JOB 30 - Quichua Imbabura 2016

Job runa, llaquita apajushpa huacashcamanda

1Ashtahuangarin cunanga, ñucapaj jipa viñaicunami ñucataca asishpa ricunajun.

Paicunapaj taitacunataca, ñuca animalcunata ricuj alcucunashna cachunllapash, na churaimanchu.

2Paicuna, ñucaman imata rurashcapash ¿imapata ali canman carca?

Paicunaca, ima ushaitapash na charinchu.

3Imatapash na charishpami, paicunaca yarjai purinajun carca.

Paicunaca, manllanayai yana yana pushtuman, jichushca pambaman pacajushpami rinajurca.

4Yura chaupicunapimi, malva yuracunata tandachinajurca.

Cunungapapash, enebro yura sapicunatami tandachinajurca.

5Tucui gentecunami, paicunataca na ricunayachin carca.

Shuhuata catijshnami, paicunataca caparinajun carca.

6Paicunaca, yacu rijuj jaca manñacunapi, jaca rumi utujucunapimi causanajurca.

7Yura ucucunapimi caparinajurca.

Casha ucucunapimi, tandanajun carca.

8Paicunaca, na ali gentecunapaj churicunami carca.

Shutipash illaj runacunami carca.

Paicunataca, chai alpamanda calpachishcami carca.

9Cunanga, paicunaca asishpami ricunajuhuan.

Ñucataca na alicachishpami asinajun.

10Ñucata millanayachishpami, caruta yalinajuj.

Ñuca ñavipipash t'ucashpami yalinajun.

11Taita Diosmi, ñucata astishpa llaquichihuarca.

Shinamandami ñucataca, cacharishcata rimanajurca.

12Ñuca ali maquimanmi, na ali gentecuna tandanajurca.

Paicunami, ñucataca pandachishpa urmachingapa munarca.

Ñucata llaquipi urmachingapami, chashna ruranajurca.

13Ñuca causaitapashmi llaquipi churanajurca.

Ñuca llaquipi cajpimi, paicunaca ashtahuan llaquichinajuhuarca.

Paicunahuan macanajungapaca, pipash na yanapahuarcachu.

14Ancho punguta pascajpishnami shamunajurca.

Ñuca llaquitapash, ashtahuanmi mirachinajurca.

15Ñucata pandachingapami, chashna ruranajurca.

Ñuca alicachi tucushcataca, huairashnami urmachinajurca.

Ñuca ali causajushcapash, fuyushnami chingarca.

16Cunanga, ñuca causaica tucurinallami.

Llaquilla causana punllacunami japihuashca.

17Tutapash, ñuca tullucunata utujujpishnami nanachihuan.

Nanaicunapash napacha saquihuanllu.

18Diosmi, ñuca churajunapi huarcurinshna llaquichijuhuan.

Ñuca cungapi sipinshnami charijuhuan.

19Paimi ñucataca, alpapi shitahuarca.

Shinamandami ñutu alpashna, uchufashna cani.

20Caparishpa mañajpipash, napacha uyahuanguichu.

Cambaj ñaupajpi cajpipash, napacha ricungapa munanguichu.

21Ninanda llaquichij runashnami, ñucapaca tucushcangui.

Ninan ushaita charij cambaj maquihuanmi catiriyashpa llaquichijuhuangui.

22Ñucataca, huaira apachunmi saquihuarcangui.

Ñuca causaitaca, tucuillatami tucuchircangui.

23Ñucataca, huañuiman pushajujtami yachani.

Tucui gentecuna rina huasimanmi pushajuhuangui.

24Ashtahuangarin, pambana utujuman ama richunga na jarcanllu.

¿Pai llaquichijujpica, huañushpa pambai tucushcacunaca, caparinajungachu imashi?

25Ñucaca, llaquita apajcunata ricushpaca, ¿nachu huacajurcani?

Imagutapash na charijcunahuanga, ¿nachu pacta llaquirircani?

26Ali punllacunami shamunga yajujpica, llaquicunarami shamurca.

Michata shuyajujpipash, yana tutami shamurca.

27Tucui ñuca aichapimi, jatun llaquita apajuni.

Ñucataca, ninan llaqui punllacunami japihuashca.

28Ñucaca, napash indi rupachijpitami, yanayashca purijuni.

Tucuicunapaj ñaupajpimi, caparishpa mañajurcani.

29Ñucaca, chacal animalcunapaj huauquishnami tucushcani.

Avestruz animalcunapaj cumbashnami tucushcani.

30Ñuca aicha carapash, yanayashpami urmajun.

Ñuca tullucunatapash, rupashpami nanajun.

31Ñuca arpamandaca, huañui taquicunallami uyarinajun.

Ñuca gaitamandapash, yarishpa yarishpa huacana taquimi uyarijun.