NÚMEROS 14 - Quichua Imbabura 2016

Israelcuna, Mandaj Diosta fiñachishcamanda(Deut. 1:26-33)

1Tandanajushca Israelcunaca, ninanda caparishpa huacashpami, chai tutaca pacarinajurca.

2Chaipimi tucuilla tandanajushca Israelcunaca, Moisestapash, Aarondapash ninanda fiñashpa cashna ninajurca: “¡Egipto llactapillata huañushpachari, ali canchiman carca! ¡Na cashpaca, cai jichushca pambapillata huañushpami ali canchiman carca!

3¿Mandaj Diosca imapata ñucanchitaca, cai llactapi espadahuan huañuchi tucunajuchun pushamushca? ¿Ñucanchi huarmicunatapash, huahuacunatapash, prezu causachunllu pushamushcanga? ¿Nachu, Egipto llactaman cutin tigrashpa ali canchiman?” ninajurcami.

4Caishuj chaishuj chashna nirishpami: “Cunanga shuj mandajta churashpa, Egiptoman tigrashunchi” ninajurca.

5Shina ninajujpimi Moisespash, Aaronbash, chai tucuilla Israelcuna ricujta cungurishpa, alpaman chayajta cumurinajurca.

6Chaipimi Canaán llactata ricungapa rishcapuramanda, Nun runapaj churi Josuepash, Jefone runapaj churi Calebpash, ninandapacha llaquirishpa paicunapaj churajushcataca liquinajurca.

7Paicunami, chai tucuilla tandanajushca Israelcunataca cashna ninajurca:

“Ñucanchi ricungapa rishca llactaca, jatun juyaillagupachami carca.

8Mandaj Dios ñucanchita juyashpaca, lechepash, balun mishquipash ninandapacha tiyaj llactatami ñucanchiman caranga.

9Shinamandami Mandaj Diostaca na fiñachina canguichi. Chai llactapi causajcunatapash, na manllanachu canguichi. Paicunataca, tandata micujshnami tucuchishun. Paicunataca pipash na yanapangachu. Mandaj Diosmi ñucanchihuan, shina cajpimi paicunataca na manllana canguichi” ninajurcami.

10Shina nijpimi gentecunaca, rumicunahuan huañuchingapa munanajurca. Ashtahuangarin Mandaj Diosmi, Israelcunahuan tuparina jatun carpa huasipi punchapamba ricurirca.

11Chaipimi Mandaj Diosca, Moisesta cashna nirca:

“Cai gentecunaca, ¿ima punllacamanda Ñucata fiñachishpa causajgrihuan? Paicunapaj chaupipi cai tucui rurashcacunata ricuchijujpipash, ¿ima punllacamanda Ñucataca na crishpa causajgrihuan?

12Paicunataca, huañuchij ungüihuanmi tucuchigrini. Paicunatapash ashtahuan yali gentecunata, canmanda mirachijpimi mandashpa causangui” nircami.

13Shina nijpimi Moisesca, Mandaj Diostaca cashna nijurca:

“Mandaj Dioslla, Cambaj jatun ushaihuanmi, Egipto llactamandaca llujchimurcangui. Paicunata llaquichishcataca, Egiptopi causajcunapashmi yachaj chayanga.

14Chaitaca, cai llactapi causaj gentecunamanmi villanga. Paicunaca, Mandaj Dios Israelcunahuan cashcata, Mandaj Diosllata ñavi ñavi ricurijushcatami yachanga. Shinallata, punllapica fuyu ricurimushpa, tutapica nina pilar shayarimushpa pushamushcatami yachanajunga.

15Shinallata, shuj runata ñapash huañuchinshna, cai tucui Israelcunata huañuchishcatami yachanga. Chaita yachashpami cashna ninajunga:

16‘Mandaj Diosca, Israelcunaman carashami nishpa juramentushca llactaman na pushai ushashpami, jichushca pambapi huañuchishpa tucuchishca’ ninajungami.

17Jatun Dioslla, Cambaj ninan ushaitaca ninandapacha alicachishca cachun. Can Diosca cashnami nihuarcangui:

18‘Mandaj Dios Ñucaca, na ñapash fiñarishpa, ninanda juyajmi cani. Na cazushpa na alita rurajpipash, chaitaca perdonashami. Shina cashpapash, na alita rurashcamandaca llaquichishapachami. Taitacunapaj juchamandaca, churicunatami, quimsa miraicaman, na cashpaca chuscu miraicunacaman llaquichij cani’ nircanguimi.

19Cunanga cai gentecunapaj juchacunataca perdonapailla. Egiptomandapachami, Cambaj ninan juyaihuan, ninan ushaihuan, paicunapaj juchacunatapash perdonashpa, cai llactacaman chayachimurcangui” nijurcami.

Mandaj Dios, Israelcunata llaquichishcamanda(Deut. 1:34-40)

20Shina nijpimi Mandaj Diosca cashna nijurca: “Ñucami paicunapaj juchacunataca, can mañashcashna ña perdonashcani.

21Ashtahuangarin, Ñucami causaj Diospacha cani. Shinamandami, Ñuca ninan ushaica cai pachapica junda canga.

22Egiptopipash, jichushca pambapipash, Ñuca ninan ushaihuan pipash na rurai ushanallata rurajtami ricunajushca. Shina cashpapash, Ñuca ima nijujtapash na cazushpami, ña chungacaman fiñachihuashca.

23Shina cashpami paicunapaj ñaupa taitacunaman carashapachami nishpa juramentushca llactataca na japigringa. Ñucata yangapi churashcamandami maijambash napacha chayagringa.

24Ashtahuangarin, Ñucapajta ruraj Caleb runallami, cazushpa ali yuyaicunata charishcamanda, pai ricungapa rishca llactaman chayagringa. Shinamandami, paipaj miraicunapash, chai llactataca paicunapaj cachun japinga.

25Chai pugru pambacunapica, amalec gentecuna, cananeo gentecunami causanajun. Cayapa tigrashpaca, shitashca pambaman llujshishpa, puca cuchaman rina ñanda japishpami rina canguichi” nijurcami.

26Mandaj Diosca Moisestapash, Aarondapash, cashnami nijurca:

27“Cai na ali gentecuna, Ñucata na alicachishpa rimanajujtaca, ¿ima punllacamanda uyajuna cani? Israelcuna Ñucata juchachishpa, na alicachishpa rimanajujtaca, ¿ima punllacamanda uyajuna cani?

28Paicunataca cashna ningui: ‘Ñucami causaj Diospacha cani. Ñucata, paicuna imata rimashcatami pactachigrini.

29Cangunapuramanda Ñucata na alicachishpa rimajcunaca, ishcai chunga huatata charijmanda vichaiman yupai tucushcacunaca tucuillami jichushca pambapi huañunga.

30Cangunaman carashapachami nishpa juramentushca llactapi causangapaca, napacha yaicui ushanachu canguichi. Shina cajpipash, Jefonepaj churi Calebhuan, Nun runapaj churi Josuehuanllami chai llactamanga yaicunga.

31Cangunaca: Ñucanchi huahuacunatami, prezu charingapa apanga nircanguichimi. Ashtahuangarin, paicunata Ñuca pushajpimi, canguna na munashca llactaman yaicunajunga.

32Ashtahuangarin cangunaca, cai jichushca pambapimi huañunguichi.

33Cangunapaj huahuacunami, chuscu chunga huatacaman, cai jichushca pambapi michijcuna chingashcashna purinajunga. Paicunami, canguna na cazushcamandaca, cai jichushca pambapi, canguna huañushpa tucuringacaman llaquita apanajunga.

34Canaán llactata ricungapa rishpaca, chuscu chunga punllapimi tigramurcanguichi. Shinamandami, chuscu chunga punllamandaca, chuscu chunga huatacaman, canguna na cazushcamandaca llaquichi tucunguichi. Chaipimi, Ñuca fiñarishpa imashna llaquichijtaca yachanguichi.

35Mandaj Dios Ñucallatami cashna nircani. Cai gentecuna, Ñucata na cazushpa na alita rurashcamandami, chashna llaquichishpa pactachina cani. Paicunaca, cai chaquishca pambapimi huañushpa tucuringa nijunmi’ nishpa villagringui” nijurcami.

Llactata ricungapa rij chunga na ali runacuna huañushcamanda

36Canaán llactata ricuchun Moisés cachashca runacuna tigramushpaca, chai llactataca na alicachishpami tucuilla Israelcunaman llullashpa villanajurca.

37Chai llactata na alicachishpa rimaj runacunaca, huañuna ungüita Mandaj Dios cachamujpimi huañunajurca.

38Ashtahuangarin, chai llactata ricungapa rijpuramanda, Nun runapaj churi Josuehuan, Jefone runapaj churi Caleb runahuanga na huañurcachu.

Horma pueblopi Israelcuna mishai tucushcamanda(Deut. 1:41-46)

39Tucui chaicunata Moisés villajpimi, Israelcunaca ninandapacha llaquirishpa huacanajurca.

40Paicunaca, cayandi tutamandata jatarishpa, urcu pundaman rishpami:

“Ñucanchica juchatami rurapashcanchi. Shina cashpapash, Mandaj Dios carasha nishca llactaman vichai ringapa ñami caipi capanchi” ninajurcami.

41Shina ninajujpimi Moisesca cashna nirca: “¿Imashpata Mandaj Dios mandashcataca na cazushpa yangapi churanguichi? Canguna chaiman rijpipash Diosca na uyangachu.

42Cangunaca na chaiman vichai rinachu canguichi. Mandaj Diosca na cangunahuan cajpimi, cangunata fiñajcunapaj maquipi huañunguichi.

43Chaipica amalec gentecuna, cananeo gentecunami espadahuan huañuchingapa shuyanajun. Cangunallata Mandaj Diosta na cazushcamandami, Mandaj Diosca cangunata jichushpa saquishca” nircami.

44Shina nijpipash na cazushpami Israelcunaca, urcu alpacunaman ashtahuan rinajurca. Chashna rijpipash, Mandaj Dioshuan ari nishpa quilcashcata alichishca tiyajuj arcataca na llujchircachu. Moisespash carpacuna chaupimandaca na llujshircachu.

45Chashna rinajujpica, chai lomacunapi causaj amalec gentecuna, cananeo gentecuna urai shamushpami, Israel gentecunataca macashpa, Horma shuti pueblocaman catimunajurca.