ZACARÍAS 14 - Quichua Imbabura 2016

Jerusalén, shuj llactacunata mishana cashcamanda

1Mandaj Dios shamuna punllami ña pactamujun. Canguna imata charishcatapash, cangunapaj ñaupajpimi chaupirinajunga.

2Jerusalenbi causajcunahuan macanajuchunga, Ñucami shuj llactacunamanda gentecunata tandachimusha. Paicunami, cai pueblotaca quichunajunga. Cangunapaj huasicunapi imatalla charishcacunataca quichushpami apanajunga. Cangunapaj huarmicunatapash ninandami llaquichinga. Cai pueblopi causajcunamandaca chaupimi prezu apai tucunga. Ashtahuangarin, huaquin puchushca gentecunaca, cai pueblopillatami saquiringa.

3Mandaj Diosmi, macanajuna punllapi macanajushpa, chai llaquichij llactacunataca tucuillata chingachinga.

4Chai punllami, Mandaj Diosca, Jerusalén chimbapurapi tiyajuj Olivo loma jahuapi shayaringa. Chai Olivo lomaca, indi llujshimujmanmi tiyajun. Chai lomaca, indi llujshimujmanda, indi huashajunmanmi chaupiringa. Shina chaupirishpami jatun pugru pamba tucunga. Chaupi lomaca janajman, chaupi lomaca uramanmi saquiringa.

5Cangunaca, chai loma chaupi pugru pambapimi pacajungapa ringuichi. Loma chaupipi tiyaj pugru pambaca, Azal shuti llactacamanmi canga. Judá llactata jatun mandaj, Uzías mandajui punllacunapi, alpa mama cuyujpi pacajungapa rishca pambapimi pacajungapa ringuichi. Chai jipami, ñucata Mandaj Diosca, Paipaj angelcunahuan shamunga.

6Chai punllapica, punchapamba canapash, amsalla canapash na tiyangachu.

7Chai punlla imashna canataca, Mandaj Diosllami yachanga. Chaipica tutapash, punllapash na tiyangachu. Shina cajpimi, tutapash punchalla canga.

8Jerusalenmandaca, causaita caraj yacucunami llujshijunga. Chai yacucunaca, tamia punllacunapipash, rupai punllacunapipash, chaupica indi llujshimujman tiyajuj mama cuchaman, chaupica indi huashajunman tiyajuj mama cuchamanmi rinajunga.

9Mandaj Diosmi, tucui cai pachataca mandajunga. Chai punllapica, Mandaj Diostami, Pailla tucuita mandaj cajta yachanga.

10Tucui llactacunami, Geba shuti pueblomandaca, Jerusalén pueblo uraman tiyajuj, Rimón shuti pueblocaman pugru pamba saquirishca canga. Jerusalenga, jahuamanmi saquirishca tiyajunga. Chai pueblopimi, Benjaminbaj pungumandaca, punda tiyajushca pungu pirca tigranapi tiyaj pungucaman causanajunga. Shinallata Hananeel shuti runapaj jatun torremandaca, jatun mandajpaj uvata cutana pushtucamanmi causanajunga.

11Chaipimi aliguta causanajunga. Jerusalendaca na ashtahuan tucuchingachu. Ashtahuangarin, imatapash na manllashpami, cushijushpa causanajunga.

12Jerusalenbi causajcunahuan macanajungapa shamuj gentecunataca, Mandaj Diosmi millai ungüicunata cachamushpa llaquichinga. Paicunaca causajllatami, aichacuna ismushpa tucuringa. Ñavicunapash, ricunajushcandimi chaquinga. Jallupash, shimipillatami ismushpa tucuringa.

13Chai punllapica, Mandaj Diosllata ninanda manllachijpimi, paicunapurallata ninanda llaquichirinajunga. Ninanda ali purinajushca cumbahuanmi, paicunapura macanajushpa tucuringa.

14Judá llactapi causajcunapash, Jerusalenbimi macanajunga. Chai muyundi llactacunapi causajcunapaj charishca, curita, culquita, imata charishcatapash, chaipimi ashtacata tandachinga.

15Chashna ungüillatami, caballocunata, mulocunata, camellocunata, burrucunata, carpacunata shayachishca tiyanajuj pambacunapi tiyaj tucui shuj animalcunatapash tucuchinga.

16Shinallata Jerusalenbi causajcunahuan macanajungapa tucui llactacunamanda vichai shamushpa, na huañushpa puchushcacunaca, Jatun Mandaj Diosta, mañangapami huata chayajpica vichai shamunajunga. Diospaj carpacunata shayachishcata yarishpa, jatun cushijui punllata rurangapami shamunajunga.

17Cai pachapi causaj ayllucunamanda, Jatun Mandaj Diosta, Jerusalenbi mañangapa na vichai shamujpica, chai llactapi causajcunapajca, tamia illangami.

18Egiptopi causajcunamanda maijan ayllupash, Jerusalenman na vichai shamujpica, paicunapajpash tamiaca na tiyangachu. Chugllacunata rurashpa cushijuna punllaman na shamuj gentecunapaj llactataca, Mandaj Diosmi ninan ungüihuan llaquichinga.

19Chashnami Egiptopi causajcunapash, tucui llactacunapi causajcunapash, chugllacunata rurashpa cushijuna punllaman na shamushcamandaca, llaquita apanga.

20Chai punllapimi, caballocunaca: “JUCHA ILLAJ MANDAJ DIOSPAJMI” nishpa quilcashca campanacunata aparishca purinajunga. Diospaj huasipi tiyanajuj mangacunapash, altarpi tiyanajuj tastacunapash chashnanallatami canga.

21Shinallata Jerusalenbi, Judá llactapi tiyanajuj mangacunapash, Mandaj Diospajlla shicanyachishcami canga. Diosman animalta cushpa huañuchijcunapash, chai mangacunapimi yanunajunga. Chai punllapica, Mandaj Diospaj huasipica, imata randishpa, jatujcunapash na ashtahuan tiyangachu.