1Chunga ishcai huatapaj, chunga ishcai quilla, callari punllapimi, Mandaj Diosca cashna nihuarca:
2“Huañuna aichayuj runa, Egipto llactata jatun mandaj Faraonmandaca, ninanda llaquirishpa, cashna nishpa huacayari:
‘Canga, shuj llactacunapaca, leonshnami carcangui.
Mama cucha yacupi causaj dragonshnami carcangui.
Cambaj jatun yacucunatapash, chaquichinllami carcangui.
Cambaj chaquihuan sarushpami, chai yacucunatapash mapayachin carcangui.
Chai yacu manñacunatapash, sarushpa purijmi carcangui’ nishpa huacayari” nihuarcami.
3Mandaj Jatun Diosca, cashnatapashmi nirca:
“Ashtaca gentecunapaj chaupimandami, candaca linllihuan japisha.
Chashna japijpimi, candaca vichai aisanajunga.
4Candaca chashna apamujpimi, pambapi shitasha.
Jahuata rij alasyu animalcunaca, cambaj jahuapi tiyaringa.
Sacha animalcunami, candaca na munangacaman micunga.
5Can huañujpica, urcucunapi shitagrisha.
Pugru pambacunapimi cambaj aichaca ismunga.
6Can purijushca pambapimi, cambaj yahuartaca jichasha.
Urcucunapipashmi cambaj yahuartaca jichasha.
Jatun larca yacucunapipash jundanga.
7Canda huañuchishca jipaca, jahua pachatapashmi quilpasha.
Chaipi tiyaj luzerocunatapashmi yanayachisha.
Inditapash, fuyuhuanmi quilpasha.
Lunapash na punchayachingachu.
8Canmandami, jahua pachapi tiyaj punchayachijcunapash yanayanga.
Cambaj llactapica, yana tutami tucunga.
Mandaj Jatun Dios Ñucami, chashna nini.
9Llactapi causajcunapash, ninandami llaquirinajunga.
Cambaj gentecunata, shuj llactacunaman prezu apajpimi, chashna llaquirinajunga.
Can na rigsishca llactacunamanmi, chashna apai tucunajunga.
10Canmandami, ashtaca gentecunata imata na rurai ushanajunga.
Canmandami, paicunata jatun mandajcunapash ninanda manllarinajunga.
Ñuca ninan ushaihuan cangunata llaquichijujpimi, chashna tucunga.
Canda llaquichijui punllapica, ninanda manllarishpami, chujchunajunga” nihuarcami.
11Mandaj Jatun Diosca, cashnami nijurca:
“Babilonia llactata jatun mandajmi, candaca llaquichingapa shamunga.
12Cambaj gentecunataca, ninan shinlli runacunahuanmi huañuchisha.
Tucui paicunami, llactacunapi ninan ushaita charijcuna canga.
Paicunami, jariyashca Egipto llacta gentecunatapash, llaquichishpa tucuchinga.
13Yacupi causaj millai animalcunatapashmi tucuchisha.
Chai yacutaca, runapash, animalcunapash na ashtahuan mapayachingachu.
14Shinallata, chai yacucunataca, mapa illajta rurashpami, aceiteshna punchapamba rijujta saquisha.
Mandaj Jatun Dios Ñucami, chashna nini.
15Egipto llactataca jichushcatami saquinga.
Chaipi imalla tiyajcunatapash quichushpami apanga.
Chaipi causajcunatapash tucuillata huañuchijpimi, Ñucataca, Mandaj Dios cajta yachanajunga.
16Cai yarishpa yarishpa huacana shimicunatami candanajunga. Shuj llactacunapi causaj huarmicunami, Egipto llactamandapash, chaipi tucui causajcunamandapash, yarishpa yarishpa huacanajunga” nijurcami Mandaj Jatun Diosca.
17Chunga ishcai huatapaj, callari quilla, chunga picha punllapimi, Mandaj Diosca, cashna nihuarca:
18“Huañuna aichayuj runa, Egipto llactapi causanajuj ashtaca gentecunamandaca, yarishpa yarishpa cashna huacayari:
Paitapash, jatun llactacunapi causaj huarmicunatapash, uraiman shitayari.
Huañushpa tucuicuna rij pushtuman shitayari.
19Canga, ninanda juyai tucushcami carcangui.
Cunanga, circuncisionda na rurashca gentecunahuan pacta rilla.
20Espadahuan huañuchi tucushca gentecunahuanmi urmanga.
Paitaca, espadahuan huañuchi tucushca cachunmi saquircani.
Egipto llactata mandajtapash, chaipi tucui causajcunatapash pushamuichilla.
21Egipto llactataca, ninan shinlli runacunami, Seol ucumanda rimanajunga.
Paicunami, Egipto llactataca yanapashca carca.
Cunanga, circuncisionda na rurashca gentecunahuanmi, Seolpi pacta huañushca sirinajun.
22Asiria llactapash, paipaj ashtaca gentecunandimi chaipi.
Paita pambashca muyundipica, paipaj gentecunata pambashca utujucunami tiyanajun.
Paicunapash tucuillami, espadahuan huañuchi tucurca.
23Paicunataca, manllanai utuju quimiriacunapimi pambarca.
Chaipi causashca runacunapash, chaipillatami pambarca.
Paicunataca espadahuanmi huañuchishca carca.
Paicunaca, tucui llactacunapi causajcunatami, manllachishpa causanajushca carca.
24Elam shuti llactapash chaipimi.
Paita pambashca muyundipimi, ashtaca gentecunatapash pambarca.
Paicunaca, espadahuan huañuchi tucushcami carca.
Paicunaca, circuncisiondapash na rurashca cashpallatami, pambai tucurca.
Tucui llactacunapi causajcunatami, paicunaca manllachishpa causarca.
Cunanga, paicunataca pipash na yarijpimi huañushca sirinajun.
25Paica, paipaj macanajuj runacunandimi, huañushca sirinajun.
Paicunataca chaipimi tucuillata pambarca.
Paicunataca, circuncisionda nara rurajpillatami, espadahuan huañuchirca.
Paicunaca, tucui llactapi causajcunatami manllachishpa causashca carca.
Cunanga, paicunataca pipash na yarijpimi huañushca sirinajun.
Huañushcacunapaj chaupipimi, paipash churai tucurca.
26Mesec shuti, Tubal shuti llactacunapash, paicunapaj macanajuj runacunandimi huañushca sirinajun.
Paicunataca chaipimi tucuillata pambarca.
Paicunataca, circuncisionda nara rurajpillatami, espadahuan huañuchirca.
Paicunaca, tucui llactapi causajcunatami manllachishpa causashca carca.
27Paicunataca, circuncisionda na rurashca, millai runacunahuanga na pambarcachu.
Paicunaca, paicunapaj macanajuna jirrucunandimi Seolman cachai tucurca.
Espadatapash saunachishpami pambanajurca.
Paicunaca, paicunapaj juchamandallatami huañuchirca.
Shuj llactacunapi shinlli gentecunatapash manllachishpa causaimandami, chashna huañuchi tucurca.
28Egipto llactapi causajcunalla, cangunaca circuncisionda na rurashca runacunahuanmi llaquichi tucunguichi.
Cangunapash, espadahuan huañuchi tucushca gentecunahuanmi pacta sirigringuichi.
29Edom llactapash, chai llactata jatun mandajcunapash, cati mandajcunapashmi chaipi huañushca sirinajun.
Paicunaca, ninan shinlli runacunahuanmi, espadahuan huañuchi tucushca gentecunahuan pacta sirinajun.
Paicunaca, circuncisionda na rurashca runacunahuanmi, chaipillata huañushca sirinajun.
30Janajman tiyaj llactata mandajcunapashmi, chaipi huañushca sirinajun.
Sidón llactamanda gentecunaca, tucuillami chaipi huañushca sirinajun.
Paicunaca, tucuicunata manllachij cashpapash, cunanga huañushcami sirinajun.
Espadahuan huañuchi tucushca, circuncisionda na rurashcacunahuanmi pacta huañushca sirinajun.
Paicunaca, tucui gentecunashnallatami huañushpa pambai tucunajun.
31Faraonga, chai tucui huañushcacunata ricushpami, paipaj gentecuna huañushcamandaca, na yapa llaquiringa. Faraonbash, paipaj macanajuj runacunapash, espadahuanmi huañuchi tucurca. Mandaj Jatun Dios Ñucallatami, chashna nini.
32Ñucami, cai pachapi causajcunamanga, ninan manllaita cachamurcani. Chaimandami Faraonbash, paipaj ashtaca gentecunapash, espadahuan huañuchi tucushca, circuncisionda na rurashcacunahuan huañushca sirinajunga” ninmi Mandaj Jatun Diosca.
Who We AreWhat We EelieveWhat We Do
2025 by iamachristian.org,Inc All rights reserved.
