1Suctapaj cati sellashcata Llamagu anchuchijpica, chaupi pachatashnami jahua pachapica chulunlla saquirirca.
2Chai jipallami, canchis angelcuna, Taita Diospaj ñaupajpi shayanajujta ricurcani. Paicunamanmi, canchis trompetacunata curca.
3Cutin shuj ángel shamushpaca, inciensota cushnichina curi copata apashpami altar ñaupajpi shayarirca. Diospajlla causajcuna, mañashcacunahuan mirachishpa, curi altar jahuapi cushnichunmi, ashtaca inciensotapash chai angelman curca. Chai altarca, mandangapa tiyarina ñaupajpimi carca.
4Chai angelpaj maquimanda incienso cushni llujshishpaca, Diospajlla causajcuna mañanajushcahuan chapurishpami, Taita Diospaj ñaupajman vichai rirca.
5Chai angelca, inciensota cushnichij copata japishpami, altarpi rupajuj ninata jundachishpa, cai pachaman shitamurca. Shina shitamujpimi, ninanda culun nijpash, caparinajujpash uyarirca. Shinallata, punchapamba shitajcunapashmi ricurirca. Alpa mamapash, ninanda cuyurishpami tucuchijurca.
Trompetacunamanda6Canchis trompetacunata charinajuj, canchis angelcunaca, chaicunata huacachingapami alichirinajurca.
7Callaripi, trompetata ángel huacachijpica, runduhuan, ninahuan, yahuarhuan chapushcatami, cai pachaman shitamurca. Cai pachata quimsapi chaupishpami, shuj chaupitaca, quirucunatapash, verde jihuacunatapash tucuilla rupachirca.
8Shujpaj cati ángel trompetata huacachijpica, jatun urcuman rijchaj rupajuj ninata mama cuchaman shitamujpimi, mama cuchata quimsapi chaupishpa, shuj chaupitaca yahuarman tigrachirca.
9Shinallata, mama cuchapi causajcunata quimsapi chaupishpami, shuj chaupitaca tucuillata huañuchishpa tucuchirca. Mama cuchapi barcocunatapash, chashnallatami quimsapi chaupishpa, shuj chaupitaca faquishpa tucuchirca.
10Ishcaipaj cati ángel trompetata huacachijpica, jahua pachamandami, michun rupajujshna jatun luzero urmamurca. Jatun larca yacucunatapash, pugyu yacucunatapash quimsapi chaupijpimi, chai luzeroca shuj chaupipi urmarca.
11Chai luzeroca “jayaj” shutimi carca. Yacuta quimsapi chaupishpami, shuj chaupitaca jayajman tigrachirca. Chai yacu jayajman tigrajpimi, chai yacuta ufiashpaca, ashtaca gentecuna huañurca.
12Quimsapaj cati ángel trompetata huacachijpica, indita, lunata, luzerocunatapash quimsapi chaupishpami, shuj chaupitaca yanayachun huaglichirca. Shina cajpimi, punllatapash, tutatapash, quimsapi chaupishpa, shuj chaupitaca micha illajta saquirca.
13Chai jipallami, shuj jatun anga jahuata rishpa, jahua pacha chaupita rijujta ricurcani. Chai jatun angaca cashna nishpami caparijurca: “¡Aij, aij, aij, cai pachapi causajcunaca, imachari tucunga! Caishuj quimsa angelcuna trompetata huacachijpica, ninan llaqui tiyangarami” nijtami uyarcani.
Who We AreWhat We EelieveWhat We Do
2025 by iamachristian.org,Inc All rights reserved.
