1Mandaj sacerdotetaca, gentecunapaj chaupimanda agllashpami churan. Chai sacerdoteca, Taita Diospaj ñaupajpi, gentecunapaj ali cachunmi, ofrendacunata, juchacunamanda apamushca animalcunata rupachishpa Diosman caran.
2Chai sacerdoteca, na yachaimanda pandarishpa chingarishcacunataca, ali shunguhuanmi chasquina. Paipash pandarishpa urmanalla cashcamandami chashna rurana.
3Shina cashpami, paipaj juchamandapash, tucui gentecunapaj juchamandapash, animalcunata Diosman cushpa rupachinata charin.
4Pipash na paipaj munaimandalla sacerdote tucungachu. Ashtahuangarin, Aaronda, Taita Dios agllashcashna agllajpillami, chashna tucui ushanga.
5Shinallata, sacerdotecunata jatun mandaj tucungapaca, Cristopash na Paillata tiyarircachu. Ashtahuangarin Taita Diosmi, Paitaca:
“Canga, Ñuca Churigumi cangui.
Cunanga, Ñucami, Cambaj Taita cani” nijushca.
6Shinallata Dios quilcachishcapimi, cashnami nijun:
“Canga, causaita causaicamanmi sacerdote cangui.
Melquisedec sacerdoteshnami, Cambash cangui” nijunmi.
7Jesucristo cai pachapi causajushpaca, huañuimanda quishpichij Diostami, ninanda caparishpa, huacashpa, ninanda llaquirishpa, mañajujlla carca. Chashna alipacha cazushpa manllaihuan mañajushcamandami, Paitaca uyarca
8Cristoca, Diospaj Churi cashpapash, ninan llaquita apashpami, imashna cazunataca yachajurca.
9Shina tucuita pactachij cashpa alipacha cajpimi, Paita tucui cazujcunata quishpichishpa, causaita causagrinata cuchun Paiman ushaita curca.
10Jesucristotami Melquisedec sacerdoteshna, jatun mandaj cachun Taita Diosca churarca.
Crij cashca jahua, Diostaca na yangapi churana cashcamanda11Caicunamanda rimashpa yachajunaca, shinllipacha na yachachi ushanallami ricurin. Shina cashcamandami, cangunaca na ucha yachajui ushanguichi.
12Cai tucui huatacunapica, ña yachachijcunami cana carcanguichi. Ashtahuangarin, Taita Diospaj Shimitaca, chairalla yachajushpa callarijcunashnami, cutin tigrashpa yachajungapa munanguichi. Shina cashpami, shinlli micunataca na micui ushashpa, huahuacuna lechetalla munajshna causanguichi.
13Lechetalla munashpa causajcunaca, huahuacunashna nara yachajushcacuna cashpami, alitalla rurachun yachachijuj Diospaj Shimitaca, na yachajui ushanajun.
14Ashtahuangarin, shinlli micunaca ali crijcunapajllami. Chai micunaca, ali yuyaicunata charishpa, ima ali cajta, ima na ali cajtapash agllashpa ricui ushajcunapajllami.
Who We AreWhat We EelieveWhat We Do
2025 by iamachristian.org,Inc All rights reserved.
