1Chai jipami Davidca, paipaj shungupica cashna yajurca: “Saulca ima punlla cashpapash huañuchihuangallami. Ama ashtahuan ñucata tucui cai Israel llactapi mascashpa purijuchunga, filisteocunapaj llactapi pacajungapa rishpallami quishpirisha” yajurcami.
2Shina yajushpami Davidca, paita catij sucta patsaj runacunandi, Gat shuti pueblota jatun mandaj Maoc shuti runapaj churi Aquis runapajman rirca.
3Davidca, paita catijcunandimi, Aquis runahuan, Gat pueblopi causajurca. Paita catij runacunaca, paicunapaj tucuilla ayllucunandi, Davidca, paipaj ishcandi huarmicunandimi chaipi causajurca. Ahinoam shuti huarmica, Jezreel pueblomandami carca. Abigail huarmica, Nabal shuti runapaj huarmi cashca, Carmel shuti pueblomandami carca.
4Davidca, Gat pueblopi pacajungapa rishcata yachashpami, Saulca, na ashtahuan mascashpa saquirca.
5Davidca, Aquis runataca cashnami nirca: “Cambaj ñaupajpi ñuca ali ricurishca cajpica, muyundi uchilla pueblocunamanda maijanda cashpapash, ñuca chaipi causangapa cuhuailla. ¿Ima nishpata, cambajta ruraj ñucaca, can mandashpa tiyajuj pueblopica causashayari?” nircami.
6Shina nijpimi Aquis runaca, chai punllallata Siclag shuti pueblota curca. Chaimandami Siclag shuti puebloca, cunangaman Judá llactata jatun mandajcunapaj tucushca.
7Filisteocunapaj llactapi David causajushca punllacunaca, shuj huata chuscu quillami carca.
8Davidca, paita catijcunandi vichai rishpami, Guesur, Guézer, Amalec gentecunahuan macanajurca. Paicunami, punda huatamandapacha, Shur shuti jichushca pambaman rina ñan llactamandaca, Egipto llacta chayanacaman causanajurca.
9Davidca, jaricunata, huarmicunata huañuchishpami, chai llactataca tucuilla tucuchirca. Shinallata llamacunata, huagracunata, burrucunata, camellocunata, churajunacunataca apashpami, Aquis runapajman tigran carca.
10Chaita ricushpami Aquis runaca: “Cunanga, ¿maijan pueblopita llaquichircanguichi?” nishpa tapuj carca. Shina nijpimi Davidca: “Neguev pambapi, Judá llacta uraipi, Jerameel shuti llactapi, Ceneo gentecuna causanajuj pambapimi llaquichircanchi” nin carca.
11Davidca, jari cajpi, huarmi cajpipash, shujllatapash na causajta saquinllu carca. Gat puebloman shamushpaca: “Davidmi cashna llaquichirca” nishpa ama villachunmi, tucuillata huañuchin carca. Chashnami paica, filisteocunapaj llactapi causajui punllacunaca ruraj carca.
12Ashtahuangarin Aquis runaca, David imata nishcatapash crishpami, cashna yajurca: “Paica, Israel llactapica millanayachi tucushcami. Chaimanda cunanga, ñucapajtalla rurashpami causanga” yajurcami.
Who We AreWhat We EelieveWhat We Do
2025 by iamachristian.org,Inc All rights reserved.
