LEVÍTICO 14 - Quichua Imbabura 2016

1Mandaj Diosca, Moisestaca cashnami nijurca:

2“Lepra ungüimanda ali tucushca jipaca, cai mandashcatami pactachinga: Paitaca, sacerdotepajman apajpimi,

3carpacunamanda llujshishpa paitaca, sacerdotellata imashna cajta ali ricunga. Chaipi lepra ungüi illaj cajta ricushpami,

4sacerdoteca mapa illajta rurangapami, ishcai uchilla alasyu animalcunata japigrichun mandanga. Shinallata cedro caspita, puca telata, hisopo shuti uchilla yura fangatapash apamuchunmi mandanga.

5Sacerdotemi, alasyu shuj animaltaca, pugyumanda llujshijuj yacuta, alpa mangapi churashpa, chaipi huañuchijuchun mandanga.

6Chai jipaca, alasyu causaj animaltapash, cedro caspitapash, puca telatapash, hisopo yuratapash japishpami, pugyumanda llujshijuj yacupi huañuchishca animalpaj yahuarpi mutiyachinga.

7Chaitaca, lepra ungüihuan cashcamanda, mapa illaj tucujujpaj jahuapi, canchiscaman tsirapachishpami, ‘mapa illajmi cangui’ ninga. Alasyu causaj animaltaca, pambapimi cacharinga.

8Ima mapapash illaj tucujujca, paipaj churajunacunata tajshashpa, ajchatapash tucuillata rutushpa, yacuhuan armashpami, mapa illaj canga. Chai jipami, carpacunata shayachishca pambaman yaicushpapash, canchis punllacaman pai causajushca carpamanga na yaicushpa, canllapi causajunga.

9Canchis punlla jipaca, paipaj uma ajchatapash, barbastapash, ñavi milmatapash, tucuilla milmatapashmi rutunga. Shinallata, paipaj churajushcacunatapash tajshashpa, paipash yacupi armashpami mapa illaj canga.

10Pusaj punlla jipaca, ima huaglipash illaj ishcai maltun llamata, ima huaglipash illaj shuj huatata charij malta huarmi llamatami apamunga. Shinallata, sucta kilo chaupi yali ashtahuan ali jacutapash, aceitehuan masashpami apamunga. Chaupi litro aceitetapashmi apamunga.

11Chai jipaca, ima mapapash illajta rurajuj sacerdotemi, mapa illaj tucujujtapash, tucuilla chai ofrendacunatapash, Dioshuan tuparina jatun carpa pungupi, Mandaj Diosman cunga.

12Chaipimi, sacerdoteca, shuj maltun llamata japishpa, chaupi litro aceitehuan, na alita rurashcamanda, Taita Diosman cunga. Chaicunataca, Mandaj Diospaj ñaupajpi, vichai ricuchishpa cunashnallatami cunga.

13Chai maltun jari llamataca, juchamanda cushpa, na cashpaca, tucuillata rupachina animalta cuna pushtupillatami, Diospajlla huasipi, cungata cuchushpa huañuchinga. Juchamanda cushpa huañuchishca animalpash, na alita rurashcamanda cushpa huañuchishca animalpash, sacerdotepajllatami canga. Chaica Diospajlla shicanyachishcami.

14Na alita rurashcamanda cushpa huañuchishca animalpaj yahuartaca, sacerdote japishpami, ima mapapash illaj tucujujpaj ali maquiman maqui mama dedopipash, chaqui mama dedopipash, rinri pundapipash chai yahuarhuan javinga.

15Shinallata, sacerdotemi, chai chaupi litro aceitemanda ashata japishpa, paipaj lluqui maqui tablapi churanga.

16Shinallata, lluqui maquipi charijuj aceitepimi, chaishuj maqui dedota mutiyachinga. Chaitaca paipaj dedohuanmi, Mandaj Diospaj ñaupajpi canchiscaman tsirapachinga.

17Paipaj maquipi puchushca aceitetaca, sacerdotemi ima mapapash illaj tucujujpaj, ali maquiman maqui mama dedopipash, chaqui mama dedopipash, rinri pundapipash javinga. Na alita rurashcamanda cushpa huañuchishca animalpaj yahuarhuan javishca jahuapimi, chashna javinga.

18Paipaj maquipi ashtahuan puchushca aceitehuanga, ima mapapash illaj tucujujpaj umapipashmi javinga. Paipaj juchamandaca, sacerdotemi, Mandaj Diospaj ñaupajpi chashna ruranga.

19Chai jipaca sacerdotemi, juchamanda Diosman animalta cushpa huañuchinga. Shinallata, ima mapapash illaj tucujujpaj juchata perdonachunmi, Diosman cunga. Chai jipami, tucuillata rupachina animaltapash, cungata cuchushpa huañuchinga.

20Tucuillata rupachina animalpaj aichatapash, ofrendatapash, sacerdotemi, altar jahuapi churachun mandanga. Ima mapapash illaj tucujujpaj juchata perdonachun, sacerdotellata rurashpa pactachijpimi, mapa illaj canga.

21Chaita rurashpa pactachingapa na charishpaca, Dioshuan ali tucungapa shuj maltun llamaguta, na alita rurashcamanda vichai ricuchishpa cujshnallata cungapami apamunga. Shinallata, ishcai kilo yali ashtahuan ali jacuta aceitehuan chapushcatapash, chaupi litro aceitetapashmi apamunga.

22Shinallata, ishcai urpita, na cashpaca ishcai palomata, imashna pai ushashcagutalla apamuchun. Chaicunataca, shujtaca, juchamanda cungapa, caishujtaca, tucuillata rupachingapami cunga.

23Chaicunataca, mapa illaj tucujui punllamanda ña pusaj punlla tucujpimi, sacerdoteman apamushpa, Dioshuan tuparina jatun carpa pungupi, Mandaj Diospaj ñaupajpi cunga.

24Chaipica, juchata perdonachun cungapa apamushca maltun llamatapash, chaupi litro aceitetapash, sacerdotellata japishpami, Mandaj Diospaj ñaupajpi vichai ricuchishpa cujshnallata cunga.

25Chai jipami, na alita rurashcamanda cushca maltun llamataca, cungata cuchushpa huañuchinga. Chai llamapaj asha yahuarta sacerdote japishpami, mapa illaj tucujujpaj ali maquiman maqui mama dedopipash, chaqui mama dedopipash, rinri pundapipash chai yahuarhuan javinga

26Chai jipami, sacerdotellata paipaj lluqui maqui tablapi, asha aceiteta churanga.

27Sacerdotellatami, paipaj lluqui maquipi charijuj aceiteta, paipaj chaishuj maqui dedohuan japishpa, Mandaj Diospaj ñaupajpi canchiscaman tsirapachinga.

28Shinallata, sacerdotemi, paipaj maquipi charijuj aceitetaca, mapa illaj tucujujpaj ali maquiman maqui mama dedopipash, chaqui mama dedopipash, rinri pundapipash chai yahuarhuan javinga. Na alita rurashcamanda cushpa huañuchishca animalpaj yahuarta javishca jahuallapitami, aceitehuan javinga.

29Sacerdotepaj maquipi charijuj aceite puchushcataca, mapa illaj tucujujpaj umapimi javinga. Mandaj Diospaj ñaupajpi Dioshuan ali tucuchunmi, chashna ruranga.

30Shinallata, urpicunamanda shuj urpita, na cashpaca palomacunamanda shuj palomata, pai imata cui ushashcagutallami cunga.

31Shujtaca, juchata perdonachunmi huañuchingapa cunga, caishujtaca tucuillata rupachingapami Diosman cunga. Shinallata, ofrendatapashmi cunga. Chaitaca sacerdotemi, mapa illaj tucujujpaj juchamanda, Mandaj Diospaj ñaupajpi rupachinga” nijurcami.

32Cai tucui mandashcacunaca, lepra ungüita charishpa, ali tucushpa mapa illaj saquiringapa, na yapalla charijcunaman mandashcacunami.

33Mandaj Diosca, Moisestapash, Aarondapash cashna nishpami mandarca:

34“Cangunapaj cachun, Ñuca carashca Canaán llactaman ña chayajpica, cangunapaj chai llactapi tiyaj maijan huasipi cashpapash, lepra ungüitami churasha.

35Chashna tucujpica, sacerdotepajman huasiyuj shamushpami: ‘Ñuca huasipica, millai ungüimi ricurishca’ nishpa villanga.

36Shina villajpica, millai ungüita ricungapa nara yaicushpallatami, chai huasipi causajcunatapash, chaipi imalla tiyashcatapash llujchinajuchun sacerdotellata mandanga. Chai huasipi tucui imalla tiyajcunata chai ungüi ama mapayachijuchunmi, chashna mandanga. Chai jipami sacerdoteca, chai huasita alipacha ricungapa yaicunga.

37Chai millai ungüitaca alipachami ricunga. Shina ricushpaca, chai huasi pircapica, verdeyashca, pucayashca, mapa cajtami ricunga. Chaicunataca, pircapi ucucaman mapa cajtami ricunga.

38Chai huasimandaca, sacerdote punguman llujshishpami, chai huasitaca canchis punllacaman vichashpa saquinga.

39Ña canchis punlla tucujpi, sacerdotellata ali ricungapa tigrajpica, chai huasi pircacunapica, chai millai ungüica ashtahuan mirashcami ricuringa.

40Shina cajpica, millai ungüicuna tiyaj rumicunata llujchinajuchunmi sacerdotellata mandanga. Chai rumicunataca, pueblomanda canllaman apashpami, mapata shitana pushtupi shitanga.

41Shinallata, huasi ucu patacunatapash, muyunditami llagllachun mandanga. Chai llagllashca alpataca, pueblomanda llujchishpa, mapata shitana pushtupimi shitanga.

42Chai anchuchishca rumicunapaj randica, shuj mushuj rumicunatami churanajunga. Shinallata, huasi pircatapash turuta rurashpami llambunajunga.

43Ashtahuangarin chai huasipica, rumicunata anchuchishpa, pircacunatapash muyundita llagllashpa, turuhuan quilpashpa llambushca jipami, chai millai ungüica cutin ricuringa.

44Shina cajpi, chai huasiman sacerdote yaicushpa alipacha ricujpi, chai millai ungüi ashtahuan mirashca cashpaca, chai huasipica millai lepra ungüimi canga. Chai huasica, mapami canga.

45Shina cajpimi, chai huasitaca tucuillata urmachishpa, rumicunatapash, caspicunatapash, alpacunatapash, pueblomanda tucuillata llujchishpa, mapata shitana pushtupi shitanga.

46Chai huasita vichachun, sacerdote mandashca punllacunapi, maijambash chai huasiman yaicushca cashpaca, tutayangacamanmi mapa canga.

47Shinallata, chai huasipi maijambash puñushca cashpa, chai huasipi micushca cashpapash, pai churajushcacunata tajshachun.

48Ashtahuangarin, shuj turuhuan quilpashpa alichishca jipa, sacerdotellata cutin yaicushpa alipacha ricujpi, chai millai ungüi na ashtahuan mirashca cajpica, chai millai ungüi anchurishca cashcamandami, sacerdotellata, ‘cai huasica mapa illajmi’ ninga.

49Chai jipaca, chai huasita mapa illajta rurangapami, alasyu ishcai animalta, cedro caspita, puca telata, hisopo shuti yurata, sacerdotellata japinga.

50Shina japishpami, alasyu shuj animaltaca, pugyumanda llujshijuj yacuta, alpa mangapi churashpa chaipi huañuchinga.

51Chai jipaca cedro caspita, hisopo yurata, puca telata, causaj animaltapash japishpami, pugyumanda llujshijuj yacupi huañuchishca animalpaj yahuarpi mutiyachishpa, chai huasipica canchiscaman tsirapachinga.

52Chai huasitaca, alasyu animalpaj yahuarhuan, pugyumanda llujshijuj yacuhuan, causaj animalhuan, cedro caspihuan, hisopo yurahuan, puca telahuanmi, ima mapapash illajta ruranga.

53Chai jipami, causaj animaltaca pueblomanda canllaman llujchishpa pambapi cacharinga. Shinami, chai huasipi tiyaj mapata anchuchijpi, mapa illaj saquiringa” nijurcami.

54Cai mandashcacunaca, lepra ungüimandapash, tiña ungüimandapash,

55churajunacunapi, huasicunapi tiyaj lepra ungüimandapash,

56shinallata, chupushpa punguichij ungüimandapash, grano llujshijuj ungüimandapash, aichapi yurajyashca ungüimandapash,

57mapa cajta, na mapa cajta ricuchingapami cai mandashcacunaca tiyajun. Lepra ungüimandaca, cai mandashcacunatami pactachina canga.