1Mandaj Diosca, cashnami nin:
“Jahua pachaca, Ñuca mandashpa tiyajunami.
Cai pachaca, Ñuca chaqui sarunami.
¿Ñuca huasitaca, maipishi shayachinguichi?
¿Ñuca samanataca maipishi ruranguichi?” ninmi.
2Mandaj Diosca:
“Tucui caicunataca, Ñuca maquihuanmi rurarcani,
chaimandami, caicunaca tiyajun.
Ashtahuangarin Ñucaca, imagutapash na charijta, shungupi na jariyajta,
ñuca mandashcata manllaihuan cazujtami ricuriasha.
3Huagrata huañuchishpa Ñucaman cushcapash, shuj runata huañuchishcashnami.
Llamata huañuchishpa cushcapash, alcuta huañuchishcashnami.
Imaguta Ñucaman cushcapash, cuchi yahuarta cushcashnami.
Inciensota rupachishcapash, rurashcalla diosta mañashcashnami.
Paicuna munashcata agllashpa catishpami, na alita ruranatara tucui shunguhuan juyanajurca.
4Chaimandami Ñucapash paicunataca, na alicachi tucuchun agllasha.
Paicuna manllashca jatun llaquitami cachamusha.
Paicunaca Ñuca cayajpipash, pillapash na tigrachircachu.
Ñuca rimajpipash, na uyangapa munarcachu.
Ashtahuangarin Ñuca na munashcacunata agllashpami, Ñuca ñaupajpillata na alita ruranajurca” ninmi.
5Mandaj Dios mandashcata manllaihuan cazushpami, Pai rimashcata uyana canguichi.
Diosca: “Cangunata na ricunayachijcunara, Ñuca shutipi mañajpi,
llujchishpa cangunata calpachinami tucushca ninmi.
‘Mandaj Diosca, Paipaj ushaita ricuchishpami ali canman’ ninajunmi.
Ashtahuangarin Diosca, cangunata cushichingapami ricuringa.
Paicunataca, ninandami pingaichinga.
6Jerusalén pueblopica, jatun caparinajuimi uyarijun,
Diospaj huasipipash, caparinajujmi uyarijun.
Paita fiñajcunata, Mandaj Dios llaquichijujpimi chashna uyarijun.
7Jerusalen puebloca, huahuata unguna punlla nara pactajpillatami ungurca.
Unguna nanai nara japijpillatami, jari huahuata ungurca.
8¿Maijanshi chashna tucunataca uyarca?
¿Maijanshi chashna tucunataca ricurca?
¿Shuj punllapillachu, llactataca shayachishca?
¿Shuj punllapilla, shuj llactaca shayachinallachu?
Sion lomaca, unguna nanai japijpimi, huahuacunata ungurca.
9Ñucallata causaita caraj cashpaca, ¿nachu unguchinalla cani?
Pai huacharinataca, ¿jarcanachu cani? nircami Mandaj Diosca.
10Jerusalenda juyajcunaca, tucuicunami ninanda cushijuna canguichi.
Paimanda ninanda llaquirijcunaca, tucuicunami cushijuna canguichi.
11Shina cajpimi, paica, mama micunata caranshna cushichinga.
Pai juyailla punchapamba cajpimi, ninanda cushijunguichi” ninmi.
12Mandaj Diosca, cashnami nin:
“Ñucaca, ali causaitami, jatun yacutashna paiman cachamuni.
Shuj llactacunapi tucui ima charishcacunatapash, yacu jatarishpa apamunshnami apamunga.
Paicunami, cangunamanga micunata carashpa ninanda juyashpa charinga.
13Shuj mama paipaj huahuata cushichinshnami, Ñucapash cangunataca cushichisha.
Jerusalenbimi, cushijuita japinguichi” ninmi.
14Cangunaca chaita ricushpami, tucui shunguhuan cushijunguichi.
Cangunapaj causaipash, yuracuna mushujta viñajshnami tucunguichi.
Mandaj Diosca, Paipajta rurajcunataca ninanda juyashpami charinga.
Ashtahuangarin, Paita fiñajcunataca ninandami llaquichinga.
15Ricuichi, Mandaj Diosca nina rupajuj chaupipishnami shamunga.
Jatun acapanashna calpaj carretacunahuanmi chayamunga.
Paica, ninanda fiñarishpa llaquichingapami shamunga.
Rupajuj ninahuan llaquichingapami shamunga.
16Mandaj Diosca, tucui gentecunatami, ninahuan, paipaj espadahuan llaquichinga.
Mandaj Dios huañuchishca gentecunaca, ashtacapachami canga.
17Mandaj Diosca, cashnami nin:
“Rurashcalla dioscunata yarina pushtucunapi, mapa illaj tucushpa, chai dioscunapajta rurajcunataca huañuchishami.
Shinallata, cuchi aichata, ucucha aichata, ima shuj millanayai animalcunapaj aichata micujcunatapash huañuchishami.
18Ñucaca, paicuna imata ruranajujtapash, imata yarinajujtapash yachanimi.
Tucui llactacunamanda, tucui shimicunapi rimajcunata, tandachina punllacunami chayamunga.
Paicuna shamushpami, Ñuca ninan ushaita charijtaca ricunajunga.
19Ñucallatami, huaquingunataca quishpichishpa, shuj llactacunaman cachasha.
Paicunataca, flechacunahuan macanajuj, Tarsis, Fut, Lud shuti llactacunamanmi cachasha.
Shinallata, mama cucha manñapi tiyaj, Tubal shuti, Javán shuti caru llactacunamanmi cachasha.
Paicunaca, Ñuca Shutitapash, Ñuca ninan ushaita charishcatapash na rijsircachu.
Paicunami, Ñuca ninan ushaita charijtaca, shuj llactacunapi causajcunaman villanajunga.
20Paicunami cangunapaj huauquicunataca, tucui llactacunapi causanajujta pushamunga.
Mandaj Dios Ñucapaj ñaupajmanmi, caballocunapi, mulacunapi, camellocunapi, carretacunapi pushamunajunga.
Paicunataca, Ñucapajlla lomapi tiyajuj Jerusalenmanmi pushamunajunga.
Israelcuna, Ñucaman ofrendata apamunshnami apamunajunga.
Mandaj Dios Ñucapaj huasiman cungapa, mapa illajta apamunshnami apamunajunga.
Caitaca, Mandaj Dios Ñucami, chashna nini.
21Paicunapuramandaca, sacerdotecuna cachun, levitacuna cachunmi, maijandapash agllasha” ninmi Mandaj Diosca.
22Mandaj Diosca, cashnatapashmi nin:
“Ñuca rurashca mushuj jahua pachapash, mushuj cai pachapash, causaita causaicamanmi Ñuca ñaupajpi canga.
Shinallatami cangunapaj miraicunapash, cangunapaj shutipash, causaita causaicamanmi canga.
23Tucui quillacunapi, samana punllacunapi,
tucuicuna Ñuca ñaupajman shamushpami Ñucataca ninanda alicachinajunga.
Mandaj Dios Ñucami, chashna nini.
24Paicuna shamushpaca, Ñucata na cazushpa jariyajcuna, huañushca sirinajujtami ricunga.
Paicunata micuj jurucunaca, napacha huañungachu.
Paicunata rupachij ninapash, napacha huañungachu.
Paicunaca, tucui gentecunapaj ñaupajpimi, millanayachi tucushca canga” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
