ECLESIASTÉS 5 - Quichua Imbabura 2016

Imata ari nishpapash, pactachinapacha cashcamanda

1Diospaj huasiman rishpaca, imata rurangapapash aligutami yarina cangui. Juizu illaj runacunashna, Diosman animalta carashpa huañuchingapa randica, imata yachachijujtami aliguta uyashpa yachajuna cangui. Paicunaca, ima na alita ruranajushcatapash, na yachanllu.

2Taita Diospaj ñaupajpi, imata nina cashpapash aliguta yarinarami cangui. Diosca, jahua pachapimi causajun. Canga cai alpapimi cangui. Shina cashcamanda, na yangata imatapash rimanallachu cangui.

3Yapata imatapash yarijushpaca, puñuitapash na usharinllu. Shinallata, yapata imatapash rimarijushpaca, juizu illaj runashnami ricurin.

4Dioshuan ari nishcataca, pactachinapachami cangui. Diosca, juizu illaj runacunahuanga na cushijunchu. Imata rurasha nishcatapash pactachinami cangui.

5Ari nishpa na pactachi ushanapaj randica, na ari ninarapashmi ali.

6Ama cambaj shimihuanllata juchata ruranguichu. Diospajta rurajcunapaj ñaupajpica: “Na yachaimandami shina rurashcani” nishpaca ama ninguichu. Can tucui ima charishcacunataca, ¿Cambaj shimi rimashcamanda, Taita Dios fiñarishpa tucuchishca cachunllu munangui?

7Puñushpalla sirijpica, yangata rimana yuyaicunallami shamun. Ashtahuangarin canga, Taita Diostallami manllana cangui.

Cai causaipica, imapash yangallatami

8Cai pachapi, huajchacunata ninanda llaquichinajujpica, canga na manllarishpa ricunachu cangui. Mandashpa causajujtaca, paitapash yali mandajmi ricujun. Chai mandajcunatapash, ashtahuan yali jatun mandajpash tiyanrami.

9Shinallata, cai alpapi tucui ima tiyashcapash, tucuicunapajmi. Jatun mandajpash, alpapi ima tiyashcataca, aliguta ricushpami mandanga.

10Culquitalla juyaj runaca, culquita mashnata charishpapash na cushijungachu. Ninanda charijyashpa cushijurijushpapash, ima alipash na ricuringachu. Tucui chaicunapash yangallatami.

11Ashtahuan charijyajpica, chai charishcacunata japingapa munajcunapash ashtahuanmi miran. Charijyashca runaca, ¿ima alitashi japinga? ¿Nachu ricuitalla ricui ushanga?

12Tucuita imatapash rurashpa causaj runaca, llashajta micushpapash, ashagutalla micushpapash, aliguta puñunllami. Ashtahuangarin charij runataca, pai charishcacunami na puñuchun saquin.

13Cai pachapica, shuj ninan llaquicuna tiyajtami ricurcani. Ninanda charijyashpapash, na alipaj charijtami ricurcani.

14Chaicunataca, na alicunapilla tucuchishpami, paipaj huahuacunamanga, imatapash na saquin.

15Imashnami mamapaj vijsamandaca lluchulla huacharin, chashnallatami ringa. Cai pachapi imata charishcatapash na apashpa ringachu.

16Cai pachaman imashna shamushca cashpapash, chashnallata tigrana, cashpami, imata charinapash napacha ali ricurin. Yangallata cai pachapi imata rurashcamandaca, ¿ima alitashi japinga?

17Chai jahuapash, paipaj tucui causaipimi llaquicunahuanlla causanga. Paica nanaicunahuan, ninan llaquihuan, imapash illajmi tucuringa.

18Cai pachapica, shaijungacaman imatapash rurashpa micushpa, ufiashpa cushijushpa causanami ali cajta ricurcani. Taita Dios causaita cushca punllacunapica, chashna causana ali cajtami ricurcani. Chashna causachunmi Taita Diosca, gentecunamanga curca.

19Shinallata, Taita Dios imaguta runacunaman carashpapash, micushpa cushijushpa causachunmi munan. Imaguta rurashpa charishpapash, Taita Dios carajpimi charinchi.

20Taita Dios cushijuita carajpimi, cai causaipi ima llaquita charishcatapash cunganga.