui causaipi huatai tucushcashna causajcunata cacharingapami chashna tucurca.

16Jesusca, angelcunata quishpichingapaca na shamurcachu. Ashtahuangarin, taita Abrahambaj miraicunata quishpichingapami shamurca.

17Chaipajmi Jesusca tucuipi, Paita crijcunashnallata tucuna carca. Shina tucushpami, Taita Diospajta rurashpa, ninanda llaquij cashpa, tucuita pactachij cashpa, sacerdotecunata jatun mandaj tucurca. Shina tucushpami, gentecunapaj juchacunatapash anchuchirca.

18Jesusca Paipashmi, pandachingapa munaj llaquicunata japirca. Shinamandami, pandachi tucugrinajujta quishpichingapa ninan ushaita charin.