OSEAS 13 - Quichua Imbabura 2016

Efraín ayllucunata, tucuchinata villashcamanda

1Efraín ayllucuna rimajpica, ninandami manllarinajurca.

Paicunami, Israel llactapica, ninanda alicachi tucushca carca.

Ashtahuangarin, Baal shuti diosta mañashpa, juchata rurashcamandami huañurca.

2Paicunaca culquita yacuyachishpami,

imamambash rijchaj dioscunata rurashpa,

ninan na ali juchacunata ruranajurca.

Paicunaca: “Cai dioscunamanmi, animalcunata cushpa huañuchina canguichi.

Cai shicu dioscunatami muchana canguichi” ninajurcami.

3Chaimandami, chingajlla fuyushna, jamzi paramu yalijshna,

trillanajun pambamanda jupata huaira apajpinshna, huasimanda cushni llujshishpa rijshna chinganga.

4Egipto llactamanda llujchimushca punllamanda, cangunata Mandaj Diosmi cani.

Rurashcalla dioscunataca na yarinachu canguichi.

Cangunata quishpichingapaca, shuj dioscunaca illanmi.

5Ñucallami, jichushca pambapica, cangunata yanapashpa pusharcani.

6Ñucami cangunamanga, micunatapash na munangacaman cararcani.

Chashna cashpami cangunaca na ali yuyaicunata charishpa,

jariyashpa Ñucataca cungarcanguichi.

7Shinamandami paicunapaca, leonshna casha.

Leopardoshnami, ñambi pacalla chapashpa llaquichigrini.

8Huahuacunata chingachishpa, fiñarishca purijuj huarmi ososhnami,

Israelcunataca ñutushpa tucuchigrini.

Paicunataca, millai leonshnami, maipi tuparishcapi tucuchisha.

Sacha animalcunashnami tucuchisha.

9Israelcunalla, cangunataca tucuchigrinimi.

Cunanga cangunataca, pipash na yanapangachu.

10Cangunaca: “Jatun mandajtapash, cati mandajcunatapash cuhuai” nishpami mañarcanguichi.

Cunanga, cangunapaj pueblocunatapash, cangunatapash ricungapaca,

¿canguna mañashca jatun mandajca maipitayari?

¿llaquicunata ricushpa alichijcunapash maipitayari?

11Ñucaca ninandapacha fiñarishpami, jatun mandajtaca cangunaman curcani.

Chai mandajtaca, cangunallata ñucata fiñachijpimi quichurcani.

12Efraín ayllucuna na alita rurashcataca, na cungashcami cani.

Paicuna juchata, rurashcacunaca alipacha alichishcami tiyajun.

13Llaquicunaca, nanaicuna huahuata ungugrijuj huarmitashnami japinga.

Unguna punlla pactajpi, maita llujshinatapash na yachaj, juizu illaj huahuashnami canga.

14Paicunataca, ¿Seolman ama richun quishpichinachu cani?

Paicunataca, ¿huañunamandapash quishpichinachu cani?

Huañuitaca, ñucami huañuchisha.

Seoltapash, ñucami anchuchisha.

Ñuca ñavihuanga, na llaquishpa ricushachu.

15Huauquipurapi, Efraín ayllucuna ninanda mirajpipash,

Mandaj Diosmi jichushca pambamanda, rupai huairata cachamushpa tucuchinga.

Chashna cajpimi, yacu pugyu tiyajujpash, rijuj yacupash tucuringami.

Paicuna imata ninanda charishcatapash, shujcunami quichushpa apanga.

16Samaria pueblopi causajcunaca, Mandaj Diosta na cazushcamandami, tucuringa.

Paicunataca, espadahuanmi huañuchishpa tucuchinga.

Paicunapaj huahuacunatapash, maipipash shitajpimi huañunga.

Vijsayu huarmicunataca vijsatami liquishpami huañuchinga.