DEUTERONOMIO 20 - Quichua Imbabura 2016

Jatun macanajuicunapi imatalla ruranata mandashcamanda

1Canda fiñajcunahuan jatun macanajuiman llujshishpaca, paicunapaj caballocunata, carretacunata, cangunata yali ashtaca macanajuj runacunata ricushpaca na manllanachu canguichi. Egipto llactamanda canda llujchimuj Mandaj Taita Diosmi canhuan canga.

2Macanajungapa ña quimirinajujpimi, shuj sacerdote shayarishpa, macanajuj runacunata rimanga.

3Paica cashnami ninga: ‘Uyahuaichi Israelcuna, cangunata fiñajcunahuan macanajungapami tandanajunguichi. Cangunaca na manllashpa, shinllipachami shayarina canguichi. Paicunapaj ñaupajpica, na manllarishpa chujchurinachu canguichi.

4Cangunata Mandaj Taita Diosmi cangunahuan ringa. Paimi, cangunata fiñajcunahuan macanajushpa mishana ushaita cunga’ ningami.

5Chaipaj jipami macanajuj runacunata mandajcunaca cashna ninga: ‘¿Maijambash mushuj huasita huasichishca cashpa, chai huasipi nara causashcanguichiman? Chashna cashpaca, huasiman tigraichilla. pactara macanajuipi huañujpira, shuj runara chai huasipi causagrinman.

6Shinallata, ¿Maijambash uvata tarpushpa, chai chagramanda nara micushca canguichiman? Chashna cashpaca, huasiman tigraichilla. pactara macanajuipi huañujpira, shuj runara chai chagramanda micunman.

7Na cashpaca, ¿Maijambash cazarangapa ari nishca cashpa, nara cazarashca canguichiman? Chashna cashpaca huasiman tigraichilla. pactara macanajuipi huañujpira, chai cazarana huarmihuan shuj runara cazaranman’ ninajungami.

8Macanajuj runacunata mandajcunaca cutinmi cashna ninajunga: ‘¿Maijan runacunapash manllai shunguta charishpa chujchunajunguichiman? Chashna cashpaca, huasiman tigrashpa richilla. pactara cangunapaj cumbacunamambash, manllana shungutara cunguichiman’ ninajungami.

9Macanajuj runacunata mandajcuna, gentecunata chashna rimashca jipami, ñaupashpa rij macanajuj runacunata agllashpa churajpi, paicunaca gentecunata ñaupashpa rinajunga.

10Shuj puebloman macanajungapa ña chayashpaca, chaipi causaj gentecunahuan aliguman parlangapa ringui.

11Shina parlangapa rijpi, chai pueblopi causajcuna, aliman tucushpa, punguta pascashpa chasquishpaca, cangunapajta rurajcuna, gañangunami tucunga.

12Ashtahuangarin, chai pueblopi causajcuna na aliman chasquishpa, macanajungapa shayarijpica, pueblota chaupipi churashpa macanajui callaringuilla.

13Canda Mandaj Taita Dios, paicunataca cambaj maquipi churajpica, tucui jaricunatami espadahuan huañuchina cangui.

14Huarmicunata, huahuacunata, animalcunata, chaipi tucui imalla tiyashcacunata, chaipi imatalla charishcacunatami cangunapaj cachun japina canguichi. Canda Mandaj Taita Dios, canman cushca cajpimi chaicunataca japinalla canguichi.

15Cai llactamanda carupi cashpa, na cai llactamanda pueblocunatami chashna rurana canguichi.

16Ashtahuangarin, canda Mandaj Taita Dios canman carashca cai llactapi tiyaj pueblocunapi causajcunataca tucuillatami huañuchina canguichi.

17Shina cashpami, heteo, amorreo, cananeo, ferezeo, heveo, jebuseo gentecunataca, canda Mandaj Taita Dios mandashcashna tucuicunata tucuchina canguichi.

18Paicunapaj rurashcalla dioscunaman imatapash na alicunata rurashpa ama catingapa, canda Mandaj Taita Diosta ama fiñachingapami, chashna tucuchina canguichi.

19Maijan pueblopi causajcunahuan macanajushpa, chai pueblota chaupipi churashca cashpaca, chaipi tiyaj quirucunataca na hachahuan fitinachu canguichi. Chaicunamandallata micuna cashpami na fitina canguichi. Chai quirucunaca, na runacuna cashcamanda, canhuan macanajungapaca na shamungachu, shina cashcamandami napacha shitana canguichi.

20Ashtahuangarin, imapash na fucuj quirucunataca urmachinguilla. Chai caspicunahuanga, jarcanacunata rurashpa shayachishpami, chai pueblota mishangacaman macanajuna canguichi.