1 CORINTIOS 4 - Quichua Imbabura 2016

Apostolcuna imatalla ruranamanda

1Shina cashcamanda ñucanchica, Cristopajta rurajcunami canchi. Shinallata, Taita Dios pacashpa charishcacunata, aliguta ricushpa yachachijcunami canchi.

2Cunanga, imata rurachun mingashcataca, tucuicunallata aliguta pactachijcuna cachunmi taita Diosca munan.

3Canguna cashpa, cai pachapi mandajcuna cashpapash, ñucata imata juchachinajujpipash na manllanichu. Ñucallatapash, na imatapash juchachirinichu.

4Ñuca ima na alita rurashcatapash na yarinichu. Shina cashpapash, alitalla rurashcashnaca na ricurinichu. Apunchi Jesusllami, ima na alita rurashcatapash ricuchihuanga.

5Shina cajpimi, Apunchi Jesús nara tigramujpica, pitapash na juchachina canguichi. Pai shamushpami imatalla rurashcatapash, yanapi pacashca tiyajujtapash, michaman llujchinga. Taita Diosca, tucuicunapaj shungupi imata yarijushcatapash ricuchishpami, alicachishpa, imata cuna cashcata cunga.

6Juyashca crijcuna, Apolospash, ñucapash, cangunata juyashpami imatalla ruranataca ricuchircanchi. Quilcashcapi nishcatalla pactachinajuchunmi chaitaca rurarcanchi. Shina cashpami, na shujtalla alicachishpa, na caishuj chaishuj jariyanguichi.

7Candaca ¿pita ashtahuan alicachin? Na cashpaca, ¿imatata na chasquircangui? Ña chasquishca cashpaca, ¿imashpata nara chasquishcashna jariyajungui?

8Cangunaca, ña tucuita chasquishpami, ninanda charijyashpa, churashca mandajcuna tucushcanguichi. ¡Cangunapash mandajcuna cajpica, ñucanchipash cangunahuanmi pacta mandanajunchiman!

9Ñucanchitaca apostolcuna cajpipash, Taita Diosca, huañuchi tucuchumbachami huashaman saquishca yanimi. Shinallata, angelcunapash, cai pacha gentecunapash, ñucanchitaca asishpami ricunajun yanimi.

10Cristota juyashpami, juizu illajcunashna ricurinchi. Ashtahuangarin cangunaca, Cristohuan cashpami, alipacha yachajushcacuna canguichi. Ñucanchica, ushai illajcunashna cajpipash, cangunaca, shinllicunami canguichi. Cangunaca, alicachi tucushca cajpimi, ñucanchica yangapi churai tucushcacuna canchi.

11Cunangamanmi, yarjaihuan, yacunayaihuan, churajunapash illaj, macai tucushpa purinajunchi. Maipi causanatapash na charishpami purinchi.

12Ñucanchi maquihuan imagutapash rurashpami ninanda shaijunchi. Ñucanchita na ali cachijpipash, “Dios bendiciapachun” ninajunchimi. Catiriyashpa llaquichijpipash, llaquicunata apanchillami.

13Ñucanchita na alicachishpa rimanajujpipash, ali shimicunahuanmi tigrachinchi. Ñucanchitaca, cai pachapi shitashca mapa sirijtashnami na ricunayachinajun.

14Cangunata pingaichingapaca, na cashna quilcanichu. Ashtahuangarin, ñuca juyashca huahuacuna cajpimi chashna shinllita rimajuni.

15Cristomanda yachachishpa pushajcunata, chunga huarangata charishpapash, shujlla taitatami charinguichi. Ali villanata ñuca villajpi Cristo Jesusta crishcamandami, cangunapajca taitashna cani.

16Shinamandami, “ñucata ricushpa catichi” nijuni.

17Shinamandami, Timoteotaca cangunapajman cachamurcani. Paica, Apunchi Jesusta alipacha crij, “ñuca juyashca churishnami” capan. Cristota catishpa ñuca imashna causajujtapash, tandanajuj crijcunaman imashna yachachishpa purijujtapash, paimi cangunaman villajunga.

18Ashtahuangarin ñuca, cangunapajman na shamuna cajpishnami huaquingunaca jariyanajunguichi.

19Shina cajpipash, Taita Dios munajpica ñallami shamusha. Chaipimi, jariyashpa purijcunataca, imata rurai ushajtapash, na rurai ushajtapash ricusha.

20Taita Dios mandajuj llactamandaca, na shimihuanlla rimanachu, ashtahuangarin imatapash ushaihuan rurashpami ricuchina.

21Cangunapajman shamushpaca, ¿caspihuanllu shamusha? Na cashpaca, ¿juyaihuan, ali shunguhuan shamuchunllu munanguichi?