1 REYES 19 - Quichua Imbabura 2016

Eliasca, Horeb shuti lomamanmi pacajungapa rishca

1Acab shuti runaca, Elías tucui imatalla rurashcatapash, chai profetacunata imashna espadahuan tucuillata huañuchishcatapashmi, Jezabel shuti paipaj huarmiman villarca.

2Shina villajpimi Jezabel huarmica, Eliasman cashna nichun shuj villajta cacharca: “Chai profetacunata huañuchishcashnallata, candapash caya punllallata na huañuchijpica, ñucatapash dioscunaca ninandapacha llaquichihuachun” nichunmi cacharca.

3Chashna villajpimi Eliasca, llaqui japinata yachashpa, ama huañuchi tucungapa, Judá llactapi tiyajuj Beerseba shuti puebloman shamurca. Chai pueblopimi, paipajta ruraj runataca saquirca.

4Paica, jichushca pambata tucui punlla rishpami, enebro yuraman quimirishpa, chaipi tiyarirca. Chaipi tiyajushpami, paica huañungapa munashpa, cashna nijurca: “Mandaj Dioslla, caicamanllami causangapa munani. Ñuca causaita quichuhuailla. Ñucaca, ñuca ñaupa taitacunata yali ashtahuan alipash na canichu” nijurcami.

5Eliasca, enebro yura ucupi siririshpami, puñushpa saquirirca. Shina puñujujpimi, shuj ángel paita tacarishpaca: “Jatarishpa micui” nirca.

6Shina nijpi Eliasca ñapash rijcharishpami, paipaj sirijushca pushtu quimiriapica, tulpapi cusashca shuj tortillata, shinallata shuj uchilla fundupi yacu tiyajujta ricurca. Chaita micushpa ufiashpami, paica cutin puñungapa siririrca.

7Chashna puñujujpimi, Mandaj Diospaj ángel cutin tigramushpa tacarishpaca: “Jatarishpa micui. Canga, ashtahuan caruta rinarami cangui” nirca.

8Shina nijpimi jatarishpa micurca, yacutapash ufiarca. Chai micunata micushpa, ña shinlli tucushpami, chuscu chunga punlla, chuscu chunga tutata, Taita Diospaj Horeb shuti urcuman chaquilla rijurca.

9Ña chaipi cashpami paica, shuj jatun utujuman yaicushpa, tutaca chaipi pacarirca. Chaipimi Mandaj Diosca, Eliasta cashna nirca: “Elías, ¿imatata caipica rurajungui?” nirca.

10Shina nijpimi Eliasca, cashna nirca: “Ñucaca, Mandaj Diosta ninandapacha juyaimandami, ninanda llaquirini. Israelcunaca, canhuan ari ninajushcatapash, cambaj altarcunatapash shitashpami saquishca. Cambaj profetacunatapashmi, espadahuan huañuchishca. Chai profetacunamandaca, ñucallami puchushcani. Shinallata ñucatapashmi huañuchingapa mascanajun” nircami.

11Shina nijpimi Diosca, cashna nirca: “Canllaman llujshishpa cai urcupillata, Mandaj Dios Ñucapaj ñaupajpi shayari” nirca.

Mandaj Dios chaita yalijujpica, ninan shinllipacha huairami ñapash shamurca. Chai huairami, Mandaj Diospaj ñaupajpica lomacunatapash tunirca, jaca rumicunatapash faquirca. Ashtahuangarin Mandaj Diosca, na chai huairapi ricurircachu. Chai huairapaj jipaca, alpa mamami chujchurca. Ashtahuangarin Mandaj Diosca, chai alpa mama chujchuipipash na ricurircachu.

12Alpa mama chujchushca jipaca, ninami ricurirca. Ashtahuangarin Mandaj Diosca, chai ninapipash na ricurircachu. Ninapaj jipaca, alillaguta huaira huacajujmi uyarirca.

13Chaita Elías uyashpami, pai jahualla churajushcahuan ñavita quilparishpa, canllaman llujshishpa chai jatun utuju pungupi shayarirca. Elías chaipi shayajujpimi: “Elías, ¿imatata caipica rurajungui?” nishpa, ñapash rimaj uyarirca.

14Chashna nijta uyashpami, paica cashna nirca: “Ñucaca, Mandaj Diosta ninandapacha juyaimandami, ninanda llaquirini. Israelcunaca, canhuan ari ninajushcatapash, cambaj altartapash shitashpami saquishca. Cambaj profetacunatapashmi, espadahuan huañuchishca. Chai profetacunamandaca, ñucallami puchushcani. Shinallata ñucatapashmi huañuchingapa mascanajun” nircami.

15Shina nijpimi Mandaj Diosca, cashna nirca: “Damasco jichushca pamba ñanda shamushcatallata tigrashpa rilla. Chaiman chayashpaca Hazael shuti runataca, Siria llactata jatun mandaj cachun, aceiteta talishpa javingui.

16Nimsi shuti runapaj churi Jehú shuti runataca, Israel llactata jatun mandaj cachun, aceiteta talishpa javingui. Shinallata, Abel-mehola shuti pueblopi causajuj Safat shuti runapaj churi Eliseotaca, cambaj randi ñucapaj profeta cachun, aceiteta talishpa javingui.

17Chashna rurajpimi, Hazael runapaj espadahuan huañuchi tucunamanda pacajushpa rijtaca, Jehú shuti runa huañuchinga. Jehú shuti runapaj espadahuan huañuchi tucunamanda pacajushpa rijtaca, Eliseomi huañuchinga.

18Ñucami, Israelpuramandaca Baal shuti diosta na cungurijcunata, chai diosta na muchajcunata, canchis huaranga runacunata na huañuchigrini” nircami.

Eliseota Dios cayashcamanda

19Chaimanda ña rishpami Eliasca, Safat shuti runapaj churi Eliseotaca, chunga ishcai yuntacunahuan yapushpa, paica huashata catijujta tuparigrirca. Eliasca, Eliseopaj ñaupajta yalijushpami pai jahualla churajunata, Eliseopaj jahuapi shitarca.

20Chashna rurajpimi Eliseoca, yapujushca huagracunata saquishpa, Eliaspajman calpashpa shamushpaca, cashna nirca:

“Ñuca taitata, ñuca mamata muchashpa cayacaman nishpa tigramugringapa saquihuai. Chai jipaca, canda catishpa rishallami” nircami.

Shina nijpimi Eliasca, cashna nirca:

“Shina cashpaca tigramungapa rilla. Imata ninatapash na charinichu” nircami.

21Shina nijpi Eliseo rishpa, ishcai huagracunata huañuchishpami, yapuna arado caspicunata yamdata rurashpa, aichata cusashpa gentecuna micuchun cararca. Chai jipaca Eliseoca, Eliasta catishpa rishpami paihuan pacta purijurca.