NEHEMÍAS 6 - Quichua Imbabura 2016

Nehemiasta huañuchingapa munashcamanda

1Jerusalén muyundi jatun pircata rurashpa tucuchishca cajpimi, Sanbalat shuti, Tobías shuti, árabe gentepura Gesem shuti runapash, ashtahuan shuj fiñajcunapash yachaj chayarca. (Chai punllacunapica, pungucunataca nara churashcachu carca).

2Sanbalat shuti runapash, Gesem shuti runapash, ñucata cayachun cachashpaca: “Ono shuti pambapi tiyaj uchilla pueblocunapi, maipi cashpapash, tandanajungapa shamui” nichunmi cachamurca. Ashtahuangarin ñucata llaquichingapallami chashna cachamushca carca.

3Shinamandami ñucapash, paicunata cashna nigrichun cacharcani: “Ñucapaj imata rurajushcata saquishpa, cangunahuan tandanajungapa rijpica, tucuimi shitashca saquiringa. Shinamandami na ushana capani” nichunmi cacharcani.

4Chaitaca chuscucaman villachun cachamujpimi, ñucapash chashnallata tigrachircani.

5Sanbalat shuti runaca, caihuanga ña pichacamanmi, chashna quilcashcata na pillushcata, paipajta ruraj runaman cachamurca.

6Chai quilcashcapica cashnami nijurca: “Shuj llactapi causajcunapash, cashna nijtami uyanchi: ‘Cambash, Judá llactapi causajcunapash, jatun mandajta na cazushpa jatarinata yarishpami, chai jatun pircataca alichinajun’ nijtami uyanchi. Gasmu shuti runapash, chashnallatami nijun. Chaicunata uyashpaca, can jatun mandaj tucungapa munajujtami uyanchi.

7Shinallata: ‘¡Judá llactapica, jatun mandaj tiyanmi!’ nishpa, Jerusalenbi canmanda villachunmi, profetacunata churashcangui. Jatun mandaj chaicunata nara yachajpillata, ñucanchihuan parlaringapa ucha shamui” nishpa quilcashcami carca.

8Shinamandami, paitaca: “Can nijushcacunaca, imapash na uyarinllu. Cambaj yuyaillami shina nijungui” nircani.

9Paicunaca ñucanchita manllachingapami: “Chai jatun pircata ruranajushcataca, paicunapaj maqui shayajurijpi na tucuchi ushangachu” ninajurca. Shinamandami: “Taita Dioslla, ushaita carahuai” nishpa mañarcani.

10Chai jipami, Delaía shuti runapaj churi Semaías shuti runapaj huasiman shamurcani. Paica, Mehetabel shuti runamanda miraimi carca. Semaías shuti runaca, paipaj huasipi vicharishca tiyajushpami cashna nihuarca: “Taita Diospaj huasi ucupi pungucunatapash ali vicharishpa tandanajushun. Cunan tutallatami canda huañuchingapa shamunga” nihuarca.

11Shina nijpimi, cashna nircani: “¿Pita ñucashna shuj jari jari runaca pacajungapara yaicunga? ¿maijan runata paipaj causaita quishpichingapa, Diospaj huasiman yaicungayari? Napacha yaicushachu” nircani.

12Sanbalat shuti runahuan, Tobías runahuan culquita pacalla cujpimi, Taita Diosca na cachamujpita ñucataca chashna nijushca carca.

13Ñucata manllachishpa juchata rurachingapami, culquita pacalla japirca. Ñuca na alita rurajpi, ñucata juchachishpa rimanajuchunmi, chashna rurashca carca.

14Ñuca Taita Dioslla, Sanbalat shuti, Tobías shuti runacuna caicunata rurashcamandaca paicunataca ricupayari. Noadías shuti huarmipash, caishuj villajcunapash, ñucata manllachishpa pandachingapa munashcataca ricupayari.

15Jerusalén muyundi jatun pircataca, Elul shuti quilla, ishcai chunga picha punllapimi tucuchircanchi. Picha chunga ishcai punllapimi tucuita ruraitaca tucuchircanchi.

16Chaita yachashpami, ñucanchita fiñajcunapash, ñucanchi muyundi llactacunapi causajcunapash manllarinajurca. Chai ruranacunataca, ñucanchi Taita Dios yanapajpi rurashpa tucuchijpimi, ninandapacha pingai tucunajurca.

17Judá llactapi mandajcunaca, tauca quilcashcacunatami, Tobías shuti runaman cachanajurca. Shinallata Tobías runapash, tauca quilcashcacunatami, tigrachishpa cachajurca.

18Tobías runaca, Ara shuti runapaj churi Secanías shuti runapaj ushihuanmi cazarashca carca. Paipaj churi Johanán shuti runapash, Berequías runapaj churi Mesulam shuti runapaj ushihuanmi cazarashca carca. Chaimandami, Judá llactapi causaj gentecunaca, Tobías runahuan shujllashnalla yarishpa tandanajushca carca.

19Shinallata ñuca ñaupajpica, Tobías runataca tucuipajmi ali ninajuj carca. Tobías runamambash, ñuca imatalla nishcatami villangapa rijlla carca. Chaimandami Tobiasca, ñucata manllachingapa quilcashcacunata cachamujun carca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help