1Salomonga, Israelcunata mandaj rucucunata, ayllucunata cati mandajcunata, huasi ucupuracunata mandajcunataca, Jerusalenbi paipaj ñaupajmanmi tandachimurca. Mandaj Dioshuan ari ninajushpa quilcashcata alichina arcata, Davidpaj Sion pueblomanda apamungapami chashna tandachirca.
2Etanim shuti canchis quillapimi, tucuilla Israel runacunaca, jatun mandaj Salomonhuan tandanajurca. Chai quillapica, jatun cushijuita rurana punllacunami carca.
3Israelcunata mandaj rucucuna tucuilla shamujpimi sacerdotecunaca, Diospaj arcata japinajurca.
4Mandaj Diospaj arcatapash, Dioshuan tuparina jatun carpatapash, Diospajta rurangapa chai carpapi imalla tiyashcatapashmi apamunajurca. Chaicunataca, sacerdotecuna, levitacunami apamunajurca.
5Chaipica, jatun mandaj Salomonbash, paihuan tandanajushca tucui Israelcunapashmi, Diospaj arca ñaupajpi, llamacunata, huagracunata, Diosman cushpa huañuchinajurca. Chai animalcunaca ashtacapacha, maitapash na yupai ushaimi carca.
6Chai jipami sacerdotecunaca, Mandaj Dioshuan ari ninajushpa quilcashcata alichishca arcataca, maipi churana pushtumanllata apanajurca. Chai arcataca, Diospaj huasipillata, Diospajlla shicanyachishca ucuman apamushpami, querubín angelcunapaj alas ucupi churanajurca.
7Chai querubín angelcunaca, Diospaj arca jahuata alasta chutashcami carca. Chaimandami chai querubín angelcunaca, Diospaj arcatapash, arcata huanduna vara caspicunatapash, alascunahuan jahualla quilpashca carca.
8Chai vara caspicunaca, jatunguna cashcamandami, chai caspi umacunaca, Diospajlla shicanyachishca ucu ñaupajmandaca ricunalla carca. Shina cashpapash, ashtahuan canllamandaca na ricunallachu carca. Chaica cunangamanmi, chashnallata tiyajun.
9Diospaj arcapica, imapash ashtahuanga na tiyarcachu. Horeb shuti urcupi cashpa, Moisés churashca ishcai tabla rumicunallami tiyajurca. Egipto llactamanda llujshimujpi Mandaj Dios, Israelcunahuan ari ninajushcatami chai rumicunapica quilcashca carca.
10Diospaj huasimanda sacerdotecuna ña llujshijpica, Mandaj Diospaj huasipica fuyumi jundarca.
11Fuyu junda cajpimi sacerdotecunaca, Diospajta chaipi rurangapa shayanajuitaca na ushanajurca. Mandaj Diospaj punchapamba ninan ushaimi, Mandaj Diospaj huasipica jundashca carca.
Diospajlla huasitami, Diosmanllata mingashca(2 Crón. 6:1—7:10)12Salomonga, cashnami nirca: “Mandaj Dioslla, Canga yana fuyupimi causasha nircangui.
13Shina cajpipash, Can causajuchunga, shuj huasita shayachishpami, causaita causaicaman Can chaipi causachun, shuj ucutapash rurarcani” nircami.
14Jatun mandaj Salomonga tigrarishpa ricushpami, chaipi tandanajushca tucui Israelcunata bendiciarca. Chaipica, tucuilla tandanajushca Israelcunami shayanajurca.
15Paica cashnami nijurca: “Israelcunata Mandaj Taita Diosca, alicachi tucushca cachun. Ñuca taita Davidman imatalla nishcataca, Paipaj maquihuan rurashpami pactachishca. Paica cashnami nishca carca:
16‘Ñuca agllashca Israelcunata, Egipto llactamanda llujchimushca punllamandapacha, tucui Israel ayllucunapaj pueblocunamandaca, maijan pueblotapash, Ñuca causana huasita shayachijuchunga, na agllarcanichu. Shina cashpapash, Ñuca agllashca Israelcunata mandachunga, Davidtami agllarcani’ nishcami carca.
17Chaimandami ñuca taita Davidca, Israelcunata Mandaj Taita Diospaj shutipi mañana huasita rurangapa, paipaj shungupi yarijushca carca.
18Ashtahuangarin Mandaj Diosca, ñuca taita Davidtaca cashnami nishca carca: ‘Ñucata mañana huasita shayachinatami, cambaj shungupi yarijushcangui. Can chaita yarijushpaca, alitami yarijushcangui.
19Shina cashpapash, chai huasitaca na can shayachinguichu. Ashtahuangarin, cambaj churimi, Ñucata mañana huasitaca shayachinga’ nishcami carca.
20Mandaj Diosca, Pai chashna nishcataca pactachishcami. Chaimandami, Mandaj Dios imashna nishcashnallata, ñuca taita Davidpaj randi, Israelcunata mandashpa tiyarinapi tiyarircani. Shinallata, Israelcunata Mandaj Taita Diospaj shutipi mañana huasitapashmi shayachircani.
21Chai huasipimi, arcata churangapa shuj ucuta rurarcani. Chai ucupica, ñucanchi ñaupa taitacunata, Egipto llactamanda llujchimushpa, Mandaj Dios paicunahuan ari ninajushpa quilcashcata alichishcami tiyajun” nircami.
22Shina nishca jipami Salomonga, Mandaj Diospaj altar ñaupajpi shayarishpa, tandanajushca Israelcuna ricujta, maquicunata vichai chutashpa,
23cashna nijurca: “Israelcunata Mandaj Taita Dioslla, can Taita Diosman rijchajca jahua pachapipash, cai pachapipash na tiyanllu. Canda tucui shunguhuan cazushpa, Cambaj ñaupajpi ali purij, Cambajta rurajcunata llaquishpami, Can imata ari nishcatapash pactachijungui.
24Cambajta ruraj, ñuca taita Davidman cushami nishcataca pactachishcanguimi. Cambaj shimihuan villashcataca, Cambaj ushaihuan rurashpa pactachijtami, cunan punllapi ricunajunchi.
25Israelcunata Mandaj Taita Dioslla. Cunanga, Cambajta ruraj ñuca taita Davidman pactachishami nishcataca pactachipayari. Chaipaca, Canga cashnami nishcangui: ‘Cambaj miraicunamanda, Ñuca ñaupajpi Israel llactata mandangapa tiyarinapi tiyarij runaca na illangachu. Ñuca ñaupajpi can ali purishcashnallata, cambaj churicunapash, Ñuca mandashcata cazushpa, ali purijpillami chashna pactanga’ nishcanguimi.
26Shina cashcamanda Israelcunata Mandaj Taita Dioslla, cunanga, Cambajta ruraj ñuca taita Davidman pactachishami nishcataca pactachipailla.
27Shina cajpipash ¿Taita Diosca, cai pachapi causangachu imashi? Jahua pachapash, ashtahuan jahuaman jahua pachapash, Can Dios causachunga na pactangachu. Ñuca shayachishca cai huasicarin, ¿maitata pactangayari?
28Shina cajpipash, ñucata Mandaj Taita Dioslla. Cambajta ruraj ñuca caparishpa mañajujtaca uyapailla. Cambajta ruraj ñuca, Cambaj ñaupajpi caparishpa cunan chashna mañajujtaca, uyashpa pactachipailla.
29Cai huasitaca, tutapash, punllapash ricuriajupanguilla. ‘Ñuca shutica, chaipimi causanga’ nishca pushtutaca ricuriajupanguilla. Cambajta ruraj ñuca caipi mañajujtaca uyapanguilla.
30Cambajta ruraj ñucapash, Can agllashca Israelcunapash, Canda mañajujtaca uyapanguilla. Cai huasipi mañanajujtaca, jahua pachamanda uyashpa, ñucanchi juchacunataca anchuchipanguilla.
31Maijan cashpapash, paipaj cumbatallata fiñashpa juchata rurajpica, Cambaj cai huasi ucupi tiyajuj altar ñaupajpimi juramentuchun pushamunga.
32Shina rurajpimi, jahua pachamanda uyashpa, Cambajta rurajcunataca aliguta ricushpa, imata rurana cajpipash rurapangui. Canda na manllajtaca ninanda llaquichishpami, pai na alita rurashcashnallata llaquichingui. Ali cashcata rurajtaca, chashna rurashcamandami, alita rurashpa causachun chasquipangui.
33Can agllashca Israelcunaca, Canda na cazushpa juchata rurashcamandami, paicunata fiñajcunahuan mishai tucunga. Chashna cashpami, Cambaj ñaupajman tigrarishpa, ninanda llaquirishpa, Cambaj shutita alicachishpa, cai huasipi mañanajunga.
34Chashna mañajpica, jahua pachamanda uyashpami, can agllashca Israelcunapaj juchata cungashpa, paicunapaj ñaupa taitacunaman, Can carashca llactaman tigrachimupangui.
35Canda na cazushpa, paicuna juchata rurashcamanda, jahua pacha vicharishpa na tamiashpa llaquichijpimi paicunaca, Cambaj shutita alicachishpa, Cambajman tigrarishpa, cai huasipi mañanajunga.
36Shina rurajpica, jahua pachamanda uyashpami, Cambajta rurajcunapaj juchatapash, Can agllashca Israelcunapaj juchatapash cungapangui. Canda cazushpa purichumbash, ali ñanda ricuchishpami yachachipangui. Shinallata, Can agllashcacunaman carashca, Cambaj llactapipashmi tamiachipangui.
37Cai llactapica, jatun yarjaipash, jatun ungüicunapash, tarpushcacunata lanchanapash, langosta jurucuna na cashpaca shuj jurucuna tucuchinapashmi tiyanga. Shinallata, paicuna causanajuj llactaman paicunata fiñajcuna shamushpa, chaupipi churanapash, imapash shuj llaqui cashpa, ungüi cashpapashmi tiyanga.
38Shina cajpica, maijan runa cashpa, Can agllashca tucui Israelcuna cashpapashmi, Canda mañanajunga. Maijan cashpapash, huañuchij ungüihuan japi tucushcata yachashpami, cai huasiman paicunapaj maquicunata chutashpa ninanda mañanajunga.
39Shina mañajpica, Can causajuj jahua pachamanda uyashpami, paicunapaj juchacunata cungashpa, paicuna imata rurashpa causashcashna tucuicunaman cupangui. Paicunapaj shungutaca, Canmi rijsipangui. (Canllami, huañuna aichayuj tucuilla runacunapaj shungutaca rijsipangui).
40Ñucanchi ñaupa taitacunaman Can carashca llactapi causanajui tucui punllacunapi, Canda manllashpa causanajuchunmi chashna rurapangui.
41Shinallata, shuj llactamanda shamushca, na Israelpura cashpapash, Cambaj shutita alicachingapami shamunga.
42(Cambaj jatun shutitapash, ushaitapash, Can imatalla rurashcatapashmi yachanajunga). Chashna yachashpami, cai huasipi Canda mañaj shamunga.
43Chashna mañajpica, Can causajuj jahua pachamanda uyashpami, shuj llactamanda cajpipash, paicuna imata mañashcashna rurashpa pactachipangui. Chashna rurajpimi, tucui cai pachapi causajcunaca, Cambaj shutita rijsishpa, Can agllashca Israelcunashnallata, Canda manllashpa causanga. Shinallata, ñuca shayachishca cai huasipica, Cambaj shutita jatunyachishpa mañanatapashmi yachanajunga.
44Can agllashca Israelcunaca, paicunata fiñajcunahuan macanajungapami, Can maita cachashca ñanda rinajunga. Chashna rinajushpami, Can agllashpa cushca pueblotapash, Cambaj shutipi mañangapa ñuca shayachishca cai huasitapash ricushpa, Can Mandaj Diostaca mañanajunga.
45Tucui shunguhuan chashna ninanda mañajpica, jahua pachamanda uyashpami, imatapash cashcatapacha rurapangui.
46(Jucha illaj runaca, shujllapash na tiyanllu). Canda na cazushpa juchata rurajpimi, paicunahuan ninanda fiñarishpa, caru llactaman cashpapash, caimanlla cashpapash prezu apachun, paicunata fiñajcunapaj maquipi churangui.
47Paicunaca, prezu apai tucushca llactapi cashpami, Cambajman tigrarishpa cashna nishpa mañanajunga: ‘Juchata rurashpa, jatun na alita rurashpami, Diosta na cazujcunashna rurashcanchi’ ninajungami.
48Paicunata fiñajcunapaj llactaman prezu apai tucushca cashpami, paicunapaj tucui shunguhuan, tucui almahuan Cambajman tigrarinajunga. Chashna tigrarishpaca, paicunapaj ñaupa taitacunaman Can carashca llactamambash, Can agllashpa cushca pueblopi, ñuca shayachishca cai huasimambash tigrarishpami, Canda mañanajunga.
49Paicuna ninanda mañajpica, Can causajuj jahua pachamanda uyashpami, ali cashcatapacha rurapangui.
50Can agllashcacunataca, juchata rurashpa fiñachishcatapash, tucui na alita rurashpa Canda na cazushcatapash cungapangui. Paicunata prezu apajcunamambash, llaquina yuyaita cupangui.
51Paicunaca, Cambajlla cachun agllashca gentecunami. Paicunataca Egiptomandaca, jirruta yacuyachijun hornoshna llactamandami llujchimurcangui.
52Cambajta ruraj ñuca mañajujtapash, Can agllashca Israelcuna ninanda caparishpa, imatalla mañanajujtapash uyapangui.
53Jatun Mandaj Dioslla. Ñucanchitaca, tucui cai pachapi causajcunamandami, Cambajlla cachun agllarcangui. Chaitaca, ñucanchi ñaupa taitacunata Egiptomanda llujchimushpa, Cambajta ruraj Moisesman villashcashnami chashna pactachishcangui” nijurcami.
54Salomonga, chashnami Mandaj Diosta mañashpa tucuchirca. Chai jipami, Mandaj Diospaj altar ñaupajpi cungurishpa, maquitapash vichai churashpa mañajushcamandaca jatarirca.
55Shina jatarishpami, tucuilla tandanajushca Israelcunataca, shinllita caparishpa cashna nishpa bendiciarca:
56“Mandaj Diosca, alicachi tucushca cachun. Pai agllashca Israelcunamanmi, ali causaiguta caramushca. Paipajta ruraj Moisesta villachun mandashcashnami, tucui imata carasha nishcatapash pactachishca.
57Ñucanchita Mandaj Taita Diosca, ñucanchi ñaupa taitacunahuan cashcashnallata, ñucanchitaca ama cungashpa, ñucanchihuan pacta cajun.
58Ñucanchi shungupica, Paitalla cazuna yuyaita ashtahuan churachun. Ñucanchi taitacunaman cushca mandashcacunata, imata rurachun mandashcacunata quilcachishca shimicunata cazuna yuyaita cuchun.
59Ñuca mañashca cai shimicunaca, punllapash tutapash ñucanchita Mandaj Taita Diospaj yuyaipi cachun. Paipajta ruraj ñucatapash, Pai agllashca tucui Israelcunatapash llaquishpa, tucui causaipi huacaichishca cachun.
60Chashna rurajpimi, tucui cai pachapi causajcunaca, Mandaj Dioslla Taita Dios cajta yachashpa, ashtahuan shuj Diosca na tiyajta yachanga.
61Shinallata, ñucanchita Mandaj Taita Diospaj ñaupajpica, cangunapaj shungupash ima na alipash illaj cachun. Shina cashpami, pai mandashca shimicunata quilcachishcataca, cunan punllacaman pactachishcashna pactachishpa causanguichi” nishpami bendiciarca.
62Chai jipami, jatun mandajpash, paihuan tandanajushca tucui Israelcunapash, Mandaj Diosman animalcunata cushpa huañuchinajurca.
63Mandaj Dioshuan ali cangapami Salomonga, ishcai chunga ishcai huaranga huagracunata, patsaj ishcai chunga huaranga llamacunata Diosman cushpa huañuchirca.
Chashnami jatun mandajpash, tucui Israelcunapash, Mandaj Diospaj huasitaca Diosmanllata minganajurca.
64Jatun mandajca chai punllallatami, Mandaj Diospaj huasi ñaupajpi tiyajuj chaupi patiotapash, Diospajlla cachun mingarca. Diosman cushpa tucuillata rupachina animalcunata, ashtahuan imatalla carashcacunata, Dioshuan ali cangapa cushca animalcunapaj viracunataca, chai patiopimi rupachirca. Mandaj Diospajlla ucu ñaupajpi tiyajuj bronce altarca uchilla cajpimi, Diosman cushpa tucuillata rupachina animalcunata, ashtahuan imatalla carashcacunata, Dioshuan ali cangapa cushca animalcunapaj viracunata rupachingapaca na pactarca.
65Chai punllacunallatami Salomonga, Mandaj Taita Diospaj ñaupajpi, canchis punllacaman jatun cushijuita rurarca. Hamat puebloman yaicunamandaca, Egipto llacta jatun huaicu yacu manñacunacaman causanajuj tucuilla Israelcunandimi, ashtacapacha tandanajurca. Ashtahuan shuj canchis punllatapash, cushijuita charishpami, tucuimandaca, chunga chuscu punllacaman chashna rurarca.
66Chai cayandi pusaj punllapimi Salomonga, gentecunataca cayacaman nishpa cacharca. Chashna cachajpimi, paicunapash jatun mandajta bendiciashpa, paicuna causanajuj huasicunaman, ninanda cushijushpa tigranajurca. Taita Diospajta ruraj Davidman, tucui Israelcunamambash, Mandaj Dios chashna bendiciashcamandami, chashna ninanda cushijunajurca.
Who We AreWhat We EelieveWhat We Do
2025 by iamachristian.org,Inc All rights reserved.
