PROVERBIOS 10 - Quichua Imbabura 2016

Alitalla ruraj runamandapash, na alita ruraj runamandapash

1Salomón yachachishca shimicunami.

Alipacha yachajushca churica, taitata cushichinmi.

Ashtahuangarin shinlli shungu churica, mamata llaquichinmi.

2Na alita rurashpa imatalla charishcacunaca, yangallatami.

Ashtahuangarin, alitalla rurajcunaca, huañuimandami cacharichi tucun.

3Mandaj Diosca, alitalla rurajcuna

yarjaimanda llaquita apachunga na saquingachu.

Ashtahuangarin Diosta na manllajcunaca,

paicuna na alita rurashcamandami llaquita apanga.

4Imatapash na rurangapa munajcunaca, imapash illajmi causanga.

Ashtahuangarin, imata cashpapash uchalla rurajcunaca, charijyangami.

5Rupai punllacunapi granota tandachij runaca, alipacha yachajushcami.

Ashtahuangarin, cozechana punllacunapash puñujunlla churica, pingaichij churimi.

6Alitalla ruraj runaca, ninandami bendiciai tucunga.

Ashtahuangarin, Diosta na manllajcunataca, ninan llaquicunami japimunga.

7Alitalla rurajtaca, ali cashcamandami yariashpa alicachinajunga.

Ashtahuangarin, Diosta na manllajcunapaj shutica, ismunshnami chinganga.

8Alipacha yachajushcacunallami, mandashcacunataca shungupi chasquinga.

Ashtahuangarin, na ali shimicunata rimaj, shinlli shungu runaca urmangallami.

9Ima na alitapash na ruraj runaca, imatapash na manllanllu.

Ashtahuangarin, na alita rurashpa purij runaca, ninandami llaquichi tucunga.

10Na alita rurangapa ñavita sipuchij runaca, llaquitami apanga.

Na ali shimicunata rimaj, shinlli shungu runaca llaquichi tucungami.

11Alitalla ruraj runapaj shimica, causaita caraj yacushnami.

Ashtahuangarin, Diosta na manllajcunataca, ninan llaquicunami japimunga.

12Na ricunayachishpalla purinaca, fiñanajuitami mascan.

Ashtahuangarin, juyashpa causanaca tucui na alitapash, quilpajshnami cungachinga.

13Aligutapacha yarishpa purij runapaj shimipica, ali yachajunami tiyan.

Ashtahuangarin vara caspica, yangata purijcunata huashapi astingapami.

14Alipacha yachajushcacunaca, ali yachanata chasquishpa huacaichinmi.

Ashtahuangarin, shinlli shungu runapaj shimica, ñapash llaquipi churanllami.

15Charij runa imata charishcacunaca, muyundi jatun pircahuan puebloshnami.

Imagutapash na charijcunaca, na imata charishcamandami, llaquirishpa causanajun.

16Alitalla ruraj runaca, causaita charingapami imatapash ruran.

Ashtahuangarin, Diosta na manllaj runaca, imata rurashpapash juchatallami mirachijun.

17Yachachishcata cazuj runaca, causaiman pushajuj ñambimi purijun.

Ashtahuangarin, jarcashpa rimashcata yangapi churaj runaca, pandaringallami.

18Shungu ucupilla fiñaj runaca, llullashpallami parlajun.

Pitapash yanga juchachishpa parlashpa purij runaca, shinlli shungu runami.

19Imatapash ninandapacha parlanajushpaca, juchata rimangallami.

Ashtahuangarin, imatapash jarcarishpa rimajcunaca, ali yuyaitami charin.

20Alitalla ruraj runapaj shimica, ali culquita agllashcashnami.

Ashtahuangarin, Diosta na manllajcunapaj shunguca, imapash illajshnami.

21Alitalla rurajcunapaj shimihuanga, ashtaca gentecunatami yachachijun.

Ashtahuangarin, shinlli shungu runacunaca,

ali yuyaita na charishpami huañuiman rinajun.

22Mandaj Dios bendiciashpami tucuipi charijyachinga.

Chaicunahuanga, ima llaquitapash na cachamunllu.

23Juizu illaj runapaca, na alita ruranaca pujllashpa cushijunashnami.

Ashtahuangarin, yuyaita charij runataca, ali yachanami cushichijun.

24Diosta na manllaj runataca, pai manllashca llaquicunallatami japimunga.

Ashtahuangarin, alitalla rurajcunamanga, paicuna imata munashcatami caranga.

25Na alita ruraj runaca, jatun acapana yalijshna ñapash chinganllami.

Ashtahuangarin, alitalla ruraj runaca, causaita causajunllami.

26Quirupi vinagreta churashcashna,

ñavipi cushni yaicushcashnami,

imata rurangapapash na munaj runata mingashpa cachanaca canga.

27Mandaj Diosta manllashpa causajpimi, unaita causana tiyanga.

Ashtahuangarin, Paita na manllajcuna causana huatacunaca, ñapashmi tucurimunga.

28Alitalla rurajcunaca, cushijushpami shuyanajunga.

Ashtahuangarin, Diosta na manllajcunaca, imata shuyanatapash na charinchu.

29Mandaj Diosta cazushpa ali causajcunataca, Paillatami huacaichijun.

Ashtahuangarin, na alita rurajcunataca, chingaimanmi apanga.

30Alitalla ruraj runaca, napacha urmangachu.

Ashtahuangarin, Diosta na manllajcunaca tucuringami.

31Alitalla ruraj runaca, ali yachajunatami rimanga.

Ashtahuangarin, jatun na alita rimaj runataca, jallutami fitinga.

32Alitalla ruraj runaca, cushijuna shimicunatami rimanga.

Ashtahuangarin, Diosta na manllaj runaca, imatapash na alitallami rimanga.